Read Јаҥы Кереес 2 Тимофейге 4 Bible Online

2 Тимофейге 4 - Јаҥы Кереес bible

2 Тимофейге 4

¹Кудайдыҥ алдында ла Бойыныҥ кӧрӱнериле, Бойыныҥ Каандыгыла тирӱ ле ӧлгӧн улусты јаргылаар Иисус Христос Кайраканыстыҥ алдында јайнап сурап турум:

²сӧсти јарлыкта, ӧйинде ле ӧйинде эмес турумкай болуп, илезине чыгар, јастыраларды кӧргӱзе айт, бӱдӱмјиле. Анайда ок јаантайын чыдамкай болуп ӱрет.

³Улус кемжикпеген ӱредӱни угарга кӱӱнзебес ӧй келер. Олор кулак сӱӱндирсин деп, бойлорыныҥ кӱӱниле ӱредӱчилер јуур;

⁴кулагыла чындыкты укпай, улус сананып тапкан куучындарга баштанар.

⁵Је сен ончозында ойгу-эрӱӱл бол, кыйын-шырага чыдаш, Сӱӱнчилӱ Јар јарлаачыныҥ керегин — бойыҥныҥ ижиҥди бӱдӱр.

⁶Мен бастыра бойымды тагылга салдым, баратан ӧйим једип келди.

⁷Јакшы тартыштым, јарышты тӱгестим, бӱдӱп јӱретенин чеберлеп алдым.

⁸Эмди меге актуныҥ кайралы белетелген. Оны меге Кайракан, чындык Јаргычы, ол кӱнде берер; јаҥыс та меге эмес, Оныҥ ачыларын сӱӱп сакыган ончо улуска берер.

⁹Меге капшай келерге кӱјӱрен,

¹⁰нениҥ учун дезе Димас эмдиги телекейди сӱӱп, менеҥ јӱре берген. Ол Фессалоника јаар атанган, Крискент — Галатия јаар, Тит — Далматия јаар. Мениле кожо јаҥыс Лука артты.

¹¹Маркты алганча кел. Ол мениҥ ижиме керек.

¹²Тихикти Ефес јаар ийдим.

¹³Келзеҥ, Троадада Карп-эште артырып койгон капталымды ла бичиктерди, анчада ла тере бичиктерди экел.

¹⁴Темир сулачы Александр меге кӧп јаманын јетирген. Кайракан ого эткен керектериле јандыра бергей.

¹⁵Сен де оноҥ ајарынып јӱр, ол сӧзибиске тыҥ удурлашкан болгон.

¹⁶Баштапкы катап јаргыныҥ алдында туруп коруланарымда, мениле кожо кем де болбогон, менеҥ ончозы јӱре берген. Мынызы олорго удура болбозын!

¹⁷Мен ажыра јарлыкташ бӱтсин деп, оны ончо калыктар уксын деп, Кайракан мениҥ јаныма туруп, меге кӱч берген. Анайып арсланныҥ оозынаҥ айрылгам.

¹⁸Кайракан мени кандый ла јаман керектеҥ айрып, Бойыныҥ Теҥеридеги Каандыгына аргадаар. Ого ӱргӱлји чакка мак. Аминь.

¹⁹Прискиллага ла Акилага, Онисифор-эштиҥ улузына эзен айт.

²⁰Ераст Коринфте артып калды. Трофим оорып јат, оны Милетте артырып койгом.

²¹Кыш тӱшкелекте келерге кӱјӱрен. Еввул, Пуд, Лин, Клавдия ла ончо карындаштар сеге эзен айттырып турулар.

²²Кайракан Иисус Христос тыныҥла кожо. Јакшылык слерле кожо. Аминь.