Read Јаҥы Кереес 2 Тимофейге 1 Bible Online

2 Тимофейге 1 - Јаҥы Кереес bible

2 Тимофейге 1

¹Менеҥ, Кудайдыҥ табыла Христос Иисустыҥ Павел апостолынаҥ. Мен Христос Иисустагы јӱрӱм керегинде Кудайдыҥ сӧзиле тудулгам.

²Тимофейге, карузыган уулга. Сеге Ада Кудайдаҥ ла Христос Иисус Кайраканыстаҥ јакшылык, быйан ла амыр јетсин.

³Ада-ӧбӧкӧлӧрим чилеп ару санаамла бажырып турган Кудайга алкыш-быйаным. Тӱни-тӱжи мӱргип, сени улайын эске алынып јадым.

⁴Кӧзиҥниҥ јажын эске алынып, сӱӱнчиле толорго, сени кӧрӱксип турум.

⁵Экијӱстенбей бӱдӱп јӱргениҥди эске алынып јадым: анайда башкыда Лоида јаанаҥ ла Евника энеҥ бӱткен эдилер. Олордыҥ бӱткени сениҥ бойыҥда да јӱрӱ деп, бӱдӱп јадым.

⁶Оныҥ учун сеге кол салып, алкаарымда, Кудайдаҥ берилген јайалтаны бойыҥда ӧскӱр деп, эске алындырып турум.

⁷Кудай биске коркыйтанныҥ тынын эмес, кӱчтиҥ, сӱӱштиҥ ле бойын тудунарыныҥ тынын берген.

⁸Оныҥ учун Иисус Христос Кайраканыстыҥ керечизи болорго уйалба, Ол учун кижендеткен менеҥ де уйалба. Карын, Кудайдыҥ кӱчиле Христостыҥ Сӱӱнчилӱ Јары учун мениле кожо кыйнал.

⁹Ол бисти аргадап, агару кычырула, эткен керектерисле эмес, Бойыныҥ темдектеп койгоныла кычырган. Ӧйлӧр башталардаҥ озо биске Христос Иисус ажыра берген јакшылыгыла кычырган.

¹⁰Эмди дезе јакшылыкты Аргадаачыбыс Христос Иисустыҥ ачылганы ажыра кӧрӱнер эткен. Ол ӧлӱмди јоголтып, Сӱӱнчилӱ Јар ажыра јӱрӱмди ле мӧҥкӱлик болорын иле эткен.

¹¹Мен бу Јар учун ӧскӧ калыктарга јарлыктаачы, апостол ло ӱредӱчи болуп тургузылгам.

¹²Мынаҥ улам шыралап турум. Је уйалбай јадым, нениҥ учун дезе кемге бӱдӱп турганымды билерим; меге ижемјилегенди Ол айдылган кӱнге јетире чеберлеер аргалузына бӱдӱп јадым.

¹³Христос Иисустыҥ Бойында бӱдӱп ле карузып, менеҥ уккан кемжикпеген сӧстӧрди тем эдип ал.

¹⁴Сеге ижемјилеген јакшыны бойыбыста јӱрген Агару Тынла чеберле.

¹⁵Асияныҥ ончо улузы менеҥ туура баштанганын билериҥ, олордыҥ тоозында Фигелл ле Ермоген.

¹⁶Меге кӧп катап коот берип, кижендӱ болгонымнаҥ уйалбаган учун Онисифор-эштиҥ улузына Кайраканнаҥ быйан јетсин.

¹⁷Карын, Римде болордо, мени кичеенип бедиреп, таап алган.

¹⁸Кайракан ого ол кӱнде Кудайдыҥ быйанын ийзин. Ол меге Ефесте канайда болушканын ончозынаҥ артык билериҥ.