Read Јаҥы Кереес Еврейлерге 2 Bible Online

Еврейлерге 2 - Јаҥы Кереес bible

Еврейлерге 2

¹Оныҥ учун бис уккан немебистеҥ анчада ла бек тудунар учурлу. Оноҥ башка бисти агын туура апарар.

²Ангелдер ажыра јарлалган сӧс бек болгон, улус кажы ла јазыгы, уккур эмези учун чын кезедӱ алган.

³Андый болгондо, баштап ла Кайракан бойы јарлаган мындый улу аргадашты јектеп турган болзобыс, кезедӱ албай канайып кыйыжарыс? Бу аргадаш керегинде уккан улус ол чын деп, биске лаптаган.

⁴Кудай бойы да керелеп, билдилер, кайкалдар јайап, јӱзӱн-јӱӱр кайкамчылу кӱчтер кӧргӱзип, Агару Тынды улуска Бойыныҥ табыла берген.

⁵Кудай бис айдып турган келер ӧйдиҥ орчылаҥын ангелдерге бактырбаган ине.

⁶Је кем де Агару Бичиктиҥ бир јеринде керелеп, айткан: «Кижи дегениҥ ол не, оны сананып јӱрерге? Эмезе кижи уулы дегениҥ ол не, ого кичеемел эдерге?

⁷Оны ангелдердеҥ кыска ӧйгӧ јабыс эттиҥ. Ого мактыҥ ла кӱндӱниҥ кайралын берип, оны Ол јайаганнаҥ бийик эттиҥ,

⁸оныҥ буды алдына ончозын бактырдыҥ». Кудай кижиге ончозын бактырып, ого бакпаган неме артырбаган. Је эмди ого ончозы бакты деп, эм тура кӧрбӧйдис.

⁹Је бис Иисусты кӧрӧдис. Ол ангелдердеҥ кыска ӧйгӧ јабыс эдилген. Эмди Ого мактыҥ ла кӱндӱниҥ кайралы берилген, нениҥ учун дезе Ол ӧлӱмниҥ кыйынын ӧткӧн. Анайып Ол Кудайдыҥ јакшылыгыла ончо улус учун ӧлгӧн.

¹⁰Кудайдыҥ анайда эдери чын болгон. Ончозы Оныйы ине, ончозы Ол ажыра бар болуп јӱрӱп јат. Анайып Ол кӧп уулдарын макка экелейин деп, аргадаш берип турган Башчыны кыйналыштар ажыра толо кемдӱ эткен.

¹¹Агарулап турганы ла агарулалып тургандары ончозы бир Ададаҥ ине. Оныҥ учун Иисус олорды карындаштар деп адаарга уйалбай,

¹²айдат: «Ады-јолыҥды карындаштарыма јарлаарым, серкпе ортодо Сени мактап сарнаарым».

¹³База: «Мен Ого бӱдӱмји саларым». База: «Бат Мен ле Меге Кудай берген балдар».

¹⁴Бу балдар эттеҥ ле каннаҥ болгон учун, Иисус та олор чылап эттеҥ ле каннаҥ кижи боло берген. Ӧлӱмди бийлеген кӧрмӧсти Бойыныҥ ӧлӱми ажыра јоголтойын деп,

¹⁵ӧлӱмнеҥ коркып, бастыра јӱрӱмине кулданышта јӱргендерди јайымдайын деп, Ол анайда эткен.

¹⁶Јарт эмей, Ол Бойына ангелдерди эмес, Авраамныҥ калдыктарын јуудып јат.

¹⁷Оныҥ учун Ол ончозында карындаштарга тӱҥейлежер учурлу болгон. Анайып Ол Кудайдыҥ алдында буурзак ла чындык Улу абыс боло берип, калыктыҥ кинчектери учун Ого јарайтан тайылга эдер аргалу болгон.

¹⁸Ол Бойы кыйналып, бу ажыра ченеткен учун ченедип турган улуска болужар аргалу.