Read Јаҥы Кереес Колоссыдагыларга серкпеге самаразы 1 Bible Online

Колоссыдагыларга серкпеге самаразы 1 - Јаҥы Кереес bible

Колоссыдагыларга серкпеге самаразы 1

¹Кудайдыҥ табыла Христос Иисустыҥ апостолы Павелдеҥ ле Тимофей карындаштаҥ —

²Колоссыдагы агаруларга, Христостыҥ Бойындагы чындык карындаштарга.

³Слерге Кудай Адабыстаҥ ла Иисус Христос Кайраканнаҥ јакшылык ла амыр јетсин. Слер учун мӱргип, Кудайга, Иисус Христос Кайраканыстыҥ Адазына, јаантайын алкыш-быйан айдадыс,

⁴нениҥ учун дезе Христос Иисуска бӱткенигер ле ончо агаруларга сӱӱжигер керегинде укканыбыс.

⁵Слер бӱдӱп ле сӱӱп јадыгар, нениҥ учун дезе слерге теҥериде не чеберлелген, ого иженедигер. Онызын слер башкыда Сӱӱнчилӱ Јардыҥ чындык сӧзинде укканыгар.

⁶Бу сӧс слердиҥ бойыгарда јӱрӱп, бастыра јер-телекейде чилеп, бойыныҥ ӱренин тууйт. Слер Кудайдыҥ јакшылыгын угуп, оны чындаптаҥ билип алган кӱннеҥ ала бу сӧс слердиҥ де бойыгарда ӧзӱп јат.

⁷Кудайдыҥ јакшылыгы керегинде Епафрастаҥ укканыгар. Ол бистиҥ карузыган, кожо иштеген кижибис, слерге болуп Христостыҥ чындык јалчызы эди.

⁸Ол слерге Тыннаҥ берилген сӱӱш керегинде биске јетирген кижи.

⁹Оныҥ учун бис те, слер керегинде уккан кӱннеҥ ала, слер учун токтобой мӱргип, сурап јадыбыс: слерге Кудай Бойыныҥ табын толо билерге берзин, слерди тынныҥ ойгорлыгыла, оҥдожыла толтырзын;

¹⁰ончозында Кудайга јараарыла эдип, Ого јарамык јӱргейигер, не ле быйанду керекте тӱжӱмдӱ болгойыгар, Кудайды билип аларында ӧзӱп тургайыгар.

¹¹Бого болуп Ол слерди Бойыныҥ улу кӱчине келиштире ончо јандай тыҥытсын, узакка чыдамкай ла турумкай этсин.

¹²Кудайга ла Адага сӱӱнип, алкыш-быйан айдыгар. Ол бисти јарыктыҥ каандыгындагы агарулардыҥ энчизинде туружарга кычырган.

¹³Ол бисти карачкыныҥ бийлежинеҥ јайымдап, Бойыныҥ карузыган Уулыныҥ Каандыгына кӧчӱрген.

¹⁴Оныҥ Уулыныҥ Бойында Оныҥ каныла јайым боло бергенис — кинчектердеҥ јайымдаш алганыс.

¹⁵Ол — кӧрӱнбес Кудайдыҥ сӱр-кебери, Ол — тун туулганы, ончо јайалганныҥ башталганы.

¹⁶Ол ажыра ончозы јайалган: теҥеридези де, јердези де, кӧскӧ илинери де, илинбези де, ширеелер де, башкарулар да, башталгалар да, ӧрӧги јаҥдар да. Ончозы Ол ажыра ла Ого јайалган.

¹⁷Ол ончозынаҥ озо бар болгон, Оныҥ Бойында ончозы бой-бойыла тудушталган.

¹⁸Ол эт-канныҥ — Серкпениҥ Бажы. Ол — башталга, ончозында баштапкы болорго, Ол — тун туулганы, ӧлгӧндӧр ортодо баштапкы тирилгени.

¹⁹Оныҥ Бойында ончозы толо болзын деп, Кудай кӱӱнзеген ине.

²⁰Ол Бойы ажыра, Бойыныҥ керӱ агаштагы каны ажыра амыр јайап, јерде ле теҥериде јӱргендерди ончозын Кудайла јараштырган.

²¹Слер качан да јаман керектеригердеҥ улам Кудайла ортогор ыраган, Оныҥ ӧштӱлери болгоныгар.

²²Эмди дезе Христос Бойыныҥ јердеги эди-каны ажыра, Бойыныҥ ӧлӱми ажыра слерди Кудайла катап јараштырган. Кудайдыҥ алдында слерди агару, јек јок ло буру јок тургузарга, Ол анайда эткен.

²³Је слер бӱдеринде бек болор ло эреҥистелбес учурлу, слерге Сӱӱнчилӱ Јар берген ижемјидеҥ кыйбас учурлу. Бу Јарды слер укканыгар, ол теҥери алдында јӱргендерге ончозына јарлалган, мен, Павел, бу Јардыҥ јалчызы боло бергем.

²⁴Эмди слер учун шыралагамда, сӱӱнип јадым. Эди-канымла шыралап, Христостыҥ шыраларын толтырадым. Мен Оныҥ Эди-Каны деген Серкпе учун шыралайдым.

²⁵Мен Кудайдыҥ умзанганын бӱдӱрейин деп, бу Серкпениҥ јалчызы боло бергем. Кудай Бойыныҥ сӧзин слерге толо јарлазын деп, меге бӱдӱмјилеген.

²⁶Оныҥ сӧзи кӧп чактардыҥ ла ӱйелердиҥ туркунына јажырылган јажыт болгон, эмди дезе Оныҥ агаруларына ачылган.

²⁷Кудай олорго бу јажыттыҥ ончо калыктар ортозындагы мактулу байлыгын ачарга кӱӱнзеген. Бу јажыт — слерге мактулу ижемји берип турган, слердиҥ јӱрегерде јӱрген Христос.

²⁸Бис Оны јарлыктап јадыбыс, кажы ла кижини Христос Иисустыҥ Бойында толо кемине јеткен эдип Кудайдыҥ алдында тургузарга, кажы ла кижини ончо ойгорлыкла ӱредип ле бӱдӱндирип јадыбыс.

²⁹Бого болуп мениҥ бойымда иштеп турган Оныҥ улу кӱчиниҥ шылтузында тартыжып, кӱчимди кысканбай иштеп јадым.