Read Јаҥы Кереес 2 Коринфтегилерге 3 Bible Online

2 Коринфтегилерге 3 - Јаҥы Кереес bible

2 Коринфтегилерге 3

¹Слерле ойто катап таныжары биске керектӱ болды эмеш пе? Кезик улуска чылап, бис керегинде айдылган самаралар слерге керектӱ болды эмеш пе? Ол эмезе андый самараларды слер бичииригер бе?

²Слер бойыгар — бистиҥ самарабыс. Ол бистиҥ јӱректеристе бичилген, оны кажы ла кижи билер, кычырар аргалу.

³Слер — Христостыҥ самаразы деп, бойыгарла кӧргӱзип јадыгар. Ол Кудайга јалчы болуп јӱргенистиҥ шылтузында бичилген, ол чернеле эмес, тирӱ Кудайдыҥ Тыныла, таштыҥ јалбагында[2] эмес, јӱректе бичилген.

⁴Бисте андый бӱдӱмји Христос ажыра Кудайдыҥ алдында бар.

⁵Бойыстаҥ чылап, нени де эдер аргабыс бар деп, бойыбыс сананбайдыс, је бистиҥ аргабыс — Кудайдаҥ.

⁶Ол биске јаҥы кереестиҥ ишчилери болор арга берген. Бу кереес таныктарла эмес, Тынла бичилген. Танык ӧлтӱрет, Тын јӱрӱм берет.

⁷Таштарда чертилген таныктарга јалчыланыш ӧлӱмге экелип турган. Андый да болзо, бу јалчыланыш макла јаркындалып, Израильдиҥ уулдары Моисейдиҥ јӱзине кӧрӱп албай турган, нениҥ учун дезе, јоголып јаткан макла да болзо, оныҥ јӱзи јаркындалган.

⁸Тынга јалчыланыш оноҥ јаан мак экелип турган эмес пе?

⁹Бурулаарына экелип турган Јасакка јалчыланыш макла јаркындалган болзо, анчада ла актаарына экелип турган јалчыланыш бойыныҥ магыла оноҥ чик-јок артыктаар.

¹⁰Эмдиги артыктап турган мактаҥ улам башкыда мактулу болгоны мактулу эмес болуп калат.

¹¹Јоголып јаткан немелер јаркындалып турган болзо, анчада ла јоголбойтон немелер оноҥ тыҥ јаркындалат.

¹²Анайдарда, бисте андый ижемји бар болуп, ачык-јарык айдып јадыбыс.

¹³Бис Моисей чилеп этпейдис. Јоголып јаткан мактыҥ учын Израильдиҥ уулдары кӧрбӧзин деп, ол јӱзин кӧжӧгӧлӧ јапкан.

¹⁴Је олордыҥ сагыжы мокоргон. Олор эртеги кереести кычырганда, бу ок јабынты эмдиге јетире алылбай артат, нениҥ учун дезе ол Христос ажыра алылат.

¹⁵Олор Моисейдиҥ Јасагын кычырып турганда, бу кӧжӧгӧ эмдиге јетире јӱректеринде јатканча.

¹⁶Је кижи Кайраканга баштанып турганда, кӧжӧгӧ алылып јат.

¹⁷Кайракан — ол Тын, Кайраканныҥ Тыны јӱрген јерде — јайым.

¹⁸Ончобыстыҥ јӱстерибис ачык болуп, кӱскӱ чилеп Кайраканныҥ магыныҥ јаркынын кӧргӱзип, Ого тӱҥейлежип, кубуладыс, Оныҥ магыла там ла там јаркындаладыс. Мыны Кайракан эдет, Ол — Тын.