Read Јаҥы Кереес Ачылта 11 Bible Online

Ачылта 11 - Јаҥы Кереес bible

Ачылта 11

¹Меге кемјийтен будакка тӱҥей тайак берилип, айдылган: — Тур, Кудайдыҥ байзыҥын ла тагылды, ондо бажырып турган улусты кемји.

²Байзыҥныҥ тыш кӱрентигин дезе тоодоҥ чыгарып, кемјибе, нениҥ учун дезе ол кара јаҥдуларга берилген: олор агару каланы тӧртӧн эки ай тепсеер.

³Эки керечиме јаҥ берерим, олор кату тӱктеҥ эткен кийим кийип, Кудайдыҥ табын 1260 кӱн јарлаар.

⁴Бу керечилер — јердиҥ Кайраканы алдында турган эки май-агаш ла эки јарыткыш.

⁵Олорго кижи каршу јетирейин дезе, олордыҥ оосторынаҥ от чыгып, ӧштӱлерин јуда салар. Олорго кижи каршу јетирейин дезе, ол анайып ӧлтӱртер.

⁶Кудайдыҥ табын јарлаган кӱндерде јерге јаҥмыр јаабазын деп, олордо теҥерини бӧктӧӧр јаҥ бар. Анайда ок, кӱӱни тутса, сууларды кан эдип кубултар, кандый ла тӱбекле јерге согулта эдер јаҥы бар.

⁷Олор керелеп тӱгессе, алыс јердеҥ чыгып јаткан аҥ олорго удура јуулажып, олорды јеҥип, ӧлтӱрип койор.

⁸Сӧӧктӧри Содом ло Египет деп тыннаҥ адалган улу каланыҥ оромында, Кайраканыс кере тартылган јерде јадар.

⁹Калыктардаҥ, ӱйелердеҥ, тилдердеҥ ле уктардаҥ улус олордыҥ сӧӧктӧрин ӱч јарым кӱн кӧрӧр, сӧӧктӧрин сӧӧк салар јерге јуудырбас.

¹⁰Јерде јуртаган улус бого сӱӱнип, јыргаар, бой-бойына сыйлар ийер, нениҥ учун дезе бу эки јарлыкчы јерде јуртаган улусты кыйнаган.

¹¹Је ӱч јарым кӱнниҥ бажында јарлыкчыларга Кудайдаҥ јӱрӱмниҥ тыны кирип, экилези бутка турган. Олорды кӧргӧн улуска улу коркыш болгон.

¹²Эки јарлыкчы «Бери чыгыгар!» — деп, теҥеридеҥ айткан тыҥ ӱнди угуп ийгендер. Олор булутла теҥериге чыккандар, ӧштӱлери олорды кӧрӱп тургандар.

¹³Ол ло тарый улу-јаан јерсилкиниш болгон, каланыҥ онынчы ӱлӱзи келип тӱшкен. Јерсилкиништеҥ јети муҥ кижи ӧлгӧн, арткан улус сӱрекей коркып, Теҥери Кудайына алкыжын јетирген.

¹⁴Экинчи ачу-корон ӧдӧ берген. Бат, ӱчинчи ачу-корон јылгыр келип јат.

¹⁵Јетинчи ангел амыргылаган. Теҥериде мынайда айткан тыҥ ӱндер болгон: — Телекейдиҥ Каандыгы Кайраканыстыҥ ла Оныҥ Христозыныҥ Каандыгы боло берди. Ол ӱргӱлји чакка башкарар!

¹⁶Ширеелеринде Кудайдыҥ алдында отурган јирме тӧрт башчы кӧҥкӧрӧ јыгылып, Кудайга бажырып,

¹⁷айткандар: — Бойыҥныҥ улу кӱчиҥди алып, каан боло бергениҥ учун, Сеге, бар, болгон ло келип јаткан Кайраканга, кӱчтӱдеҥ кӱчтӱ Кудайга, баш болзын!

¹⁸Калыктар чугулданган, Сениҥ де чугулыҥ келди. Ӧлгӧндӧрди јаргылаар, кулдарыҥды, јарлыкчыларыҥды, агаруларды, Сенеҥ айагандарды, кичӱлерди ле улуларды кайралдаар, јерди кырып тургандарды кырар ӧй келди.

¹⁹Кудайдыҥ теҥеридеги байзыҥы ачылып, байзыҥныҥ ичинде Оныҥ кереезиниҥ ковчеги кӧрӱнип келген. Јалкындар јалтылдап, ӱндер угулып, кӱкӱрттер кӱркӱреп, јер силкинип, улу-јаан мӧндӱр тӱшкен.