Read Јаҥы Кереес 2 Фессалоникадагыларга 2 Bible Online

2 Фессалоникадагыларга 2 - Јаҥы Кереес bible

2 Фессалоникадагыларга 2

¹Карындаштар, Иисус Христос Кайраканыстыҥ келери ле Ол бисти Бойына јууры керегинде айтса, сурап турубыс:

²оп-соп тӱшпегер, тыннаҥ да, сӧстӧҥ дӧ тӱймебегер; бис ийгендий, Христостыҥ кӱни качан ок једип келген деп бичилгендий самарадаҥ да тӱймебегер.

³Слерди кем де канайып та тӧгӱндебезин. Кудайдаҥ јана тӱжӱш болбогончо, кинчектиҥ кижизи, јайраду уулы ачылбаганча, ол кӱн келбес.

⁴Ол ончозына удурлажар, Кудай деп адалганнаҥ эмезе улус неге бажырып турганнаҥ ончозынаҥ бийиктединер. Оноҥ болгой Кудайдыҥ байзыҥында Кудай чылап отурып, бойын Кудай деп јарлаар.

⁵Мен слерде болорымда, мыны слерге айдып јӱргеним санаагарга кирбейт пе?

⁶Ого бойыныҥ ӧйинде ачыларын не тудуп турганын эмди билип јадыгар.

⁷Јарамастыҥ јажыды качан ок иштеп јат, је озо баштап эмди тудуп турганы кедери алылар учурлу.

⁸Ол тушта јарамастузы ачылар. Оны Иисус Кайракан Бойыныҥ тыныжыла ӧлтӱрер, Бойыныҥ келгениниҥ ачылганыла јоголтор.

⁹Јарамастузыныҥ келери — ол сатананыҥ ижи. Ол тӧгӱн ончо кӱчле, билдилерле, кайкалдарла келер;

¹⁰јайрадылып јаткандарды не ле деп тӧгӱндеп, чындык эмеске экелер. Олор аргадалайын деп, чынныҥ сӱӱжин бойына алынбаганы учун јайрадылып јадылар.

¹¹Олор тӧгӱнге бӱтсин деп, чындыкка бӱтпеген, је тӧгӱннеҥ соот тапкан ончо улус јаргылалсын деп, Кудай олорго азыштыҥ кӱчин ийер.

¹³Кайракан слерге карузып јат, карындаштар. Бис дезе слер учун Кудайга јаантайын алкыш јетирер учурлу. Ол слерди Тынла агаруланып ла чындыкка бӱдӱп аргадалзын деп, бажынаҥ ала талдап алган.

¹⁴Иисус Христос Кайраканыстыҥ магына слерди јединзин деп, Ол бис јарлыктаган Сӱӱнчилӱ Јар ажыра слерди бого кычырган.

¹⁵Анайдарда, карындаштар, бек болыгар, сӧслӧ эмезе самарабысла слерге табыштырып берген ӱредӱдеҥ тудуныгар.

¹⁶Биске карузыган, Бойыныҥ јакшылыгыла мӧҥкӱлик токынал ла јакшылыкту ижемји берген Иисус Христос Кайраканыс Бойы, Кудайыс ла Адабыс

¹⁷јӱректеригерди токынатсын, слерди ончо быйанду керекте ле сӧстӧ тыҥытсын.