Read Јаҥы Кереес Ачылта 3 Bible Online

Ачылта 3 - Јаҥы Кереес bible

Ачылта 3

¹База Сардистеги серкпениҥ ангелине бичи: Бойында Кудайдыҥ јети тыны ла јети јылдыс бары мынайда айдат: «Эдип јӱрген керектериҥди билерим. Сен тирӱ болгоҥдый ат аданып јӱредиҥ, је сен ӧлӱп калгаҥ.

²Ойгу бол, сенде арткан-калганды, ӧлӱп те јаткан болзо, тыҥыт. Эдип јӱрген керектериҥ Кудайым алдында чындаптаҥ јакшы болгонын кӧрбӧй турум.

³Оныҥ учун нени алганыҥды ла нени укканыҥды эске ал, чеберлеп, кинчегиҥ алын. Ойгу болбозоҥ, уурчы чылап келерим, сеге кандый ӧйдӧ келеримди билбезиҥ.

⁴Је сенде Сардисте кийимин быјарсытпаган бир канча кижи бар. Мениле кожо ак кийимдӱ базып јӱргӱлеер, нениҥ учун дезе олор бого јарамык.

⁵Јеҥип турганы ак кийим кийер. Оныҥ ады-јолын јӱрӱм тӱрбегинеҥ кырбазым, Адам алдында ла Оныҥ ангелдери алдында оныҥ адын јарлаарым.

⁶Тын серкпелерге нени айдып турганын кулакту кижи уксын».

⁷База Филадельфиядагы серкпениҥ ангелине бичи: Агару, Чындык дегени, ачса, кем де јаап болбос, јапса, кем де ачып болбос Давидтиҥ тӱлкӱӱри бары мынайда айдат:

⁸«Эдип јӱрген керектериҥди билерим. Бат, сениҥ алдыҥда эжикти ачтым, оны кем де јаап болбойт. Сениҥ кӱчиҥ ас, је Мениҥ сӧзимди чеберлеп, Мениҥ адымла аданарынаҥ јана тӱшпегеҥ.

⁹Бат, сеге сатананыҥ јуунынаҥ бир кезик улусты ийип јадым. Олор бойлорын иудейлер дейдилер, је олор иудейлер эмес, тӧгӱндеп јат. Бат, Мен келип, олорды сениҥ будыҥныҥ алдына бажыртарым. Ол тушта Мен сеге карузып турганымды билип алгылаар.

¹⁰Мениҥ айтканымла чыдамкай болгоҥ. Оныҥ учун ченелте ӧйинеҥ Мен де сени чеберлеп аларым. Ол ӧй јерде јуртагандарды ченеерге, бастыра телекейге келер.

¹¹Удабастаҥ келерим. Кайралыҥды кижи албазын деп, не барыҥды бек тут.

¹²Јеҥип турганды Кудайымныҥ байзыҥында бакана эдерим, ол оноҥ база чыкпас. Ого Кудайымныҥ адын, Кудайымныҥ калазыныҥ — Кудайымнаҥ теҥеридеҥ тӱжӱп јаткан Иерусалимниҥ адын ла Мениҥ јаҥы адымды бичиирим.

¹³Тын серкпелерге нени айдып турганын кулакту кижи уксын».

¹⁴База Лаодикиядагы серкпениҥ ангелине бичи: Аминь дегени — чындык ла чын керечи, Кудай јайаганныҥ баштамызы мынайда айдат:

¹⁵«Эдип јӱрген керектериҥди билерим. Сен соок то, изӱ де эмезиҥ. Э-э, сен соок эмезе изӱ болгон болзоҥ!

¹⁶Је сен јылузымак, изӱ де, соок то эмес болорыҥда, сени оозымнаҥ кустырып ийерим.

¹⁷Сен айдадыҥ: „Мен бай, байыгам, немедеҥ тутабай јадым“. Је сен бойыҥды кежик јок, ич ачыыр, тӱреҥи, сокор ло јылаҥаш деп билбейдиҥ.

¹⁸Сеге јӧп берип турум: байыырга, Менеҥ отло аруталган алтын садып ал, кийип аларга ла уйатту јылаҥажыҥ кӧрӱнбезин деп, ак кийим садып ал, кӧрӧргӧ, кӧзиҥди сӱркӱшле сӱртӱп ал.

¹⁹Карузып турган улузымныҥ кинчектерин ачып, кезедедим. Анайдарда, кичееҥкей бол, кинчегиҥ алын.

²⁰Бат, эжик јанында туруп, токылдадып јадым. Ӱнимди угуп, эжигин ачкан кижиге кирип, оныла кожо ажанарым, ол до Мениле кожо ажанар.

²¹Јеҥип турганды Мениле кожо ширееме отургузарым. Мен де јеҥип, Адамла кожо Оныҥ ширеезине отурып алгам.

²²Тын серкпелерге нени айдып турганын кулакту кижи уксын».