Read Јаҥы Кереес 1 Тимофейге 6 Bible Online

1 Тимофейге 6 - Јаҥы Кереес bible

1 Тимофейге 6

¹Кудайдыҥ ады ла ӱредӱзи јамандалбазын деп, базынчыкта јӱрген кулдар бийлерин јаантайын кӱндӱӱге турар эдип тоор учурлу.

²Бӱдӱп турган бийлерлӱ кулдар бийлерин немеге бодобой калбазын, олор — карындаштар. Карын, олорго там кичеенип иштезин, нениҥ учун дезе олор бӱдет, олорго Кудай карузыйт, бойлорын быйанду керектерге учурлагандар. Бого ӱредип, бӱдӱмјиле.

³Ӧскӧ ӱредӱ таркадып, Иисус Христос Кайраканыстыҥ чын сӧзиле, Кудайга беринери керегинде ӱредӱле јӧпсинбей турган кижи

⁴сайыркап јат, нени де билбес, сӧс блаашпаганча ла блаажып-тартышпаганча јӱрӱп болбой јат. Мынаҥ улам кӱйӱниш, ӧӧн-бӧкӧн, јамандаш, јаман серениш,

⁵куру сӧс блаажыш болуп јат. Андый керектерде санаазы кемжик, чындыкты јектеген улус туружып, Кудайга беринери ол байыыр арга деп сананып јадылар. Андый улустаҥ кыйыжып тур.

⁶Је улу байлык — Кудайга беринип, не барыла болорзынып јӱрери.

⁷Бис телекейге нени де экелбегенис, бу телекейдеҥ нени де чыгарып болбозыс јарт.

⁸Курсакту ла кийимдӱ болзобыс, мыныла болорзынып јӱрели.

⁹Байыырга сананган улус дезе ченелтеге кирип, чакпыга тӱжӱп, эш-кереги јок ло каршулу кӧп кычага алдырып јадылар; онызы улуска јаман ла ӧлӱм экелет.

¹⁰Ончо јаманныҥ тазылы — акчага ӱстӱгери. Кезик улус ого беринип, бӱдӱп јӱреринеҥ астыгып, бойлорына бойы кӧп кыйын-шыра экелгендер.

¹¹Сен дезе, Кудайдыҥ кижизи, мынаҥ кыйыш, акту болорго, Кудайга беринерине, бӱдӱп јӱрерине, сӱӱшке, чыдамкай, јобош болорына јӱтки;

¹²бӱдӱп јӱрериниҥ быйанду тартыжузын ӧткӱр, ӱргӱлји јӱрӱмнеҥ тудун. Сен Кудайга чындык болгоныҥды кӧп улус алдында керелеген инеҥ.

¹³Ончозына јӱрӱм береечи Кудайдыҥ алдында ла Понтий Пилат кӧзинче Кудайга чындык болгонын керелеген Христос Иисус алдында сени кычырып турум:

¹⁴Иисус Христос Кайраканыс ачыларына јетире јакылтаны ару ла јек јок бӱдӱр.

¹⁵Мыны бойыныҥ ӧйинде алкышту ла сок јаҥыс Башчы, каандардыҥ Кааны, кайракандардыҥ Кайраканы ачар.

¹⁶Јаҥыс Ол ӧлбӧс; Ол кем де кирип болбос јарыкта јӱрет. Оны улустыҥ кемизи де кӧрбӧгӧн, кӧрӱп те болбос. Ого ӱргӱлјиге кӱндӱӱ ле кӱч! Аминь.

¹⁷Эмдиги чактыҥ байларына кычыру эт, бойлоры керегинде бийик сананбазын, чындык эмес байлыкка иженбезин, тирӱ Кудайга ижензин. Ол, јакшысынзын деп, биске ончозын элбеде берип јат.

¹⁸Олор јакшыны этсин, быйанду керектерле байызын, неме кысканбазын, ӧскӧ улусла ӱлежерге кӱӱнзезин;

¹⁹ӱргӱлји јӱрӱм аларга, келер ӧйдиҥ јакшы тӧзӧгӧзи болгон байлыкты бойлорына јӧӧзин.

²⁰Э-э, Тимофей! Сеге берилгенди чеберле, тӧгӱн билгирдеҥ, Кудайга јарабас куру эрмек-куучыннаҥ ла туза јок блааш-тартыштаҥ кыйыжып јӱр.

²¹Оны јарлыктап, кезик улус бӱдӱп јӱреринеҥ јана болгон. Сениле јакшылык болзын. Аминь.