Read Јаҥы Кереес Филиппыдагыларга 1 Bible Online

Филиппыдагыларга 1 - Јаҥы Кереес bible

Филиппыдагыларга 1

¹Иисус Христостыҥ кулдары Павелдеҥ ле Тимофейдеҥ — Филиппыда јуртаган, Христос Иисустыйы болгон, епископтор ло диакондор башкарган ончо агаруларга.

²Слерге Кудай Адабыстаҥ ла Иисус Христос Кайраканнаҥ јакшылык ла амыр јетсин.

³Кажы ла сайын слерди эске алынгамда, слер учун Кудайымга алкыш-быйан айдадым.

⁴Ончогор учун јаантайын сурап, сӱӱнип мӱргийдим,

⁵нениҥ учун дезе баштапкы кӱннеҥ ала эмдиге јетире Сӱӱнчилӱ Јарды јарлаар керекте мениле кожо туружып јадыгар.

⁶Слердиҥ јӱрегеерде быйанду керек баштаган Кудай оны Иисус Христос келер кӱнге јетире тӱгезип койор деп, мен бӱдӱп јадым.

⁷Ончогор керегинде санааларым андый ла болор учурлу, нениҥ учун дезе слер мениҥ јӱрегимде. Кижендӱ де тужымда, Сӱӱнчилӱ Јарды корып, оныҥ чынын кӧргӱзип те тургамда, меге Кудай берген јакшылыкты алып јадыгар.

⁸Кудай мениҥ керечим, мен слерди сӱрекей сӱӱп јадым, бу сӱӱш Иисус Христостыҥ ӧзӧгинеҥ чыгат.

⁹Чынды билип аларында, не ле сезимде сӱӱжигер там ла там ӧссин. Ченейле, эҥ артыгын талдап алып, Христос келер кӱнде ару, бузук јок болыгар. Кудай макталзын ла алкалзын, Иисус Христостыҥ болужыла јаантайын быйанду керектер эдигер. Бу ончозы учун мен мӱргип турум.

¹²Слерди билзин деп турум, карындаштар: мениле не болгоны Сӱӱнчилӱ Јарды ичкерледерине камаанын јетирген.

¹³Анайып, Христоско болуп кижендӱ јӱргеним каганныҥ ӧргӧӧзиниҥ ончо каруулына ла кӧп ӧскӧ улуска јарлала берген.

¹⁴Мениҥ киженимнеҥ Кайраканныҥ Бойындагы карындаштардыҥ кӧп сабазы кӧдӱриҥи алып, Кудайдыҥ сӧзин там тидим ле јалтанбай јарлыктап баштагандар.

¹⁵Чындап, кезиктери Христосты кӱйӱнип ле сӧс блаажарга кӱӱнзеп јарлыктайдылар, ӧскӧлӧри — быйанды эдерге кӱӱнзеп.

¹⁶Олор кижендӱ јӱргениме ӱзеери ачу-корон кожорго, бойлорын кӧргӱзерге кӱӱнзеп, Христосты акту јӱректеҥ јарлыктабайдылар.

¹⁷Ӧскӧзи Сӱӱнчилӱ Јарды корулаарга тургузылганымды билип, мыны сӱӱп эдип јадылар.

¹⁸Мынаҥ не? Христосты канайып та јарлыктаза, экијӱстенип те, акту јӱректеҥ де јарлыктаза, мен ого до сӱӱнип јадым. Мынаҥ да ары сӱӱнерим,

¹⁹нениҥ учун дезе мынызы слердиҥ мӱргигенеерле, Иисус Христостыҥ Тыныныҥ болужыла меге аргадаш экелерин билерим.

²⁰Мен сакып ла иженип јадым: уйалбазым, карын, ачык-јарык болорым. Эмди де, јаантайын чылап, јӱрӱмим ажыра ба, эмезе ӧлӱмим ажыра ба Христос мениҥ бойымда улуркадылар.

²¹Меге јӱрӱм — ол Христос, ӧлзӧм дӧ кирелтелӱ болорым.

²²Эт-кандуда јӱрӱп, тузалу иш эдип турган болзом, нени талдап аларын билбей турум.

²³Мен эки јандай кыстадып койгом: ӧлӱп, Христосло кожо болор кӱӱним бар, нениҥ учун дезе мынызы чик-јок артык.

²⁴Је эт-кандуда јӱретеним слерге керектӱ.

²⁵Мен чын ла билип јадым: слердиҥ једимигерге ле Кудайга бӱдериндеги сӱӱнчиге болуп ончогорло кожо артып каларым.

²⁶Слерге ойто келзем, Христос Иисусла оморкоор оноҥ кӧп арга берерим.

²⁷Христостыҥ Сӱӱнчилӱ Јарына јарамыкту болуп јӱригер. Келзем, кӧрӧйин деп, эмезе келбезем, угайын деп: Сӱӱнчилӱ Јарга бӱдери учун бирлик кӱӱн-санаалу тартыжып, бир тында турганыгарды,

²⁸слерге удурлашкан улустаҥ бир де јалтанбай јӱргенигерди. Мынызы олорго јайрадуныҥ иле темдеги болор, слерге — аргадаштыҥ. Мыны Кудай эдер.

²⁹Слерге Христоско болуп Ого јаҥыс та бӱдери эмес, је тартыжып, Ол учун кыйналары берилген. Бу тартыжуны ӧдӱп турганымды билеригер, эмди де мен керегинде угадыгар.