Read Јаҥы Кереес Ачылта 12 Bible Online

Ачылта 12 - Јаҥы Кереес bible

Ачылта 12

¹Теҥериде улу билди кӧрӱнип келген — кӱн кийген ӱй кижи. Оныҥ бут алдында ай, бажында он эки јылдысту ӧрӱмел.

²Ол барлу болгон, бала таап, оорудаҥ ла кыйыннаҥ кыйгырып турган.

³Теҥериде ӧскӧ билди кӧрӱнип келген: бат, јети башту ла он мӱӱстӱ јаан от-кызыл јелбеген. Баштарында јети кӱрее.

⁴Куйругы теҥеридеҥ јылдыстардыҥ ӱчинчи ӱлӱзин јалмай согуп, јерге таштаган. Бу јелбеген бала табар ӱй кижиниҥ алдына туруп алган, балазын тапса, јуда саларга.

⁵Ӱй кижи ончо калыктарды темир тайакла кабырар эр киндиктӱ бала тапкан. Балазын оноҥ ала койып, Кудайга ла Оныҥ ширеезине апарып салгандар.

⁶Ӱй кижи дезе ого Кудай белетеп койгон ээн јерге кача берген. Анда оны 1260 кӱнниҥ туркунына кичеейтен болгон.

⁷Теҥериде јуу башталган: Михаил ле оныҥ ангелдери јелбегенге удура јуулашкан. Јелбеген ле оныҥ ангелдери олорго удура јуулашкан.

⁸Је јелбеген баштагандар јеҥдирткен, олорго теҥериде јер табылбаган.

⁹Кӧрмӧс лӧ сатана деп адалаачы, бастыра телекейди мекелеечи јаан јелбеген, јебрен јылан, тӧмӧн ташталган. Ол јерге ташталган, ангелдери кожо ташталгандар.

¹⁰Теҥериде айткан тыҥ ӱнди угуп ийгем: — Эмди Кудайыстыҥ аргадажы, кӱчи ле каандыгы, Оныҥ Христозыныҥ јаҥы једип келди, нениҥ учун дезе карындаштарысты коптоочы, олорды Кудайыс алдында тӱни-тӱжи коптоочы ташталган.

¹¹Карындаштарыс оны Кураанныҥ каныла, бойыныҥ керезиниҥ сӧзиле јеҥгендер, бойлорыныҥ јӱрӱмин ӧлӧргӧ дӧ јетире сӱӱбегендер.

¹²Оныҥ учун јыргагар, теҥерилер ле олордо јуртагандар! Јерге ле талайга ачу-корон! Слерге кӧрмӧс тӱшкен. Ол ӧйи ас болгонын билип, тыҥ атыйланып калган.

¹³Јелбеген јерге таштатканын кӧрӧлӧ, эр киндиктӱ бала тапкан ӱй кижини истеп баштаган.

¹⁴Ӱй кижиге ээн јерге бойыныҥ јерине учсын деп, јаан мӱркӱттиҥ эки канады берилген. Анда оны јыланныҥ ыраагында ӧйдиҥ, ӧйлӧрдиҥ ле јарым ӧйдиҥ туркунына кичеейтен болгон.

¹⁵Суу агыза берзин деп, јылан бойыныҥ оозынаҥ ӱй кижиниҥ кийнинеҥ агын суу божодып ийген.

¹⁶Је јер ӱй кижиге болужып, оозын ачып, јелбегенниҥ оозынаҥ чыккан сууны јудуп ийген.

¹⁷Јелбеген ӱй кижиге чугулданып, оныҥ арткан ач-ӱрениле — Кудайдыҥ јакылталарын бӱдӱрип тургандарла, бойлорында Иисус Христостыҥ керези бар болгондорло јуулажарга барган.