Read Јаҥы Кереес Колоссыдагыларга серкпеге самаразы 3 Bible Online

Колоссыдагыларга серкпеге самаразы 3 - Јаҥы Кереес bible

Колоссыдагыларга серкпеге самаразы 3

¹Анайдарда, Христосло кожо тирилген болзогор, теҥеридезине, Кудайдыҥ оҥ јанында Христос отурган јерге, јӱткигер.

²Теҥеридези керегинде сананыгар, јердези керегинде эмес.

³Слер ӧлӱп калганыгар, эмди слердиҥ јӱрӱмигер Христосло кожо Кудайдыҥ Бойында јабылган.

⁴Христос — слердиҥ јӱрӱмигер, Ол ачылза, слер де Оныла кожо макта ачыларыгар.

⁵Оныҥ учун јердеги бойыгардыҥ эт-каныгарды ӧлтӱригер: балыр јӱретенин, быјарды, кычаны, јаман кӱӱнди, ачыркашты. Ачыркаш — ол чалуга бажырыш.

⁶Бу ончозынаҥ улам Кудайга бакпай турган улуска Оныҥ чугулы келип јат.

⁷Качан да, мындый керектер эдип јӱреригерде, бу улус чылап кылынып јӱрген эдигер.

⁸Эмди дезе, мыны ончозын кедери эдигер: чугулданышты, атыйланышты, ӧчти, керишти, багай куучындарды.

⁹Бой-бойыгарга тӧгӱн неме айтпагар, слер јебрен кижини ончо керектериле кожо бойыгардаҥ алып, таштап койгоныгар.

¹⁰Слер бойыгарга јаҥы кижини кийип алдыгар. Бу јаҥы кижи Кудайды билип, бойыныҥ Јайаачызыныҥ сӱр-кеберине тӱҥейлежип, јаҥырып јат.

¹¹Мында эмди еллин де, иудей де, томдолгоны да, томдолбогоны да, туш кижи де, скиф те, кул да, јайым кижи де јок. Јаҥыс ла Христос бар, Ол — ончозы, Ол — ончозында.

¹²Анайдарда, Кудайдыҥ талдап алгандары, Оныҥ агару ла карузыган улузы чылап, быйанзышты, буурзашты, быйанзак, тӧп, јобош, узакка чыдамкай болорын кийимди чилеп кийип алыгар.

¹³Бой-бойыгарга чыдамкай болыгар, кем кемигерге комыдалду болзо, јаманын таштагар. Христос Кайракан јаманыгарды таштаганы чылап, слер де бой-бойыгардыҥ јаманыгарды таштагар.

¹⁴Мыныҥ ончозыныҥ ӱстине бойыгарга сӱӱшти кийигер, сӱӱш ончозын толо кеминде бириктирет.

¹⁵Јӱректеригерде Кудайдыҥ амыры башкарзын. Слерди Кудай кычырган, амырга болуп бир эт-кан эдип бириктирген ине. Алкыш-быйанду болыгар.

¹⁶Христостыҥ сӧзи ончо байлыгыла слердиҥ бойыгарда јӱрзин. Бой-бойыгарды ончо ойгорлыкла ӱредигер ле бӱдӱндиригер; јӱректеригерде Кайраканга алкыш-быйанду болуп, Ого сарындар, мак јаҥарлар, тыннаҥ берилген јаҥарлар айдыгар.

¹⁷Нени айдып эмезе нени эдип турганыгар, ончозын Иисус Христос Кайраканныҥ адына болуп эдигер, Ол ажыра Ада Кудайга алкыш-быйан айдыгар.

¹⁸Ӱй улус, ӧбӧгӧндӧрӧӧргӧ багыгар. Кайраканныҥ алдында анайда эдери чын болор.

¹⁹Эр улус, ӱйлеригерди сӱӱгер, олорды ачуркандырбагар.

²⁰Балдар, ада-энегерге ончозында сӧсуккур болыгар. Онызы Кайраканга јарап јат.

²¹Адалар, балдарыгарды ачындырбагар, олор санааркабазын.

²²Кулдар, јердеги бийлеригерге ончозында багыгар. Мыны олорго јараарга болуп олордыҥ кӧзинче этпегер, карын, Кудайдаҥ айап, акту јӱректеҥ эдигер.

²³Нени де этсегер, ончозын бастыра кӱӱнигердеҥ эдигер, улуска чылап эмес, Кайраканга чылап эдигер.

²⁴Мыныҥ ордына Кайраканнаҥ энчи алатаныгарды билеригер. Слердиҥ Бийигер — Христос, слер Ого јалчы болуп јадыгар.

²⁵Кем јаманды эдип турган, ордына јаманды алар: Кудай улусты ылгабай јат.