Read Јаҥы Кереес Ачылта 6 Bible Online

Ачылта 6 - Јаҥы Кереес bible

Ачылта 6

¹Кураан јети таҥманыҥ бирӱзин алып ийгенин кӧргӧм, тӧрт тындуныҥ бирӱзи кӱкӱрттиҥ ӱни ошкош ӱнле: «Келип, кӧр!» — дегенин уккам.

²Мен ак атты кӧрӱп ийгем. Атка мингени саадакту болгон, ого кайрал берилген. Ол јеҥӱчил чилеп, јеҥерге чыккан.

³Кураан экинчи таҥманы алып ийерде, экинчи тынду: «Кел, кӧр!» — дегенин уккам.

⁴От-кызыл ӧҥдӱ ӧскӧ ат чыгып келген. Атка мингенге јердеҥ амырды алзын, улус бой-бойын ӧлтӱришсин деп, јӧп берилген. Ого јаан кылыш берилген.

⁵Кураан ӱчинчи таҥманы алып ийерде, ӱчинчи тынду: «Кел, кӧр!» — дегенин уккам. Мен кара атты кӧрӱп ийгем. Атка мингенниҥ колында — беске.

⁶Мен тӧрт тындуныҥ ортозынаҥ чыккан ӱндий немени угуп ийгем: «Хиникс[1] буудайды динарийге, ӱч хиникс арбаны динарийге. Је оливаныҥ майын ла виноградтыҥ аракызын ӱребе».

⁷Кураан тӧртинчи таҥманы алып ийерде, тӧртинчи тынду: «Келип, кӧр!» — дегенин уккам.

⁸Је бат, мен куба атты кӧрӱп ийгем. Атка мингенниҥ ады-јолы Ӧлӱм болгон. Оныҥ кийнинеҥ Таамы барып јаткан. Ого јердиҥ тӧртинчи ӱлӱзин башкарар, улусты кылышла, тороло, оору-јоболло, јерлик аҥдарла ӧлтӱрер јаҥ берилген.

⁹Кураан бежинчи таҥманы алып ийерде, тагылдыҥ алды тужында јӱрген јулаларды кӧргӧм. Бу јулалар Кудайдыҥ сӧзи учун, бойлорындагы кере учун ӧлтӱрилген улустыйы болгон.

¹⁰Олор тыҥ ӱнденип кыйгырыжып тургандар: — Э-э, агару ла чын Каан, јерде јӱрген улусты тӧгӱлген каныбыс учун јаргылап, ӧч аларга јетире канча кире ӧй арткан?

¹¹Олордыҥ кажызына ла ак кийим берилген. Олор ок чылап ӧлтӱртетен кожо иштегендери ле карындаштары тооны толтырганча, база ас ӧйгӧ сакызын деп, олорго айдылган.

¹²Кураан алтынчы таҥманы алып ийгенин кӧргӧм. Је бат, улу-јаан јерсилкиниш болгон, кату тӱктеҥ эткен кийим чилеп кӱн карара берген, ай кандый боло берген;

¹³смоква агаш тыҥ салкынга силкидип, бышкалак кат-јиилектерин ычкынганы чылап, теҥериниҥ јылдыстары јерге тӱшкен;

¹⁴теҥери тӱрбек чилеп тӱрӱлип, јажына берген; кандый ла кыр, ортолык бойлорыныҥ јеринеҥ јылган;

¹⁵јердеги каандар, улулар, черӱ башчылары, байлар, кӱчтӱлер, кандый ла кул, кандый ла јайым кижи кырлардыҥ куй-таштарына ла капчалдарына јажынып,

¹⁶кырларга ла кайаларга айдып тургандар: — Ӱстибиске аҥтарылып, бисти ширееде Отурганнаҥ ла Кураанныҥ чугулынаҥ јажырыгар,

¹⁷нениҥ учун дезе Оныҥ чугулыныҥ улу кӱни келди, бого кем чыдажар аргалу?