Read Јаҥы Кереес 1 Коринфтегилерге 7 Bible Online

1 Коринфтегилерге 7 - Јаҥы Кереес bible

1 Коринфтегилерге 7

¹Меге бичигенигер керегинде айдарым бу. Эр кижиге кижи албаза торт.

²Је балыр кылык кӧптӧгӧнинеҥ улам кажы ла эр кижи ӱйлӱ болзын, кажы ла ӱй кижи ӧбӧӧндӱ болзын.

³Ӧбӧӧни ӱйи алдында, ӱйи ӧбӧӧни алдында бойыныҥ молјулу керегин бӱдӱрер учурлу.

⁴Ӱйи бойыныҥ эди-канына ээ эмес, оныҥ ээзи — ӧбӧӧни. Анайда ок ӧбӧӧни де бойыныҥ эди-канына ээ эмес, оныҥ ээзи — ӱйи.

⁵Бой-бойыгардаҥ кыйышпагар. Јаҥыс кезек ӧйгӧ, экӱ јӧптӧжӧлӧ, орозо тударга ла бойыгарды мӱргӱге учурлаарга кожо болбозогор кем јок. Је мыныҥ кийнинде ойто кожо болыгар. Оноҥ башка, бойыгарды тудунып болбозыгардаҥ улам слерди сатана ченеердеҥ маат јок.

⁶Је мен мыны јакарып эмес, јарадып айдадым.

⁷Ончо улус мендий болзын деп кӱӱнзеер эдим, је кажы ла кижи бойы Кудайдаҥ сыйлу: бирӱзинде мындый, ӧскӧзинде андый сый бар.

⁸Кижи албаган ла тул калган улуска айдып турум: олорго мен чилеп јаҥыскан јӱрзе торт.

⁹Је тудунып болбой турган болзо, кижи алгылазын. Кычаныҥ одына алдырганча, кижи алза торт болор.

¹⁰Је алышкан улуска мен эмес, Кайракан јакарат: ӱйи ӧбӧӧниле айрылышпас учурлу.

¹¹Айрылышса, јаҥыскан јӱрзин эмезе ӧбӧӧниле эптешсин. Ӧбӧӧни де ӱйиле айрылышпазын.

¹²Арткан улуска Кайракан эмес, мен айдып турум: кандый бир карындаш Кудайга бӱтпес ӱйлӱ болзо, ӱйи оныла јуртаарга јӧп болзо, айрылышпазын,

¹³бӱтпес ӧбӧӧндӱ ӱй кижи де, ӧбӧӧни оныла јуртаарга јӧп болзо, айрылышпазын.

¹⁴Бӱтпес эр кижи бӱдер ӱйи ажыра, бӱтпес ӱй кижи бӱдер ӧбӧӧни ажыра Кудайга агарулалат. Оноҥ башка, балдарыгар ару эмес болор эди, эмди олор агару.

¹⁵Бӱтпес кижи айрылыжарга турган болзо, айрылышсын. Бу учуралда бӱдӱп турган эр кижи эмезе ӱй кижи колбулу эмес. Кайракан бисти амырга кычырган.

¹⁶Кайдаҥ билериҥ, ӱй кижи, ӧбӧӧниҥди аргадап болбозыҥ ба? Эмезе сен, эр кижи, кайдаҥ билериҥ, ӱйиҥди аргадап болбозыҥ ба?

¹⁷Је кажы ла кижи Кайраканныҥ ого бергениле јӱрзин, Кудай кычырып аларда кандый болгон, андый болуп артсын. Мындый јакаруларды ончо серкпелерге берип јадым.

¹⁸Томдолгон кижи Кудайдыҥ кычырузын алынган болзо, томдолгонын јажырбазын. Томдолбогон кижи алынган болзо, томдолбозын.

¹⁹Томдолыш — ол не де эмес, томдолбогоны — ол не де эмес, је Кудайдыҥ јакылталарын бӱдӱргени учурлу.

