Read Јаҥы Кереес 1 Коринфтегилерге 14 Bible Online

1 Коринфтегилерге 14 - Јаҥы Кереес bible

1 Коринфтегилерге 14

¹Сӱӱшке јӱткигер, тынныҥ јайалталарын, анчада ла судурлаштыҥ јайалтазын аларга кӱӱнзегер.

²Ӧскӧ тилле айдып турган кижи улуска эмес, Кудайга айдат, нениҥ учун дезе оны кем де аайлабайт — ол јажыттарды тынла айдат.

³Судурлап турган кижи айдып, улуска ӧзӧргӧ болужып, олорды јӧмӧп, кӧкӱдип јат.

⁴Ӧскӧ тилле айдып турган кижи бойына ӧзӧргӧ болужат; судурлап турган кижи серкпеге ӧзӧргӧ болужат.

⁵Ончогор ӧскӧ тилдерле айтсын деп кӱӱнзейдим, је судурлазагар, торт болор. Судурлап турган кижи, ӧскӧ тилдерле айдып турган кижидеҥ бийик, серкпе ӧссин деп болужарга, ӧскӧ тилдерле айдылганы јарталып турган учуралдаҥ башка.

⁶Эмди слерге келип, карындаштар, ӧскӧ тилдерле айда берген болзом, менеҥ слерге кандый туза болгой эди? Слерге нени де айдып бербес эдим, нени де ачпас эдим, бир де билгир бербес эдим, нени де судурлабас эдим, неге де ӱретпес эдим.

⁷Анайып ок тын јок то немелер — шоор эмезе јадаган бир тӱҥей ӱнденип турган болзо, нени шоорлоп эмезе јадагандап турганын канайып билип алар?

⁸Амыргы аайлап болбос эттире ӱнденип турза, јуу-согушка кем белетенер?

⁹Анайып слер де: аайлап болбос сӧстӧр айдып турган болзогор, нени айдып турганыгарды улус канайып аайлаар? Слер оны куру кейге айдарыгар.

¹⁰Телекейде сӱрекей кӧп јӱзӱн-башка сӧстӧр бар, олордыҥ кажызы ла учурлу.

¹¹Анайдарда, бу сӧстӧрдиҥ учурын оҥдобой турган болзом, айдып турган кижиге мен — ӧскӧ ороонныҥ кижизи, айдып турган кижи де меге — ӧскӧ ороонныҥ кижизи.

¹²Анайып слер де: Тынныҥ јайалталарын аларга кӱӱнзеп, серкпе ӧссин деп болужарга, олорло байыырга кичеенигер.

¹³Оныҥ учун ӧскӧ тилле айдып турган кижи тилдерди јартаарыныҥ јайалтазын аларга мӱргиир учурлу.

¹⁴Андый тилле мӱргип тургамда, тыным мӱргип јат ине, је санаам мында турушпай јат.

¹⁵Нени эдейин? Тынла мӱргиирим, санаамла да мӱргиирим; тынла сарнаарым, санаамла да сарнаарым.

¹⁶Кудайды тынла алказаҥ, слердиҥ јууныгардагы билбес кижи алкыжыҥа каруу эдип, «Аминь!» деп, канайып айдар? Нени айдып турганыҥды ол билбес.

¹⁷Сен алкыш-быйанды јакшы айдып јадыҥ, је ӧскӧ кижи оноҥ ӱредӱ албай јат.

¹⁸Кудайыма алкыш-быйан айдып турум: ӧскӧ тилдерле ончогордоҥ артык айдып јадым.

¹⁹Је серкпеде ӧскӧ тилле тӱмен сӧстӧр айтканчам, ӧскӧлӧрин ӱредерге, санаамнаҥ беш сӧс айдайын.

²⁰Карындаштар! Санаагарла балдар болбогор. Јаманга балдар болыгар, санаагарла — эр кемине јеткен улус болыгар.

²¹Јасакта бичилген: «Бу калыкка ӧскӧ тилдерле, ӧскӧ ороондордыҥ улузы ажыра айдарым, је ол до тушта Мени уккылабас — деп, Кайракан айдат».

²²Анайдарда, ӧскӧ тилдер бӱдӱп турган улуска эмес, бӱтпей турган улуска билди болуп јат; судурлаш — бӱтпей турган улуска эмес, бӱдӱп турган улуска берилип јат.

²³Ончо серкпе јуулыжып келзе, ончозы ӧскӧ тилдерле айда берзе, билбес эмезе бӱтпей турган улус кирип келзе, санаагар ордында эмес деп айтпас па?

²⁴Ончозы судурлап турза, бӱтпей турган кижи эмезе билбес кижи кирип келзе, Кудай оныҥ кинчектерин слер ажыра иле эдип, јаргылаар.

²⁵Анайып, оныҥ јӱрегиниҥ јажыттары ачылар. Ол кӧҥкӧрӧ јыгылып, Кудайга бажырып, угузар: «Чындаптаҥ Кудай ортогордо».

²⁶Анайдарда не, карындаштар? Јуулыжып келгенигерде, кажыгарда ла сарын бар, ӱредӱ бар, Кудайдаҥ ачылта бар, кем де ӧскӧ тилле айдат, ӧскӧзи оны јартайт. Бу ончозы серкпеге ӧзӧргӧ болушкай.

²⁷Ӧскӧ тилле айдып турган улус бар болзо, эки, кӧп лӧ салза ӱч кижи айтсын. Айла ээчий-деечий айтсын, бир кижи јартазын.

²⁸Јартаар кижи јок болзо, ӧскӧ тилле айдаачы кижи јуунда унчукпазын, бойына ла Кудайга айтсын.

²⁹Эки эмезе ӱч јарлыкчы айтсын, арткандары олордыҥ айтканын шӱӱшсин.

³⁰Отургандардыҥ бирӱзине ачылта болзо, айдып турганы унчукпай барзын.

³¹Ончозын ӱредерге ле ончозын кӧкӱдерге ончогор ээчий-деечий судурлаар аргалу.

³²Јарлыкчылардыҥ тыны јарлыкчыларга уккур,

³³нениҥ учун дезе Кудай — ол аайы јоктыҥ эмес, амырдыҥ Кудайы. Агарулардыҥ ончо јуундарында чылап,

³⁴ӱй улус серкпелерде унчукпас учурлу. Олорго айдарга јарабас, олор уккур болор учурлу. Мынайда Јасак та айдат.

³⁵Неге ӱренип аларга турган болзо, айлында ӧбӧӧндӧринеҥ суразын. Серкпеде сӧс айдары ӱй кижиге уйат ине.

³⁶Эмезе Кудайдыҥ сӧзи слердеҥ чыкты эмеш пе? Эмезе јаҥыс слерге јетти бе?

³⁷Бойын јарлыкчы эмезе тынла јӱрӱп јадым деп бодоп турган кижи аайлаар учурлу: слерге бичип турганым — ол Кайраканныҥ јакылталары.

³⁸Мыны јектеп турган кижи бойы јектелер.

³⁹Анайдарда, карындаштар, судурлаарга јӱткигер, је ӧскӧ тилдерле айдарга буудак этпегер.

⁴⁰Је ончозы чын ла аайлу-башту болзын.