Read Јаҥы Кереес Римдегилерге 6 Bible Online

Римдегилерге 6 - Јаҥы Кереес bible

Римдегилерге 6

¹Айдарда, не деп айдарыс? Јакшылык арбындазын деп, кинчек эдип јӱрерис пе? Јок туру!

²Бис кинчекке ӧлӱп калганыс. Айдарда, канайып кинчек эдип јӱрерис?

³Ончобыс Христос Иисусла бирлик болорго креске тӱжеристе, Оныла кожо ӧлӧргӧ креске тӱшкенисти билбей туругар эмеш пе?

⁴Креске тӱжӱп, Оныҥ ӧлӱминде кожо туружаачылар боло берип, Оныла кожо бойыбысты кӧмдис. Ол Аданыҥ мактулу кӱчиле тирилгени чилеп, бис те јаҥы јӱрӱмле јӱрели деп, анайда эткенис ол.

⁵Ол чылап ӧлӱп, Оныла кожо бириккен болзобыс, Ол чылап тирилерис.

⁶Бисти кинчектиҥ кулы болбозын деп, кинчегис бисти бийлебезин деп, бистиҥ јебрен кижибис Оныла кожо кере тартылганын бис билерис.

⁷Ӧлӱп калган кижи кинчектеҥ јайымдалганы ол ине.

⁸Христосло кожо ӧлгӧн болзобыс, Оныла кожо јӱрерис деп, бӱдӱп јадыбыс.

⁹Бис билерис, тирилген Христос база ӧлбӧс: ӧлӱм Оны бийлебей јат.

¹⁰Ол ӧлӧрдӧ, кинчекке болуп бир катап ӧлгӧн, је јӱрӱп турганы Кудайга јӱрӱп јат.

¹¹Анайып слер де, бойыгарды кинчекке ӧлӱп калганыгар, је Христос Иисус Кайраканыс ажыра Кудайга тирӱ деп бодогор.

¹²Анайдарда, ӧлӱмдӱ эди-каныгарда кинчек бийлебезин деп, оныҥ кычаларына бакпагар.

¹³Эди-каныгардыҥ ӱйелерин јаманныҥ јепсели эдип, кинчекке бербегер. Оныҥ ордына јӱрӱмге тирилген бойыгарды Кудайга беригер. Эди-каныгардыҥ ӱйелерин слерди актайтан јепсел эдип Ого беригер.

¹⁴Кинчек слерди бийлебес, нениҥ учун дезе слерди Јасак эмес, јакшылык башкарат.

¹⁵Анайдарда, не? Јасакка эмес, јакшылыкка башкартып јӱрӱп јадыбыс дейле, кинчек эдетенис пе? Јок туру!

¹⁶Кемге бойыгарды бактыртып, кулга берип турган болзогор, ого кул боло берип турганыгарды билбей туругар эмеш пе? Ол эмезе ӧлӱмге барарга багадыгар, ол эмезе акталайын деп багадыгар.

¹⁷Башкыда кинчектиҥ кулдары болгоныгар, је Кудайга баш, бойыгарды учурлаган ӱредӱге бастыра јӱрегеердеҥ бактыгар.

¹⁸Кинчектеҥ јайымдалып, чын эдип јӱрерге, Кудайдыҥ кулдары боло бердигер.

¹⁹Бойыгар аайлап болбос учун мыны улустыҥ шӱӱгени чилеп айдып турум. Азыйда јарамас керектер эдерге, эди-каныгардыҥ ӱйелерин быјарга ла јарамаска кул эдип берген эдигер. Анайда эмди де, чындык керектер эдерге, бойыгарды Кудайга учурлайын деп, ӱйелеригерди бактырыгар.

²⁰Кинчектиҥ кулдары болороордо, чынга бакпаганыгар.

²¹Ол тушта эткен керектереердиҥ турултазы кандый болгон? Эмди ол керектер учун слерге уйатту, нениҥ учун дезе олордыҥ турултазы — ӧлӱм.

²²Је эмди кинчектеҥ јайымдалып, Кудайдыҥ кулдары боло берип, агарулалып јадыгар. Мыныҥ турултазы — ӱргӱлји јӱрӱм.

²³Кинчектиҥ јалы — ӧлӱм ине, Кудайдаҥ сыйы — Христос Иисус Кайраканыс ажыра ӱргӱлји јӱрӱм.