²⁰Кажы ла кижи кандый болордо кычырылган, андый болуп артсын.

²¹Кул тужыҥда кычырылган болзоҥ, санааркаба. Је јайым болор аргалу болзоҥ, бу арганы тузалан.

²²Кайракан кычырып алган кул — Кайраканныҥ јайым кижизи. Анайып ок јайым тужында кычырылган кижи — Христостыҥ кулы.

²³Слерди јаан баала садып алгандар. Улустыҥ кулдары боло бербегер!

²⁴Карындаштар, кажы ла кижи кандый болордо кычырылган, Кудайдыҥ алдында андый болуп артсын.

²⁵Кыстар керегинде айтса, Кайраканнаҥ јакару албадым, је јӧп берип јадым. Меге, Кудайдаҥ быйан јеткен кижиге, бӱдерге јараар.

²⁶Эмдиги уур-кӱчтердеҥ улам кижи кандый, андый болуп артса торт деп бодойдым.

²⁷Ӱйиҥле кожо бо? Айрылыжар эбиҥ бедиребе. Ӱй кижи јок арттыҥ ба? Ӱй кижи бедиребе.

²⁸Је кижи де алзаҥ, кинчек этпезиҥ. Кыс бала кижиге барза, кинчек этпес. Је андый улуста јадын-јӱрӱмниҥ уур-кӱчтери болор. Мен слерди мынаҥ айрыыр кӱӱндӱ.

²⁹Слерге айдайын деп, карындаштар: ӧй ас артып јат, оныҥ учун ӱйлӱ улус ӱй јоктый болор учурлу,

³⁰ыйлап јӱрген улус — ыйлабай јӱргендий; сӱӱнип јӱрген улус — сӱӱнбей јӱргендий; садып алып турган улус — албай тургандый;

³¹бу телекейдиҥ немелериле тузаланып турган улус — тузаланбай тургандый, нениҥ учун дезе бу телекейдиҥ сӱр-кебери јоголып јат.

³²Мен слерде санааркаш јок болзын деп кӱӱнзейдим. Кижи албаганы, Кайраканга канайып јарайын деп, Кайракандыйын сананат.

³³Айыл-јурттузы ӱйиме канайып јарайын деп, јердийин сананат. Ӧбӧӧндӱзи ле кыс ортодо башказы бар:

³⁴кижиге барбаганы эмезе кыс эди-каныла да, тыныла да агару болорго, Кайраканга канайып јарайын деп, Кайракандыйын сананат. Ӧбӧӧндӱзи ӧбӧӧниме канайып јарайын деп, јердийин сананат.

³⁵Мыны ончозын слердиҥ јайымыгарды астадарга болуп эмес, слерге ок тузалу болзын деп айдадым. Мен слерди туура тартылбай, јаантайын Кайраканга јарамыкту јӱрзин деп кӱӱнзейдим.

³⁶Кызы јажы једип, јаҥыскан јӱргени јакшы эмес деп бодоп турган кижи эдейин дегенин этсин. Кинчек болбос, алышсын.

³⁷Је кем турумкай јӱректӱ, оны не де албадабай турган болзо, бойыныҥ кӱӱнин башкарып, кижи албайын деп, јӱрегинде бек сананып алган болзо, ол јакшы эдет.

³⁸Оныҥ учун кижи алып турганы јакшы эдет, кижи албай турганы оноҥ артык эдет.

³⁹Ӧбӧӧни тирӱ јӱрерде, ӱйи Јасакла колболгон. Ӧбӧӧни јада калза, кемге барар кӱӱндӱ, ого барар. Јаҥыс ол кижи Кайракандыйы болор учурлу.

⁴⁰Мениҥ шӱӱлтемле јаҥыскан артса, кежиктӱ болор. Је мениҥ бойымда ок Кудайдыҥ Тыны бар деп, бодоп јадым.