Read Јаҥы Кереес Петрдыҥ 1-кы самаразы 3 Bible Online

Петрдыҥ 1-кы самаразы 3 - Јаҥы Кереес bible

Петрдыҥ 1-кы самаразы 3

¹Анайда ок слер де, ӱй улус, ӧбӧгӧндӧрӧӧргӧ сӧсуккур болыгар. Кудайдыҥ сӧзин угар кӱӱни јок эр улус ару ла айап јӱрген јӱрӱмигерди кӧрӧлӧ, ӱйлериниҥ јӱрӱми ажыра Кудайга сӧс јокко баштанзын деп, анайда эдигер.

³Кееркемјигер тыш јаны болбозын, чач ӧргӧни, алтын кийим эмезе кийимдеги јазал болбозын.

⁴Карын, кееркемјигер ич бойыгар болзын. Бу јобош ло токуналду тынныҥ чалдыкпас јаражы болуп јат. Мынызы Кудайдыҥ алдында баалу.

⁵Анайып, башкыда Кудайга иженген агару ӱй улус та ӧбӧгӧндӧрине сӧсуккур болуп, кееркединген эдилер.

⁶Анайып, Сарра Авраамды бий деп адап, ого сӧсуккур јӱрген. Јакшыны эдип, недеҥ де коркыбай ла тӱймебей турган болзогор, Сарраныҥ балдары болгоныгар ол.

⁷Анайда ок слер де, эр улус, ӱйлереерге керсӱ болыгар, олорды бортык айакты чылап алып јӱригер. Олорго кӱндӱ эдип јӱригер, нениҥ учун дезе олор слерле кожо јакшылыкту јӱрӱмди энчиленер. Слердиҥ мӱргӱгерге буудак болбозын деп, анайда эдигер.

⁸Адакыда, ончогордыҥ санаагар јаҥыс болзын, килежип јӱригер, карындаштарды сӱӱгер, јымжак јӱректӱ, најылык, улуркабас санаалу болыгар;

⁹јаманныҥ ордына јаман этпегер, айткылаштыҥ ордына айткылабагар, карын, алкышты энчиленерге кычырылганыгарды билип, алкагар.

¹⁰«Јӱрӱмди сӱӱп, јакшы кӱндерди кӧрӧр кӱӱндӱ кижи јаман, тӧгӱн сӧстӧр айтпай, тил-оозын тудунзын.

¹¹Ол јаманнаҥ кыйышсын, јакшыны этсин, амырды бедиреп, ого јӱткӱзин.

¹²Кайракан актуларга кӧрӱп јат, олордыҥ јайнуузын угуп јат, је Кайракан јаман эдеечи улуска удура олорды јер ӱстинеҥ јоголторго».

¹³Јакшыга јӱткӱп турган болзогор, слерге кем јаман эдер?

¹⁴Је чындык учун шыралап та јӱрген болзогор, слер кежиктӱ. Слерге јаман эдерге турган улустаҥ коркыбагар, тӱймебегер.

¹⁵Јӱректеригерде Христос Кайракан агару болзын; ижемјигер керегинде слердеҥ јартамал некеп турган не ле кижиге каруу берерге јаантайын белен болыгар.

¹⁶Је мыны јымжак кӱӱндӱ, айап ла тооп эдигер, санаагар ару болзын. Ол тушта Христостыҥ Бойындагы јакшы јӱрӱмеерди јамандап турган улус уйатка калар.

¹⁷Кудайдыҥ табы болзо, јаман керектер учун шыралаганча, јакшы керектер учун шыралаганы артык ине.

¹⁸Христос то бисти Кудайга экелерге, кинчектер учун, акту бойы, акту эместер учун бир катап ӱргӱлјиге ӧлгӧн. Ол эт-канла ӧлтӱрилген, тынла — тирилген.

¹⁹Бу тын ажыра ок таамыдагы кижендӱ сӱнелерге келип јарлыктаган.

²⁰Олор Нойдыҥ кӱндеринде Кудайга бакпаган улус болгон. Кудай олорды ковчег тудулганча узак чыдажып сакыган. Ковчегте јӱк сегис кижи чайыктаҥ аргадалган.

²¹Анайып, слерди де эмди креске тӱжери аргадайт. Креске тӱжери — ол эт-канныҥ кирин јунары эмес, је ару санаала Кудайга баштанары, ол Христостыҥ тирилгени ажыра аргадайт.

²²Ол теҥериге кӧдӱрилип, Кудайдыҥ оҥ јанында јӱрет, Ого ангелдер, ӧрӧги јаҥдар ла кӱчтер баккандар.