Read Јаҥы Кереес 1 Коринфтегилерге 6 Bible Online

1 Коринфтегилерге 6 - Јаҥы Кереес bible

1 Коринфтегилерге 6

¹Ӧскӧ карындашла блааш-тартышту керек бар болуп, агаруларда эмес, чындык эместерде јаргылажарга кемигер тидинет?

²Агарулар бу телекейдиҥ улузын јаргылаарын билбей туругар ба? Калыктарды јаргылайтан болзогор, оок-тобыр керектердиҥ аайына чыгар аргагар јок болды ба?

³Ангелдерди де јаргылаарысты билбей туругар эмеш пе? Јадын-јӱрӱмдеги керектерди айтпай да јадым.

⁴Јадын-јӱрӱмдеги керектер јанынаҥ блааш-тартыш боло бергенде, оны серкпеде кем де эмес улустыҥ јаргызына не бередигер?

⁵Слерди уйалтайын деп айдып турум: бойыныҥ карындаштарыныҥ аайына чыгар ойгор кижи ортогордо јок по?

⁶Керек дезе карындаш карындажыла бӱтпестердиҥ алдына јаргылажат.

⁷Анайдарда, бой-бойыгарла јаргылажып турганыгар — ол слердиҥ бӱткӱлинче јеҥдирткенигер. Тарынып артсагар, артык болор эмес пе? Слердеҥ айрып турза, артык болор эмес пе?

⁸Карын, бойыгар јаман эдип, айрып јадыгар, керек дезе карындаштарла анайда кылынып јадыгар.

⁹Чындык эместер Кудайдыҥ Каандыгын энчиленбес деп, билбей туругар ба? Аспагар: балыр јӱрӱмдӱлер, чалуга бажыраачылар, чайдам кылыктулар, бодулар, ӱй улусла јуртаган чылап кожо јуртап турган эр улус,

¹⁰уурчылар, ачыркактар, аракызактар, јамандаачылар, тонокчылар Кудайдыҥ Каандыгынаҥ јер албас.

¹¹Слердиҥ кезигер андый болгон. Је Иисус Христос Кайраканныҥ адыла, Кудайыстыҥ Тыныла аруталдыгар, бойыгарды Кудайга агаруладыгар, акталдыгар.

¹²Меге ончозын эдерге јараар, је ончозы туза экелбей јат. Меге ончозын эдери јарадылган, је мени не де бийлебес учурлу.

¹³Курсак — карынга, карын — курсакка. Је Кудай онызын да, мынызын да јоголтып койор. Эт-кан балыр јӱрӱмге эмес, ол — Кайраканга, Кайракан — эт-канга.

¹⁴Кудай Кайраканды тиргискен, Ол Бойыныҥ кӱчиле бисти де тиргизер.

¹⁵Эди-каныгар — Христостыҥ ӱйелери деп, билбей туругар ба? Анайдарда, Христостыҥ эди-каныныҥ ӱйелерин алып, оны балыр јӱрӱмдӱ ӱй кижиниҥ ӱйелери эдетем бе? Јок туру!

¹⁶Балыр јӱрӱмдӱ ӱй кижиге бириккени, оныла бир эт-кан боло бергенин билбей туругар эмеш пе? Айдылган јок беди: «Экӱ бир эт-кан боло берер».

¹⁷Кайраканла биригип турган кижи Оныла бир тын болуп јат.

¹⁸Балыр јӱрӱмнеҥ качыгар! Кижи кандый да кинчек этсе, ол эт-канга каршу јетирбей јат. Балыр јӱрӱмдӱ кижи акту бойыныҥ эди-канына удура кинчек эдет.

¹⁹Эди-каныгар — бойыгарда јӱрӱп турган ла слерге Кудайдаҥ берилген Агару Тынныҥ байзыҥы деп, билбей туругар эмеш пе? Слер бойыгардыйы эмес.

²⁰Слерди јаан баала садып алгандар. Анайдарда, Кудайдыйы болгон эди-каныгар ла сӱнегер Кудайдыҥ магына болзын.