Read Јаҥы Кереес Филиппыдагыларга 2 Bible Online

Филиппыдагыларга 2 - Јаҥы Кереес bible

Филиппыдагыларга 2

¹Анайдарда, слерде Христостыҥ Бойында кӧкӱдӱ бар болзо, сӱӱштеҥ токынал бар болзо, Агару Тынла бирлик бар болзо, быйанзыш ла буурзаш бар болзо,

²сӱӱнчимди толо эдигер: шӱӱлтегер јаҥыс, сӱӱжигер јаҥыс болзын, тыныгар јаҥыс, санаагар јаҥыс болзын.

³Сӧс блаажарга кӱӱнзеп эмезе бийиркеп, нени де этпегер, карын, бойыгар керегинде јобош сананып, ӧскӧ улусты бойыгардаҥ бийик деп бодогор.

⁴Кажыгар ла бойындыйын эмес, је кажыгар ла ӧскӧ дӧ улустыйын сананзын.

⁵Слердиҥ шӱӱлтегер Христос Иисустыҥ шӱӱлтезиндий болор учурлу.

⁶Ол, бӱткен бӱдӱмиле Кудай бойы, Кудайга теҥ болорын ууры деп бодобогон.

⁷Је Бойын кем де эмес эдип, кулдыҥ бӱткен бӱдӱмин алынган, улуска тӱҥейленип, бӱдӱмиле кижидий боло берген.

⁸Ӧлӧргӧ, керӱ агашта да ӧлӧргӧ јетире уккур болуп, јобожыдынган.

⁹Оныҥ учун Кудай да Оны бийиктедип, Ого ончо аттардаҥ бийик ат-јол берген.

¹⁰Иисус Христос Ада Кудайдыҥ магына Кайракан болгонын ончо тилдер јарлазын деп, Иисустыҥ ады-јолы алдында ончозы — теҥеридези, јердези, јердиҥ алдындазы тизелензин.

¹²Анайдарда, кару улузым, слерле кожо до, јок то болорымда сӧс уккур болгоныгар. Эмди де, слерле кожо эмес тужымда, оноҥ уккур болыгар; айап ла ширтилдеп, бойыгарды аргадап, ижигерди улалтыгар,

¹³нениҥ учун дезе, Кудай слердиҥ бойыгарда кӱӱн јайап, слерди ууландырып, Бойыныҥ јакшылыкту кӱӱниле эдет.

¹⁴Кинчектӱ ле балыр јӱрӱмдӱ ӱйе ортодо јек јок ло ару болорго, Кудайдыҥ јек јок балдары болорго, нени де этсегер, комыдабай ла эреҥистелбей эдигер. Јӱрӱм берип турган сӧстӧҥ бек тудунып, телекейдеги јарыткыштар чылап јаркындалыгар. Ол тушта темей кичеенбегем ле темей кӧп иштебегем деп, Христос келер кӱнде слерле мактанарым.

¹⁷Је мен слердиҥ тайылгага урулта чылап урулып, слердиҥ бӱдӱп, абыстап јӱргенигерге болужып турган болзом, сӱӱнип јадым, анайда ок ончогорло кожо сӱӱнип јадым.

¹⁸Бого слер де сӱӱнигер, мениле кожо сӱӱнигер.

¹⁹Иисус Кайраканныҥ табы болзо, слерге удабас Тимофейди ийерим деп, иженип турум. Слердиҥ керектеригер кандый болгонын билеле, токынаар эдим.

²⁰Менде Тимофейдеҥ башка, слерге чын килемји эдип турган, мениле јаҥыс шӱӱлтелӱ кижи јок.

²¹Ончо улус Иисус Христостыйын эмес, бойындыйын бедиреп јадылар.

²²Ол дезе Сӱӱнчилӱ Јарга иштеп, уулы адазына болушканы чылап, меге болужып, чындык болгонын кӧргӱскен деп билеригер.

²³Анайдарда, мениле не болорын билип алзам, оны ол ло тарый ийерим деп, иженип турум.

²⁴Бойым да слерге удабас келерим деп, меге Кайракан бӱдӱмји берип јат.

²⁵Слерге Епафродит карындажымды ийер керек деп бодоп турум. Ол мениле кожо иштеп, кожо тартыжу ӧдӱп турган кижи деп билеригер. Ол керексигенимде меге болушсын деп, оны меге слер ийген эдигер.

²⁶Је ол оору деп, слерге табыш једерде, тыҥ санааркап, ончогорды кӧрӧргӧ сӱрекей кӱӱнзеп јат.

²⁷Чындап та, ол ӧлӧрдиҥ бери јанында оору болгон, је Кудай ого буурзаган; јаҥыс та ого эмес, кунугыма кунук кожылбазын деп, меге де буурзаган.

²⁸Оныҥ учун оны ойто кӧрӧлӧ, слерди сӱӱнзин, ас кунугайын деп, тыҥ кӱӱнзеп ийип јадым.

²⁹Анайдарда, оны Кайракан јууткан чылап, сӱӱнип јуудып, андый улусты тооп јӱригер.

³⁰Бойыгар меге јетирип болбогон болушты јетирерге, ол Христостыҥ кереги учун ӧлӱмниҥ кырында, јӱрӱми јеткерде болгон ине.