Read Јаҥы Кереес Галаттарга 2 Bible Online

Галаттарга 2 - Јаҥы Кереес bible

Галаттарга 2

¹Оноҥ, он тӧрт јылдыҥ бажында, Варнавала кожо ойто Иерусалим чыккам. Бойымла кожо Титти база алгам.

²Барганым не дезе, меге Кудайдаҥ андый ачылта болгон. Ӧскӧ калыктар ортодо мен јарлап јӱрген Сӱӱнчилӱ Јарды ондогы бӱдӱп турган улуска, анчада ла эҥ тоомјылу деп бодолгон улуска, айдып бергем. Мыныҥ ончозын калас чырмайып эткем бе, эдип турум ба деп билейин дегем.

³Је олор мениле кожо јӱрген Титти де, ол еллин де болзо, томдолзын деп албадабадылар.

⁴Мыны јӱк тӧгӱн карындаштар кӱӱнзеп тургандар. Олор Христос Иисус ажыра алган јайымысты кайып кӧрӧргӧ лӧ бисти кулданарга ортобыска киргендер.

⁵Је бис Сӱӱнчилӱ Јардыҥ чындыгы слерге чеберлелзин деп, олорго эмеш те бакпадыс.

⁶Эҥ тоомјылу улус керегинде айтса, олор не улус, кемдер болгоны меге башказы јок: Кудай улусты ылгабай јат. Бу улус мениҥ Јарыма нени де кошпогондор.

⁷Карын, Петрды еврейлерге чилеп, мени кара јаҥдуларга Сӱӱнчилӱ Јар јарлазын деп, бӱдӱмји эдилгенин кӧргӧндӧр.

⁸Петрды еврейлер ортодо апостол эткени, мени де ӧскӧ калыктар ортодо апостол эткен јок беди.

⁹Меге Кудайдаҥ јакшылык берилгенин кӧрӱп, текши керек эдип јадыс деп, серкпениҥ тайанчыгы деп бодолгон Иаков, Кифа ла Иоанн меге ле Варнавага колын бергендер. Бис ӧскӧ калыктарга, олор еврейлерге барар болуп јӧпсинип,

¹⁰јӱк јоктуларды ундыбай јӱрзин деп сурагандар. Мыны мен кичеенип эдип јӱргем.

¹¹Је Кифа Антиохияга келерде, мен ачыгынча ого удура болгом, нениҥ учун дезе ол буруга калар кылык эткен.

¹²Иаковтоҥ бир кезик улус келердеҥ озо ол иудей эместерле кожо ажанатан. Је байагы улус једип келерде, томдошко јайылган улустаҥ айап, кара јаҥдулардаҥ јана базып, бӧлине берген.

¹³Оныла кожо ӧскӧ дӧ иудейлер экијӱстенген. Варнава база экијӱстенип баштаган.

¹⁴Је бат, олор Сӱӱнчилӱ Јардыҥ чындыгыла этпей турганын кӧрӧлӧ, Кифага ончо улус кӧзинче айткам: «Сен, иудей бойыҥ, иудей чилеп эмес, кара јаҥду чылап јӱрӱп турган болзоҥ, иудейлер чилеп јӱрзин деп, иудей эместерди не албадап тургаҥ?»

¹⁵Бис бӱткен бӱдӱмисле иудейлер, кара јаҥду кинчектӱлер эмезис.

¹⁶Је бис билерис, кижи Јасакты бӱдӱргениле эмес, јаҥыс ла Иисус Христоско бӱткениле акталат. Оныҥ учун Јасакты бӱдӱргенисле эмес, Христоско бӱткенисле акталарга, бис те Христос Иисуска бӱттибис. Јасакты бӱдӱргениле кем де акталып болбос.

¹⁷Је бис Христос ажыра акту болорго јӱткӱп, бойлорыс та кинчектӱ болуп калганысты кӧрзӧбис, Христос кинчек эттирип јат эмеш пе? Јок туру!

¹⁸Јайратканымды орныктырып турган болзом, Јасак бузаачы деп, бойымды кӧргӱзип јадым ине.

¹⁹Јасакка эмес, Кудайга болуп јӱрерге, Јасак ажыра ӧлӱп калгам. Бойымды Христосло кожо кере тарткам.

²⁰Эмди мен јӱрӱп турган эмезим, је мениҥ бойымда Христос јӱрет. Эт-кандуда јӱрӱмимди алза, Кудайдыҥ Уулына бӱткенимле јӱрӱп јадым. Ол меге буурзап јат, мен учун Бойын берген.

²¹Кудайдыҥ јакшылыгын јектеерим бе? Је Јасакла акталгадый болзо, Христос калас ӧлгӧн!