Read Јаҥы Кереес 1 Тимофейге 3 Bible Online

1 Тимофейге 3 - Јаҥы Кереес bible

1 Тимофейге 3

¹Чын айдылган сӧс: епископтыҥ ижине јӱткиген кижи јакшы иш кӱӱнзеп јат.

²Је епископ јек јок, бир ӱйлӱ, эрӱӱл, кӧгӱстӱ, ак санаалу, кӱндӱзек болор, ӱредип билер учурлу;

³аракызак эмес, кырмакчы, кимиренчек эмес болор, акча-јӧӧжӧгӧ ачыркабас, карын, јымжак, амырды сӱӱр, акчага ӱстӱкпес учурлу;

⁴акту бойыныҥ айлы-јуртын јакшы башкарар, бала-барказын сӧсуккурда тудар, олорго тоомјылу болор учурлу.

⁵Акту бойыныҥ айлы-јуртын башкарып билбес кижи Кудайдыҥ Серкпезин канайып кичеер?

⁶Сайыркап, кӧрмӧслӧ кожо јаргыга кирбезин деп, ол Кудайга јуукта јаҥы баштанган улустаҥ эмес болор учурлу.

⁷Ол анайда ок тил-ооско илинбеске ле кӧрмӧстиҥ чакпызына тӱшпеске, тыш улустаҥ јакшы керелӱ болор учурлу.

⁸Диакондор анайда ок јарамыкту улус болор учурлу: экитилденбес, аракыга тартылбас, уйатту астам бедиребес,

⁹бӱдериниҥ јажыдын ару санаада чеберлеер.

¹⁰Андый улус озо ченелзин, оноҥ, јек јок болзо, иштезин.

¹¹Анайда ок ӱй де улус јарамыкту, копчы эмес, эрӱӱл, ончозында чындык болор учурлу.

¹²Диакон бир ӱйлӱ болор, бала-барказын ла айлы-јуртын јакшы башкарар учурлу.

¹³Не дезе јакшы иштегени јакшы айалгага, Христос Иисуска бӱдеринде ачык-јарык болорына једет.

¹⁴Удабастаҥ сеге келерим деп, иженип турум.

¹⁵Саадап калзам, Кудайдыҥ туразында бойын канайда тудунатанын сени билзин деп, мыны бичип турум. Оныҥ туразы — тирӱ Кудайдыҥ Серкпези, чындыктыҥ баганазы ла тӧзи.

¹⁶Кудайга беринериниҥ јажыды кӧп керелелген: Кудай эт-канду келген, Тынныҥ Бойында акталган, ангелдерге кӧрӱлген, калыктарда јарлыкталган, телекейдиҥ улузы ортодо бӱткени ажыра јарадылган, макта кӧдӱрилген.