Read Јаҥы Кереес 1 Коринфтегилерге 15 Bible Online

1 Коринфтегилерге 15 - Јаҥы Кереес bible

1 Коринфтегилерге 15

¹Мен слерге јарлаган Сӱӱнчилӱ Јарды эске алындырып турум, карындаштар. Оны слер алдыгар, ондо бек туруп јадыгар.

²Мен слерге јарлаган сӧстӧҥ бек тудунып турган болзогор, бу Јар ажыра аргадалып јадыгар. Андый эмес болзо, калас бӱттигер.

³Баштапкызында, бойымныҥ алганымды, слерге бердим: бичилгениле, Христос кинчектерис учун ӧлгӧн;

⁴бичилгениле, Оныҥ мӧҥкӱзи кӧдӱрилген, Ол ӱчинчи кӱнде тирилген;

⁵Кифага, оноҥ он экӱге кӧрӱнген.

⁶Оноҥ бир уунда беш јӱстеҥ ажыра карындаштарга кӧрӱнген. Олордыҥ кӧбизи эмдиге јетире эзен, кезиги јада калган.

⁷Оноҥ Иаковко, анайда ок ончо апостолдорго кӧрӱнген.

⁸Адакыда меге, ара чыккандый кижиге, кӧрӱлген.

⁹Мен ончо апостолдордыҥ јабызы инем, апостол деп адаларга турбазым, нениҥ учун дезе Кудайдыҥ Серкпезин истегем.

¹⁰Је Кудайдыҥ јакшылыгыла мен эмди кем, ол болорым. Оныҥ меге эткен јакшылыгы темей болбогон: олордыҥ ончозынаҥ кӧп кӱчимди салып иштегем. Мен де эмес, мениле кожо болгон Кудайдыҥ јакшылыгы иштеген.

¹¹Оныҥ учун слерге мен бедим, ӧскӧ апостолдор беди келгени башказы јок. Је бис анайда јарлыктайдыс, слер анайда бӱттигер.

¹²Анайдарда, Христос тирилген деп јарлыктап јӱрген болзобыс, ӧлгӧндӧр тирилбес деп, кезигер канайып айдыжат болбогой?

¹³Ӧлгӧндӧр тирилбес болзо, Христос то тирилбеген.

¹⁴Христос тирилбеген болзо, калас јарлыктап јадыбыс, калас бӱдӱп јадыгар.

¹⁵Оноҥ болгой, Кудай Христосты тиргискен деп керелеп, Кудай керегинде тӧгӱн керечилер болуп калар эдибис, нениҥ учун дезе, ӧлгӧндӧр тирилбей турган болзо, Кудай да Оны тиргиспеген.

¹⁶Ӧлгӧндӧр тирилбей турган болзо, Христос то тирилбеген.

¹⁷Христос тирилбеген болзо, бӱдӱп турганыгар калас: эмдиге јетире кинчектӱ јӱрӱп јадыгар.

¹⁸Оныҥ учун Христосло бир болуп ӧлгӧн улус ӱргӱлјиге ӧлӱп калганы ол.

¹⁹Јаҥыс бу јӱрӱмде Христоско иженип турган болзобыс, бис — ончозынаҥ эҥ кежик јок улус.

²⁰Је Христос тирилген. Ол ӧлгӧн улустаҥ баштапкы тирилген.

²¹Ӧлӱм кижи ажыра келгени чилеп, кижи ажыра ӧлгӧндӧр дӧ тирилер.

²²Ончо улус баштапкы кижи Адамла бир болуп ӧлӱп турганы чылап, ончозы Христосло бир болуп тынданар.

²³Је кажызы ла ээчий-деечий: баштап Христос, оноҥ, Ол келзе, христостыйлар.

²⁴Оноҥ Ол Каандыкты Ада Кудайга табыштырза, кандый ла баштаҥыны, кандый ла ӧрӧги јаҥды ла кӱчти јоголтсо, учы болор.

²⁵Ол ончо ӧштӱлерди Бойыныҥ буды алдына салбаганча, каан болуп башкарар.

²⁶Калганчы ӧштӱ — ӧлӱм, јоголтылар.

²⁷Кудай ончозын Оныҥ буды алдына бактырган ине. Ончозы бактырылган деп айдылган болзо, Ого ончозын бактырган Кудай керегинде айдылбай турганы јарт.

²⁸Ончозы Ого бактырылза, ончозын Ого бактырган Кудайга Уулы Бойы багар. Ол тушта бастыразына Кудай ончозы болор.

²⁹Анайдарда, ӧлгӧндӧргӧ болуп креске тӱжӱп турган улус нени эдип јадылар? Ӧлгӧндӧр качан да тирилбес болзо, олорго болуп креске не тӱжетен?

³⁰Бис те неге болуп јаантайын јеткердиҥ алдында јӱрӱп јадыбыс?

