Read Јаҥы Кереес 1 Фессалоникадагыларга 3 Bible Online

1 Фессалоникадагыларга 3 - Јаҥы Кереес bible

1 Фессалоникадагыларга 3

¹Оныҥ учун, мынаҥ ары чыдажып болбой, Афиныда јаҥыс бойлорыс артсабыс торт деп шӱӱп,

²слерге Тимофей карындажысты ийдис. Ол Христостыҥ Сӱӱнчилӱ Јарын јарлыктаарында бисле кожо Кудайга иштеп јӱрӱ. Бис оны бӱдӱмјигерде слерди тыҥытсын ла кӧкӱтсин деп,

³бу кысталаҥда кем де эреҥистелбезин деп ийгенис. Биске анайда темдектелгенин бойыгар билеригер.

⁴Ол до тушта, слерде болорыста, шыралаарыс деп, слерге озолондыра айтканыс. Андый ла болуп калды, оны билеригер.

⁵Оныҥ учун, мынаҥ ары чыдажып болбой, бӱдӱп турганыгар керегинде угуп келзин деп, Тимофейди ийгем. Ченеечи слерди јолдоҥ астыктырар деп, ижибис темей калар деп јалтангам.

⁶Эмди дезе, Тимофей слердеҥ бурылып, бӱдӱп турганыгар ла сӱӱжигер керегинде биске јакшы табыш экелди. Бисти јаантайын јакшылап эске алынып јӱргенигерди, бис слерди чилеп, слер де бисти кӧрӱксип турганыгарды айтты.

⁷Оныҥ учун ончо кату-јоболдо ло кысталаҥда бӱдӱмјигер ажыра кӧкӱдӱ алдыбыс, карындаштар.

⁸Кайраканга чындык болуп артып јӱргенигер учун эмди бис тирӱ.

⁹Слер учун, Кудайыс алдында слердиҥ шылтугарда сӱӱнип јӱрген ончо сӱӱнчибис учун, Ого кандый алкыш јетиргедий эдибис?

¹⁰Слерди кӧрӧргӧ лӧ бӱдӱп турганыгардыҥ јетпезин толтырарга, тӱн-тӱш турумкай мӱргип јадыбыс.

¹¹Ада Кудай Бойы ла Иисус Христос Кайраканыс слер јаар биске јол ачсын.

¹²Слерди дезе Кайракан бой-бойыгарга, ончо улуска сӱӱшле толтырзын, ажыра да толтырзын. Андый ок сӱӱшле бис слерди сӱӱген эмейис.

¹³Анайып, Ол слердиҥ де јӱректеригерди тыҥытсын. Иисус Христос Кайраканыс ончо агаруларыла кожо келзе, Кудайыс ла Адабыс алдында слер јек јок ло агару болороор. Аминь.