Read Јаҥы Кереес 1 Коринфтегилерге 4 Bible Online

1 Коринфтегилерге 4 - Јаҥы Кереес bible

1 Коринфтегилерге 4

¹Анайдарда, бисти Христостыҥ јалчылары деп, Кудайдыҥ јажыттары учун каруулу улус деп, кажы ла кижи сананар учурлу.

²Андый улустаҥ чындык болоры некелет.

³Мени слер јаргылараар ба эмезе ӧскӧ улус јаргылаар ба, бу мени санааркатпай јат. Мен бойымды бойым да јаргылабайдым.

⁴Бойымды бурулу деп бодобой до турган болзом, је мынызыла актанбай јадым. Мени јаргылаары — Кайракан.

⁵Оныҥ учун Кайракан келбегенче, ӧйинеҥ озо бир де јаргылабагар. Ол караҥуйда јажырылганды јарыдып ийер, јӱректе алып јӱрген санааларды иле эдер. Ол тушта кажы ла кижи Кудайдаҥ бойыныҥ кайралын алар.

⁶Мыны, карындаштар, бойым ла Аполлос керегинде слерге болуп айттым. Бичилгенге ӱзеери нени де этпеске бистеҥ ӱренигер, бирӱгер ӧскӧзиниҥ алдында бийиктединбезин деп кӱӱнзейдим. Ол тушта бир кижиле оморкоп, ӧскӧзин јектебезигер.

⁷Чындап та, сени кем аҥылады? Сенде Кудайдаҥ албаган не бар? Алган болзоҥ, албаган чылап, не мактанадыҥ?

⁸Слер тойдыгар ба? Байыдыгар ба? Бис јокко каандар болуп калдыгар ба? Слерди чындаптаҥ каандар боло берзин деп кӱӱнзеер эдим! Ол тушта бис те слерле кожо каандар болор эдибис.

⁹Је сананзам, Кудай бисти, апостолдорды, ӧлӱмге јаргылаган калганчы улусты чылап, ончозыныҥ алдына тургузып койгондый. Биске бастыра телекей — ангелдер де, улус та кӧрӱп јадылар.

¹⁰Бис Христоско болуп тенек, слер — Христостыҥ шылтузында ойгор. Бис чине јок, слер — кӱчтӱ. Слерди мактайдылар, бисти — јаман кӧрӧдилер.

¹¹Оноҥ болгой эмдиге јетире торолоп, суузап јадыбыс, ӱлтӱреп калган кийимдӱ јӱрӱбис, соктыртып јадыбыс, јадар јерис јок,

¹²кызыл колыстыҥ кӱчиле иштеп јадыбыс. Бисти арбайдылар, бис алкайдыс. Бисти сӱредилер, бис чыдажадыс.

¹³Бисти јамандайдылар, бис коот сӧстӧр айдадыс. Бис телекейге сӱре-чӧптий, бис эмдиге јетире таштанчыдый.

¹⁴Слерди уйалтайын деп эмес, сӱӱген балдарымды чылап санандырайын деп, мыны бичип турум.

¹⁵Слерди тӱмен ӱредӱчилер Христос керегинде ӱреткен де болзо, је адалар кӧп эмес. Слерге Сӱӱнчилӱ Јар јарлап, слерди Христос Иисуска туудым.

¹⁶Оныҥ учун слерди сурап турум: Христостоҥ тем алып турганым чылап, менеҥ тем алыгар.

¹⁷Бого болуп слерге Тимофейди ийдим. Ол Кайраканга чындык болуп јӱрген мениҥ карузыган уулым. Христос Иисуска болуп канайда јӱрӱп турганымды, кайда ла, кажы ла серкпеде канайда ӱредип јӱргенимди ол слерге эске алындырар.

¹⁸Слерге келбезимде, кезигер јакшыркай берген.

¹⁹Је Кайраканныҥ табы болзо, слерге удабас келип, јакшыркактардыҥ сӧстӧрин эмес, олор нени эдер аргалузын ченеп кӧрӧрим.

²⁰Кудайдыҥ Каандыгы сӧстӧ эмес, кӱчте.

²¹Нени кӱӱнзейдигер? Слерге камчылу келейин бе, эмезе сӱӱштӱ ле јобожыган келейин бе?