Read Јаҥы Кереес Ачылта 19 Bible Online

Ачылта 19 - Јаҥы Кереес bible

Ачылта 19

¹Мыныҥ кийнинде теҥериде кӧп тӱмен улустыҥ ӱни ошкош тыҥ ӱнди угуп ийгем: — Аллилуия! Аргадаш, мак ла кӱч — Кудайыстыйы,

²нениҥ учун дезе Оныҥ јаргылары чын ла чындык. Ол јерди бойыныҥ балырыла быјарсыткан улу балыр ӱй кижини јаргылаган, Бойыныҥ кулдарыныҥ каны учун ӧч алган.

³Олор такып айткандар: — Аллилуия! Оныҥ ыжы ӱргӱлји чакка кӧдӱрилет.

⁴Јирме тӧрт башчы ла тӧрт тынду кӧҥкӧрӧ тӱжӱп, ширееде отурган Кудайга бажырып, — Аминь! Аллилуия! — дегендер.

⁵Ширеедеҥ мынайда айткан ӱн чыккан: — Кудайысты мактагар, Оныҥ ончо кулдары, Оноҥ айап јӱргендер, кичӱлер ле улулар!

⁶Кӧп улустыҥ ӱниндий, кӧп суулардыҥ ла јаан кӱкӱрттиҥ табыжындый неме угуп ийгем, олор айдыжып тургандар: — Аллилуия! Кайракан, кӱчтӱдеҥ кӱчтӱ Кудайыс, каанныҥ ширеезине отурды!

⁷Сӱӱнип јыргайлы, Ого мак јетирели, нениҥ учун дезе Кураанныҥ тойы једип келген, Оныҥ сыргалјызы бойын белетеп алган.

⁸Ого кеен, ару ла јарык кӱдели кийим кийерге берилген. Кеен кӱдели кийим агарулардыҥ чындык керектери болуп јат.

⁹Ангел меге айткан: — Бичи: «Кураанныҥ ажын јиирине айттырылганы кежиктӱ». Меге база айткан: — Бу сӧстӧр — Кудайдыҥ чын сӧстӧри.

¹⁰Мен ангелге бажырарга, оныҥ будыныҥ јанына кӧҥкӧрӧ тӱшкем. Је ол меге айткан: — Јок, онойтпо. Мен сеге ле Иисустыҥ керези бар карындаштарыҥа андый ла кул. Кудайга бажыр! Иисустыҥ керези — судурлаштыҥ тыны.

¹¹Ачык теҥерини ле ак атка Мингенди кӧрӱп ийгем. Оны Чындык ла Чын деп адап јадылар, Ол чындык јаргылап ла јуулажып јат.

¹²Оныҥ кӧстӧри — от јалбыжындый, бажында кӧп кӱреелер. Анда бичилген ат бар, Оныҥ Бойынаҥ башка, оны кем де билбес.

¹³Ол канла шиҥилген кийим кийген. Оныҥ ады-јолы — Кудайдыҥ Сӧзи.

¹⁴Оныҥ кийнинеҥ ак аттарлу, кеен, ак ла ару кӱдели кийимдӱ теҥериниҥ черӱлери барып јат.

¹⁵Калыктарды јеҥерге, оозынаҥ курч кылыш чыгып јат. Ол калыктарды темир тайакла кабырат, кӱчтӱдеҥ кӱчтӱ Кудайдыҥ атыйланыжыныҥ ла чугулыныҥ сыксырузын Бойы тепсейт.

¹⁶Кийиминде ле јалмажында ат бичилген: каандардыҥ Кааны, кайракандардыҥ Кайраканы.

¹⁷Кӱнде турган бир ангелди кӧрӱп ийгем. Ол теҥериде учуп бараткан ончо куштарга тыҥ ӱнденип кыйгырган: — Бери учыгар, Кудайдыҥ улу курсагын јиирге јуулыгар!

¹⁸Слер каандардыҥ эдин, муҥ черӱ башчыларыныҥ эдин, кӱчтӱлердиҥ эдин, аттардыҥ ла олорго минген улустыҥ эдин, ончозыныҥ, — јайымда јӱргендердиҥ де, кулдардыҥ да, кичӱлердиҥ де, улулардыҥ да эдин јииригер.

¹⁹Аҥды, јердеги каандарды ла олордыҥ черӱлерин кӧрӱп ийгем. Олор атка Мингенге, Оныҥ черӱлерине удура јуулажарга јуулгандар.

²⁰Аҥ олјого алылган, оныла кожо оныҥ алдына билдилер јайаган тӧгӱн јарлыкчы. Ол билдилер јайап, аҥныҥ таҥмазын алынган ла оныҥ сӱрине бажырган улусты аскырган. Олор экилези кӱкӱрле кӱйген отту кӧлгӧ тирӱге ташталган.

²¹Арткандары атка Мингенниҥ оозынаҥ чыгаачы кылыштаҥ ӧлгӧн. Ончо куштар олордыҥ эдин јип тойгон.