³¹Мен кӱнӱҥ сайын ӧлӱп јадым. Бу керегинде Иисус Христос Кайраканысла бир болуп слерле мактанар аргалу болгонымды угузып турум.

³²Кижи чилеп шӱӱп айдар болзо, Ефесте аҥдарла неге болуп тартышкам? Меге оноҥ кандый туза? Ӧлгӧндӧр тирилбей турган болзо, јийли, ичели, нениҥ учун дезе эртен ӧлӱп каларыс!

³³Аспагар! Јаман колбулар кижиниҥ јакшы кылык-јаҥын ӱреп јат.

³⁴Санаа алыныгар, кинчек этпегер. Мыны слерди уйалтарга айдып турум: кезигер Кудайды билбес.

³⁵Је кем де сураар: «Ӧлгӧндӧр канайып тирилер? Олордыҥ эди-каны кандый болор?»

³⁶Керсӱ эмес! Ӱрендеп турганыҥ ӧлбӧгӧнчӧ, тынданбас.

³⁷Сееп тургаҥда, ӧзӱмниҥ бойын эмес, тегин ӱренди, буудайдыҥ ба эмезе ӧскӧзиниҥ бе ӱренин сееп јадыҥ.

³⁸Је Кудай Бойыныҥ кӱӱнзегениле ого бӱдӱм берип јат, кажы ла ӱренге — бойыныҥ бӱдӱмин.

³⁹Ончозыныҥ эди-каны тӱҥей эмес: кижиниҥ эди-каны тындулардыҥ эди-канынаҥ аҥыланат, куштардыйы — балыктардыйынаҥ.

⁴⁰База теҥериниҥ бӱдӱмдери ле јердиҥ бӱдӱмдери бар. Је теҥериниҥ бӱдӱмдеринде бойыныҥ јаркыны, јердийинде — бойыныҥ.

⁴¹Кӱнде бойыныҥ јаркыны, айда — бойыныҥ, јылдыстарда — бойыныҥ. Јылдыс јылдыстаҥ база јаркыныла аҥыланат.

⁴²Анайып ок ӧлгӧндӧр тирилгенде болуп јат: чирип калары ӱренделет, чирибези туруп келет;

⁴³тоомјы јогы ӱренделет, мактулузы туруп келет, кӱч јогы ӱренделет, кӱчтӱзи туруп келет;

⁴⁴ар-бӱткеннеҥ берилген эт-кан ӱренделет, тыннаҥ берилген эт-кан туруп келет. Ар-бӱткен де, тын да берген эт-кан бар.

⁴⁵Анайып ла бичилген: «Баштапкы кижи Адам јӱрӱм јӱреечи боло берген». Калганчы Адам јӱрӱм јайаачы Тын боло берген.

⁴⁶Је озо баштап тынла јӱргени эмес, ар-бӱткенле јӱргени табылган. Оноҥ тынла јӱргени табылган.

⁴⁷Баштапкы кижи јердеҥ, тобрактаҥ бӱткен, экинчи кижи — Кайракан теҥеридеҥ келген.

⁴⁸Тобрактаҥ кижи кандый, тобрактаҥ улус андый. Теҥеридеҥ кижи кандый, теҥеридеҥ улус андый.

⁴⁹Тобрактаҥ кижиниҥ сӱр-кеберин алып јӱргенис чилеп, теҥеридеҥ кижиниҥ сӱр-кеберин алып јӱрерис.

⁵⁰Оныҥ учун слерге айдып турум, карындаштар: кижиниҥ эди ле каны ӧлӱмдӱ, ол Кудайдыҥ Каандыгын энчиленип болбос, чирип калары чирибезин энчиленип болбос.

⁵¹Угыгар, слерге јажытты айдып турум: ончобыс ӧлбӧзис, је ончобыс кубуларыс —

⁵²кенетийин, бир элесте, калганчы амыргы ӱндензе. Амыргы ӱнденер, ӧлгӧндӧр чирибеген бойлоры тирилер, бис кубуларыс.

⁵³Чирип калары чирибези боло берер, ӧлӱмдӱзи ӧлбӧс боло берер учурлу.

⁵⁴Чирип калары чирибес боло берзе, ӧлӱмдӱзи ӧлбӧс боло берзе, бичилген сӧс бӱдер: «Ӧлӱм јеҥдирткен!»,

⁵⁵«Ӧлӱм! Сениҥ чактырмаҥ кайда? Таамы! Сениҥ јеҥӱӱҥ кайда?»

⁵⁶Ӧлӱмниҥ чактырмазы — кинчек, кинчектиҥ кӱчи — Јасактаҥ.

⁵⁷Је Кудайга баш, Ол биске Иисус Христос Кайраканыс ажыра јеҥӱ берген.

⁵⁸Анайдарда, сӱӱген карындаштарым, кӧп иштеп јӱргенигер Кайракан алдында калас эмезин билип, турумкай болыгар, јана баспагар, Кайраканга иштеерине бастыра бойыгарды беригер.