Read Јаҥы Кереес Ачылта 21 Bible Online

Ачылта 21 - Јаҥы Кереес bible

Ачылта 21

¹Јаҥы теҥерини ле јаҥы јерди кӧрӱп ийгем. Башкы теҥери ле башкы јер кеде јӱре бергендер, талай да јок болгон.

²Мен, Иоанн, теҥеридеги Кудайдаҥ тӱжӱп јаткан агару каланы, јаҥы Иерусалимди, кӧрӱп ийгем. Ол эш-нӧкӧрине болуп кееркединген сыргалјыдый белетелген.

³Теҥеридеҥ айткан тыҥ ӱнди угуп ийгем: — Бат, Кудайдыҥ чадыры улусла кожо, Ол олорло кожо јӱрер. Олор Оныҥ калыгы болор, Ол Бойы олордыҥ Кудайы болор.

⁴Олордыҥ кӧзинеҥ ончо јашты арчыыр. Ӧлӱм де, ачу-корон до, сыгыт та, јобол до база болбос, нениҥ учун дезе башкызы јӱре берген.

⁵Ширееде Отурганы айткан: — Бат, ончозын јаҥы эдип јайап јадым! Оноҥ айткан: — Бичи, бу сӧстӧр чындык ла чын.

⁶Оноҥ меге: — Бӱтти! — деген. — Мен — Альфа ла Омега, Бажы ла Учы. Суузап турганга јӱрӱмниҥ суузынаҥ тегинге берерим.

⁷Јеҥип турганы ончозын энчиленер. Мен ого Кудайы болорым, ол Меге уулым болор.

⁸Коркынчактардыҥ, чындык эместердиҥ, быјарсыгандардыҥ, ӧлтӱреечилердиҥ, балыр кылынып јӱргендердиҥ, тармачылардыҥ, чалуга бажыраачылардыҥ ла ончо тӧгӱнчилердиҥ јери — отло, кӱкӱрле кӱйген кӧлдӧ. Бу — экинчи ӧлӱм.

⁹Калганчы јети кату-јоболло толо јети айакту јети ангелдиҥ бирӱзи келип, меге айткан: — Кел, сыргалјыны, Кураанныҥ эжин, кӧргӱзейин.

¹⁰Ол мени Тынга алдыртып, јаан ла бийик кырга чыгарала, теҥеридеги Кудайдаҥ тӱжӱп јаткан улу каланы, агару Иерусалимди кӧргӱскен.

¹¹Ол Кудайдыҥ магыла јаркындалган. Оныҥ јаркыны сӱрекей баалу таштыҥ, кристаллдый ару яспис таштыҥ јаркынындый.

¹²Ол јаан ла бийик стенелӱ, он эки каалгалу. Каалгаларда он эки ангел турат. Анда Израильдиҥ калыгыныҥ он эки угыныҥ ады-јолдоры бичилген.

¹³Ӱч каалга кӱнчыгыштаҥ болгон, ӱчӱзи — тӱндӱктеҥ, ӱчӱзи — тӱштӱктеҥ, ӱчӱзи — кӱнбадыштаҥ.

¹⁴Каланыҥ стенези он эки тӧстӱ. Олордо Кураанныҥ он эки апостолыныҥ ады-јолдоры бичилген.

¹⁵Меге айтканы каланы, оныҥ каалгаларын ла стенезин кемјийтен алтын тайакту болгон.

¹⁶Кала тӧрт булуҥду, оныҥ узуны тууразындый ок. Ол каланы тайакла кемјиирде, он эки муҥ стадия[5] болгон. Узуны, тууразы ла бийиги тӱҥей.

¹⁷Стенезин кемјиген. Кижиниҥ кемјӱзиле колдыҥ јӱс тӧртӧн тӧрт карызы[6] болгон. Бу ангелдиҥ кемјӱзи.

¹⁸Стене яспистеҥ тудулган, кала бойы — ару шилдий ару алтын.

¹⁹Каланыҥ стенезиниҥ тӧстӧри јӱзӱн-јӱӱр баалу-чуулу таштарла кееледилген: баштапкы тӧс — яспис, экинчизи — сапфир, ӱчинчизи — халкидон, тӧртинчизи — смарагд,

²⁰бежинчизи — сардоникс, алтынчызы — сардолик, јетинчизи — хризолит, сегизинчизи — берилл, тогузынчызы — топаз, онынчызы — хризопраз, он биринчизи — гиацинт, он экинчизи — аметист.

²¹Он эки каалга — он эки эрјине: кажы ла каалга бир эрјинедеҥ эдилген. Каланыҥ оромы — јалтыраган шилдий ару алтын.

²²Калада байзыҥ кӧрбӧгӧм, нениҥ учун дезе оныҥ байзыҥы — кӱчтӱдеҥ кӱчтӱ Кудай Кайракан ла Кураан.

²³Калага јарыдар кӱн де, ай да керек јок, оны Кудайдыҥ магы јарыткан, оныҥ јарыткыжы — Кураан.

²⁴Аргадалган калыктар оныҥ јарыгында базып јӱрер, јердеги каандар ого бойыныҥ магын ла кӱндӱӱзин экелер.

²⁵Каланыҥ каалгалары тӱште јабылбас, тӱн де ондо болбос.

²⁶Ого калыктардыҥ магын ла кӱндӱзин экелгилеер.

²⁷Ого бир де быјар неме, јескинчилӱ кылынып, тӧгӱнденип јӱрген бир де кижи кирбес, јӱк ле Кураандагы јӱрӱмниҥ тӱрбегинде бичилгени кирер.