Read Јаҥы Кереес Галаттарга 4 Bible Online

Галаттарга 4 - Јаҥы Кереес bible

Галаттарга 4

¹База айдарым: бала тужы ӧткӧлӧктӧ, энчиленеечи ончозына ээ де болзо, кулдаҥ незиле де аҥыланбайт.

²Је Адазы темдектеп койгон ӧйгӧ јетире ол кичееп кӧрӱп јӱрген кижиге ле айылдыҥ башкараачыларына багат.

³Анайып бис те: бала тужыбыс ӧткӧлӧктӧ, бу телекейди башкараачы јасактардыҥ кулданыжында јӱргенис.

⁴Јасактыҥ бийленижинде јӱргендерди јайымдап, бисти балазынайын деп, темдектелген ӧй једип келерде, ӱй кижидеҥ туулган, Јасактыҥ бийленижинде јӱрген Уулын Кудай биске ийген.

⁶Слер Кудайдыҥ уулдары учун Ол јӱректереерге Уулыныҥ Тынын, «Авва! Ада!» деп кыйгыраачы Тынды, ийген.

⁷Оныҥ учун сен эмди кул эмезиҥ, сен — уулы; уулы болзоҥ, сен — Иисус Христос ажыра Кудайдыҥ энчизин алаачы.

⁸Је Кудайды билбес тужыгарда ар-бӱткендеги кудайлар да эмес немелердиҥ кулдары болгоныгар.

⁹Эмди дезе Кудайды билеригер, чынынча айтса, Кудай слерди билип алган. Андый болзо, бу телекейди башкараачы кӱч јок ло тӱреҥи јасактарга не ойто бурыларга јадыгар, олорго бойыгарды ойто кулданышка берип јадыгар?

¹⁰Чокым кӱндерге, айларга, ӧйлӧргӧ лӧ јылдарга ајару эдедигер.

¹¹Слерге кӱчимди салып, калас иштеген болорым ба деп, слер учун коркып турум.

¹²Слерди јайнап турум, карындаштар, мендий болыгар! Мен де слердий инем. Слер меге бир де јаман этпедигер.

¹³Слерге баштапкы катап Сӱӱнчилӱ Јар јарлаарымда, эди-канымда чине јок болгонын билеригер.

¹⁴Эди-канымныҥ чине јогы слерге ченелте болгон, је онызы слерди јана болдырбады, мени јескиндирбеди. Карын, мени Кудайдыҥ ангелин чилеп, Христос Иисусты чылап уткыдыгар.

¹⁵Ол тушта кандый кежиктӱ болгон эдигер! Бойым керечи болгом: аргалу болзо, кӧстӧригерди кодоро тартып, меге берип ийер эдигер!

¹⁶Эмди не? Слерге чынды айдып, ӧштӱгер боло бердим эмеш пе?

¹⁷Бу улус слерди бойлорына тартып аларга јадылар, је оны јакшыга этпейдилер. Слерди олорго тартылзын деп кӱӱнзеп, бисти айрыштырарга јадылар.

¹⁸Јаҥыс та слерле кожо јӱреримде эмес, је јаантайын быйанду керектерге тартылып турганыгар јакшы.

¹⁹Балдарым! Христоско тӱҥейлешпегенчер, бала таап јаткан ӱй кижи чилеп, слер учун ойто кыйналып јадым!

²⁰Эмди слерде болуп, ӧскӧртӧ куучындажар эдим, нениҥ учун дезе слерле не боло бергенин алаҥ кайкап турум.

²¹Слер, Јасактыҥ бийленижинде јӱрерге кӱӱнзегендер, меге айдыгар: Јасакты аайлап јадыгар ба?

²²Бичилген јок беди: «Авраам эки уулду болгон. Бирӱзи кул ӱй кижидеҥ, экинчизи јайым ӱй кижидеҥ туулган».

²³Је кулдыҥ уулы эт-каннаҥ туулган, јайым кижиниҥ уулы Кудайдыҥ берген сӧзиле туулган.

²⁴Мында бултаартып айтканы бар. Бу эки ӱй кижи эки кереесле тӱҥейлештирилип јат. Бирӱзи — Синай кырда јӧптӧлгӧни, ол — Агарь. Оныҥ балдары кулданышка туулат.

²⁵Агарь, Аравиядагы Синай кыр, эмдиги Иерусалимге келижет, нениҥ учун дезе ол бойыныҥ балдарыла кожо кулданышта.

²⁶Теҥериниҥ Иерусалими — јайым. Ол бистиҥ энебис.

²⁷Бичилген јок беди: «Сӱӱн, барланбаганы, бала таппаганы! Кыйгыр, јырга, бала таап кыйналбаганы, нениҥ учун дезе, јаҥыскан ӱй кижиниҥ балдары айылдузынаҥ кӧп».

²⁸Бис, карындаштар, Исаак ошкожыбыс — берген сӧслӧ туулган балдар.

²⁹Је ол тушта эт-каннаҥ туулганы, тыннаҥ туулганды истегени чилеп, эмди де истеп јат.

³⁰Агару Бичик не дийт? — «Кул ӱй кижи ле оныҥ уулын сӱр, нениҥ учун дезе кулдыҥ уулы јайым кижиниҥ уулыла кожо энчиленбес».

³¹Оныҥ учун, карындаштар, бис кулдыҥ эмес, јайым кижиниҥ балдары!