Read Јаҥы Кереес 1 Коринфтегилерге 8 Bible Online

1 Коринфтегилерге 8 - Јаҥы Кереес bible

1 Коринфтегилерге 8

¹Эмди чалуларга тайган курсак керегинде. Ончобыста билгир бар деп билерис. Је билгир кижини бийиркедет, сӱӱш — тыҥыдат.

²Нени де билерим деп сананып турган кижи билер учурлузын билбей јат.

³Кудайды сӱӱп турган кижи Кудайды билип алган[1].

⁴Чалуларга тайган курсак керегинде айдып тура, чалу телекейде не де эмес деп, бир Кудайдаҥ башка, ӧскӧ кудай јок деп билерис.

⁵Теҥериде беди, јерде беди, кудайлар деп адалганы бар. Андый кудайлар кӧп, бийлер де кӧп.

⁶Је бисте бир Ада Кудай. Ол ончозыныҥ Јайаачызы, Ого болуп јӱрӱп јадыбыс. Бисте бир Кайракан — Иисус Христос. Ончозы Ол ажыра јайалган, Ол ажыра јӱрӱп јадыбыс.

⁷Је андый билим ончо улуста эмес. Кезик улус бу јууктарга јетире чалуларга бажырып, бого темигип калган учун тайган курсакты јигенде, ол чалуларга учурлалган деп сананып јадылар. Олордыҥ санаазы чын шӱӱр аргазы јок болуп, быјартыдым деп бодоп јадылар.

⁸Курсак бисти Кудайга јууктатпай јат. Ажанып турган болзобыс, кирелте албайдыс, ажанбай турган болзобыс, нени де јылыйтпайдыс.

⁹Је калак, бу јайымыгар чине јокторго буудак болбозын.

¹⁰Сен, андый билимдӱ бойыҥ, кара јаҥдулардыҥ байзыҥында ажанып отурган болдыҥ. Сени чине јок кижи кӧрӱп ийеле, бойыныҥ санаазыла чалуларга тайган курсакты јиирге тартылбас па?

¹¹Сениҥ билгириҥнеҥ чине јок карындажыҥ ӧлӧр. Христос бу да карындажыҥ учун ӧлгӧн ине.

¹²Анайып карындаштарыгарга удура кинчек эдип, олордыҥ чине јок санаазын шыркалап, Христоско удура кинчек эдип јадыгар.

¹³Оныҥ учун, курсак карындажымды бӱдӱрилтип турган болзо, оны бӱдӱрилтпеске, ӱргӱлјиге эт јибезим.