Read Јаҥы Кереес Иоанныҥ 1-кы самаразы 4 Bible Online

Иоанныҥ 1-кы самаразы 4 - Јаҥы Кереес bible

Иоанныҥ 1-кы самаразы 4

¹Кару улузым! Болгон-тушкан тынга бӱтпегер, је тындарды ченегер, олор Кудайдаҥ ба деп, нениҥ учун дезе телекейге кӧп тӧгӱн јарлыкчылар чыккан.

²Кудайдыҥ Тынын мынайда билип аларыгар: эт-канла келген Иисус Христосты јарадып турган кандый ла тын — Кудайдаҥ.

³Эт-канду келген Иисус Христосты јаратпай турган кандый ла тын — Кудайдаҥ эмес, ол антихристтиҥ тыны. Слер бу антихристти келип јат деп укканыгар, эмди ол качан ок телекейде.

⁴Слер Кудайдаҥ, балдар, олорды јеҥдигер, нениҥ учун дезе слердиҥ бойыгарда Јӱреечи, телекейде јӱргеннеҥ јаан.

⁵Олор телекейдеҥ, оныҥ учун телекейлеп айдат, телекей олорды угат.

⁶Бис Кудайдаҥ: Кудайды билери бисти угат, Кудайдаҥ эмези бисти укпайт. Мынаҥ бис чындыктыҥ тынын ла азыштыҥ тынын таныйдыс.

⁷Кару улузым! Бой-бойыбысты сӱӱйли, нениҥ учун дезе сӱӱш — Кудайдаҥ. Сӱӱп турган кажы ла кижи Кудайдаҥ туулган, ол Кудайды билер.

⁸Сӱӱбей турганы, Кудайды билип албаган, нениҥ учун дезе Кудай — ол сӱӱш.

⁹Ол ажыра бисти јӱрӱм алзын деп, Кудай телекейге Бойыныҥ сок јаҥыс Уулын ийген. Мынызыла Кудайдыҥ сӱӱжи бистиҥ бойыбыста ачылган.

¹⁰Сӱӱш дезе, Кудайды бис сӱӱгенисте эмес, је Ол бисти сӱӱп, бистиҥ кинчектерис учун јараштыраачы эдип Бойыныҥ Уулын ийгенинде.

¹¹Кару улузым! Кудай бисти анайда сӱӱп турган болзо, бис те бой-бойыбысты сӱӱр учурлу.

¹²Кудайды кем де качан да кӧрбӧгӧн, је бис бой-бойыбысты сӱӱп јӱрген болзобыс, Кудай бистиҥ бойыбыста јӱрет, Оныҥ сӱӱжи бистиҥ бойыбыста толо кемине јеткен.

¹³Бис Оныҥ Бойында, Ол бистиҥ бойыбыста јӱрӱп турганын билип јадыбыс, нениҥ учун дезе Ол биске Бойыныҥ Тынынаҥ берген.

¹⁴Ада Уулын телекейдиҥ улузыныҥ Аргадаачызы эдип ийгенин бис кӧргӧнис, оны керелеп турубыс.

¹⁵Иисус — ол Кудайдыҥ Уулы деп јарадып турган кижиниҥ бойында Кудай јӱрет, ол Кудайдыҥ Бойында.

¹⁶Кудайдыҥ биске сӱӱжин билип алганыс, ого бӱткенис. Кудай — ол сӱӱш, сӱӱштиҥ бойында јӱреечи, Кудайдыҥ Бойында јӱрет, Кудай оныҥ бойында.

¹⁷Бу ажыра сӱӱш бистиҥ бойыбыста бӱткен. Јаргыныҥ кӱнинде бӱдӱмјилӱ болорыс, нениҥ учун дезе Ол кандый, бу телекейде бис те андый.

¹⁸Сӱӱште коркыш јок, је толо сӱӱш коркышты чыгара сӱрӱп јат, нениҥ учун дезе коркыш кезедишле колбулу. Коркып турган кижи сӱӱште толо кемине јетпес.

¹⁹Бис Оны сӱӱрис, нениҥ учун дезе Ол бисти озо сӱӱген.

²⁰«Мен Кудайды сӱӱп јадым» деп айдып, бойыныҥ карындажын јаман кӧрӱп турган кижи — тӧгӱнчи. Кӧрӱп турган карындажына карузыбазы, кӧрбӧй турган Кудайды сӱӱп болбос.

²¹Мындый јакылтаны Оноҥ алганыс: Кудайды сӱӱп јӱргени, бойыныҥ карындажына да карузып јӱрзин.