Read Јаҥы Кереес 2 Коринфтегилерге 11 Bible Online

2 Коринфтегилерге 11 - Јаҥы Кереес bible

2 Коринфтегилерге 11

¹Керсӱ эмес болгоныма бир эмеш чыдамкай болгон болзогор кайдат! Је слер меге чыдажып јадыгар.

²Мен слерди Кудайдыҥ кӱнӱркежиле кӱнӱркеп јадым, нениҥ учун дезе слерди бир Кижиле — Христосло кол алыштыргам, Ого ару ла јек јок кысты чылап табыштырайын деп.

³Евала болгоны слерле болор деп коркыйдым. Оны јылан бойыныҥ сӱмезиле тӧгӱндеп койгон. Анайып слердиҥ де санаагар ӱрелип, Христостыҥ Бойында ачык-јарык ла ару болуп артпай барарыгар деп коркыйдым.

⁴Кандый да кижи келип, бис јарлыктабаган ӧскӧ Иисусты јарлыктаганда, ого чыдажып јадыгар. Бистийинеҥ башка ӧскӧ тынды, эмезе ӧскӧ Сӱӱнчилӱ Јарды алып турганыгарда, чыдажып јадыгар.

⁵Мен эҥ улу апостолдордоҥ бир де јӱдек эмезим деп сананып јадым.

⁶Айса болзо, тилим чечен эмес, је менде билгир бар. Мыны слердиҥ алдыгарда ончозында иле кӧргӱстис.

⁷Айса болзо, слерди бийиктедерге, бойымды јабызатканым кинчек пе? Јал албай, слерге Кудайдыҥ Сӱӱнчилӱ Јарын јарлагам.

⁸Слерге јалчы болойын деп, ӧскӧ серкпелердеҥ болуш алып, олорго коромјы эткем.

⁹Слерге келеримде, не-немедеҥ тутакту да јӱрген болзом, кемге де јӱк болбодым. Керектӱ не-немеле Македониядаҥ келген карындаштар болушкан. Мен слерге качан да јӱк болбоско албадангам, мынаҥ да ары албаданарым.

¹⁰Христостыҥ чындыгы мениҥ бойымда: мактанып турганымды Ахаияныҥ талаларында менеҥ кем де айрыбас.

¹¹Нениҥ учун анайып эдип јадым? Слерге карузып турганым учун болор бо? Карузып турганымды Кудай билер. Је эдип јӱргенимди оноҥ ары эдерим.

¹²Бис чилеп эдип турус деп, мактанар шылтак бедиреген улуска шылтак бербезим.

¹³Бу улус — тӧгӱн апостолдор, куурмакчы ишчилер. Олор јӱк ле Христостыҥ апостолдорыныҥ бӱдӱмин алынадылар.

¹⁴Мыны незин кайкаар? Сатана бойы јарыктыҥ ангелиниҥ бӱдӱмин алынат.

¹⁵Анайдарда, оныҥ јалчылары да чынныҥ јалчыларыныҥ бӱдӱмин алынып турган болзо, бого незин кайкаар? Је олордыҥ учы-тӱби эткен керектериле болор.

¹⁶База айдарым: мени керсӱ эмес деп бодобогор. Бодоп турган болзогор, мени керсӱ эмес кижини чилеп кӧрӱп, база эмеш мактанарга беригер.

¹⁷Айдып турганым, Кайраканнаҥ эмес чилеп айдып турганым ол. Је мынайда бӱдӱмјилӱ мактанып, мыны керсӱ эмес кижи чилеп айдадым.

¹⁸Кӧп улус кижиниҥ керектериле мактанып турганы чылап, мен де мактанарым.

¹⁹Слер, керсӱ бойыгар, керсӱ эмес улуска кӱӱнзеп чыдажып јадыгар ине.

²⁰Кандый бир кижи слерди кулданганда, тӱреткенде, слердеҥ алып турганда, алдыгарда јакшыркаганда, јӱзигерге соккондо, чыдажып јадыгар.

²¹Кезик улуска уйатту болзын деп айдарым: бого кӱчис јетпеген. Кем де неле де мактанарга тидинзе, — керсӱ эмес чилеп айдадым, — мен де тидинерим.

²²Олор еврейлер бе? Мен база. Израильдиҥ калыгы ба? Мен база. Авраамныҥ калдыктары ба? Мен база.

²³Христостыҥ јалчылары ба? Јӱӱлгек кижи чилеп айдадым: мен олордоҥ кӧп јалчы болуп иштеп јадым. Олордоҥ кӧп иштеп, јобогом, кӧп тӱрмелеткем, кеминеҥ кӧп соктыргам, кӧп катап ӧлӱмниҥ кырында болгом.

²⁴Иудейлердеҥ беш катап одус тогус камчы алгам,

²⁵ӱч катап чыбыктаткам. Бир катап ташла шыбалаткам, јӱзӱп барадарымда, керептер ӱч катап чӧҥгӧн, арайдаҥ калгам, тӱнди, тӱшти ачык талайда ӧткӱргем.

²⁶Улайын јорыктап јадым, мени јаантайын јеткер сакыйт: сууларда, тонокчылардаҥ, јаҥыс јердиҥ улузынаҥ, ӧскӧ калыктардаҥ, калада, куба чӧлдӧ, талайда, тӧгӱн карындаштар ортодо.

²⁷Јоболтолу иштеп јадым, улайын уйуктабайдым, торолойдым, суузайдым, улайын курсак јибейдим, соокко тоҥодым, кийим јок јӱредим.

²⁸Мыныҥ ончозынаҥ башка, кӱнӱҥ сайын ончо серкпелер керегинде сананып, олорго кичеемел эдип јадым.

²⁹Кем де уйадайт, мен уйадабай јадым эмеш пе? Кем де бӱдӱрилип, јыгылат, ол учун јӱрегим сыстабайт па?

³⁰Мактанар учурлу болзом, чине јогымла мактанарым.

³¹Кудай, Иисус Христос Кайраканыстыҥ Адазы, тӧгӱндебей турганымды билер. Ого ӱргӱлји чакка баш болзын!

³²Дамаскта Арета каанда иштеген башкараачы мени тудуп аларга, каланы каруулдаган. Је мени стенедеги кӧзнӧктӧҥ каламала тӱжӱрип ийгендер. Мен оныҥ колынаҥ уштылгам.