Read Јаҥы Кереес Иоанныҥ 1-кы самаразы 2 Bible Online

Иоанныҥ 1-кы самаразы 2 - Јаҥы Кереес bible

Иоанныҥ 1-кы самаразы 2

¹Балдарым! Слерди кинчек этпезин деп, мыны слерге бичип турум. Је кем кинчек эткен болзо, бисте Акту Иисус Христос бар. Ол Ада алдында бис учун сурап јат.

²Ол Бойы — бистиҥ кинчектерис учун, јаҥыс та бистийи эмес, бастыра телекейдиҥ улузыныҥ да кинчектери учун Кудайла јараштыраачы болот.

³Оны билип алганысты Оныҥ јакылталарын чеберлеп јӱргенистеҥ кӧрӧдис.

⁴«Оны билип алгам» деп айдып, јакылталарын чеберлебей турган кижи — тӧгӱнчи, оныҥ бойында чындык јок.

⁵Оныҥ сӧзин бӱдӱрип турган кижиниҥ бойында чын ла Кудайдыҥ сӱӱжи толо кемине јеткен. Бис Оныла бирлик деп, мынаҥ биледис.

⁶Оныҥ Бойында јӱрӱп јадым дегени, Ол чылап эдер учурлу.

⁷Кару улузым! Слерге јаҥы эмес, слерде бажынаҥ ала бар болгон јебрен јакылтаны бичип турум. Ол слерге бажынаҥ ала берилген. Бу јебрен јакылта — слер уккан сӧс.

⁸Је ол ло ӧйдӧ Оныҥ Бойында ла слердиҥ бойыгарда чыны не болгоны керегинде слерге јаҥы јакылта бичип турум, нениҥ учун дезе караҥуй ӧдӱп јат, чын јарык качан ок јарыдып јат.

⁹Бойын јарыкта деп айдып, карындажын јаман кӧргӧни, эмдиге јетире караҥуйда.

¹⁰Карындажын сӱӱп турганы, јарыкта јӱрет, оныҥ бойында бӱдӱрилер буудак јок.

¹¹Карындажын јаман кӧргӧни — карачкыда, ол карачкыда базып јӱрет, кайдаар барып јатканын билбейт, нениҥ учун дезе карачкы оныҥ кӧзин сокорткон.

¹²Слерге бичип турум, балдар, нениҥ учун дезе Ого болуп кинчектеригер ташталган.

¹³Слерге бичип турум, адалар, нениҥ учун дезе бажынаҥ ала Бар Болгонды билип алдыгар. Слерге бичип турум, јииттер, нениҥ учун дезе слер јаманды јеҥдигер.

¹⁴Слерге бичидим, балдар, нениҥ учун дезе слер Аданы билип алдыгар. Слерге бичидим, адалар, нениҥ учун дезе слер Башталганы јокты билип алдыгар. Слерге бичидим, јииттер, нениҥ учун дезе слер кӱчтӱ, Кудайдыҥ сӧзи бойыгарда јӱрет, слер јаманды јеҥдигер.

¹⁵Телекейдиҥ јӱрӱмин, телекейде бар немени де сӱӱбегер. Телекейдиҥ јӱрӱмин сӱӱп турган кижиниҥ бойында Аданыҥ сӱӱжи јок,

¹⁶нениҥ учун дезе телекейде бары ончозы: эт-кан кычазы, кӧс кычазы, јадын-јӱрӱмде оморкойтоны Аданаҥ эмес, телекейдеҥ келип јат.

¹⁷Телекейдиҥ јӱрӱми де ӧдӱп јат, оныҥ кычазы база, Кудайдыҥ табын бӱдӱрип турганы — ӱргӱлјиге јӱрет.

¹⁸Балдар! Калганчы ӧй. Антихрист келип јат деп укканыгар. Эмди кӧп антихристтер табылды. Мынаҥ калганчы ӧй деп биледис.

¹⁹Олор бистеҥ чыккан, је бистийи болбогон. Бистийи болгон болзо, бисле кожо артар эди. Је олор чыгып барган, мынаҥ ончозы бистийи эмес деп ачылган.

²⁰Слер Агарудаҥ майлаш алганыгар, ончозын билеригер.

²¹Слерге чындыкты билбегенигер учун бичиген эмезим, карын, слер оны билер учун, кандый да тӧгӱн чындыктаҥ болор аргазы јогын билип турганыгар учун бичидим.

²²Кем тӧгӱнчи? Иисус ол Христос болгонын јаратпай турганы. Ол — Аданы ла Уулды јаратпай турган антихрист.

²³Уулды јаратпай турган не ле кижиде Ада да јок. Уулды јарадаачыда Ада да бар.

²⁴Бажынаҥ ала уккан немегер слердиҥ бойыгарда јӱргей. Бажынаҥ ала уккан немегер слердиҥ бойыгарда јӱрзе, слер де Уулда ла Адада јӱреригер.

²⁵Оныҥ биске берер болгоны — ол ӱргӱлји јӱрӱм.

²⁶Мыны слерди астырып турган улус керегинде слерге бичидим.

²⁷Оныҥ Бойынаҥ слер алган майлаш дезе слердиҥ бойыгарда јӱрет. Слерди кижи ӱредери слерге керек јок. Је шак бу майлаш слерди ончого ӱредип турган учун ла ол чын болгоны, тӧгӱн эмес учун, слерди ол канайда ӱреткен, ондо болуп јӱригер.

²⁸Анайдарда, балдар, Оныҥ Бойында болуп јӱригер. Ол келзе, бисте бӱдӱмји болор, Оныҥ келген кӱнинде Оныҥ алдында уйатка тӱшпезис.

²⁹Ол акту деп билер болзогор, чынды эдеечи не ле кижи Оныҥ Бойынаҥ туулганын билигер.