Read Јаҥы Кереес Ачылта 22 Bible Online

Ачылта 22 - Јаҥы Кереес bible

Ачылта 22

¹Ангел меге јӱрӱмниҥ ару суузыныҥ агынын кӧргӱскен. Ол кристаллдый ару болгон, Кудайдыҥ ла Кураанныҥ ширеезинеҥ агып чыккан.

²Каланыҥ оромыныҥ орто тужында, сууныҥ ол јанында ла бу јанында јӱрӱмниҥ агажы ӧскӧн. Ол ай сайын, јылына он эки катап тӱжӱм берип турган. Оныҥ јалбрактары калыктарды эмдеерге берилген.

³Калада каргышка калганы база болбос. Анда Кудайдыҥ ла Кураанныҥ ширеези болор, Оныҥ кулдары Ого бажырып јӱрер.

⁴Олор Оныҥ Бойын кӧрӧр, олордыҥ маҥдайында Оныҥ ады бичилер.

⁵Анда тӱн база болбос, олорго јарыткыш та, кӱнниҥ јарыгы да керек јок болор, нениҥ учун дезе олорго Кудай Кайракан јарыдар. Олор ӱргӱлји чакка башкарар.

⁶Ангел меге айткан: — Бу сӧстӧр чындык ла чын. Удабастаҥ не болотонын Бойыныҥ кулдарына кӧргӱзерге, агару јарлыкчылардыҥ тыныныҥ Кудай Кайраканы Бойыныҥ ангелин ийген.

⁷Бат, удабастаҥ келерим! Бу тӱрбектиҥ судур сӧстӧрин чеберлеп јӱрген кижи кежиктӱ.

⁸Мен, Иоанн, мыны уктым, кӧрдим. Мен угала, кӧрӧлӧ, меге мыны кӧргӱзип турган ангелге бажырарга, оныҥ бут алдына кӧҥкӧрӧ тӱшкем.

⁹Је ол меге айткан: — Јок, онойтпо. Мен сендий ле јарлыкчы карындаштарыҥдый, бу тӱрбектиҥ сӧстӧрин чеберлеп јӱрген улустый ок кул. Кудайга бажыр.

¹⁰Меге база айткан: — Бу тӱрбектиҥ судур сӧстӧрине таҥма баспа, нениҥ учун дезе ӧй јууктап келген.

¹¹Чын эмести эткени база да чын эмести эткей, быјары база да быјартынгай, актузы база да актуны эткей, агарузы база да агарулангай.

¹²Бат, удабастаҥ келерим! Кайралымды кожо экелип, кажы ла кижиге эткен кереги аайынча берерим.

¹³Мен — Альфа ла Омега, Баштапкызы ла Калганчызы, Бажы ла Учы.

¹⁴Оныҥ јакылталарын бӱдӱрип јӱргендери — кежиктӱ. Олор јӱрӱмниҥ агажынаҥ алып јиир, калага каалгала кирер.

¹⁵Тыштында артары — ийттер ле тармачылар, балыр јӱрӱмдӱлер ле ӧлтӱреечилер, чалуга бажыраачылар, тӧгӱнди сӱӱчи ле тӧгӱндеп турган кандый ла улус.

¹⁶Мен, Иисус, Бойымныҥ ангелимди ийгем. Ол мыны слерге серкпелерде керелеер. Мен — Давидтиҥ тазылы ла калдыгы, јаркынду таҥ чолмон.

¹⁷Тын ла Сыргалјы: «Кел!» — дейдилер. Угуп турганы: «Кел!» — дегей. Суузаганы келгей, кӱӱни бары јӱрӱмниҥ суузын тегинге алгай.

¹⁸Бу тӱрбектиҥ судур сӧстӧрин угуп турган кажы ла кижиге керелеп турум: ол сӧстӧргӧ неме кошкон кижиге Кудай бу тӱрбекте бичилген кату-јоболды кожор.

¹⁹Бу судур тӱрбектиҥ сӧстӧринеҥ нени алып барза, Кудай јӱрӱмниҥ бичигинеҥ, агару каладаҥ ла бу тӱрбекте бичилгенинеҥ оныҥ ӱлӱзин алып барар.

²⁰Мыны керелеечи айдат: — Эйе, удабастаҥ келерим! Аминь. Кел, Иисус Кайракан!

²¹Иисус Христос Кайраканыстыҥ јакшылыгы ончогорло болгой. Аминь.