Read Јаҥы Кереес Ачылта 8 Bible Online

Ачылта 8 - Јаҥы Кереес bible

Ачылта 8

¹Кураан јетинчи таҥманы алып ийерде, теҥериде јарым саат кире ыҥ-шыҥ боло берген.

²Кудайдыҥ алдында турган јети ангелди кӧрӱп ийгем. Олорго јети амыргы берилген.

³Ӧскӧ ангел келип, фимиам ӧртӧйтӧн алтын айагын тудунганча, тагылдыҥ алдына тура берген. Ого кӧп фимиам берилген. Ол оны ончо агарулардыҥ мӱргӱлериле кожо ширее алдындагы алтын тагылга салган.

⁴Фимиам ыжы агарулардыҥ мӱргӱзиле кожо ангелдиҥ колынаҥ Кудайдыҥ алдына кӧдӱрилген.

⁵Ангел алтын айакты алып, тагылдаҥ отло толтырып, јерге чачкан: ӱндер угулып, кӱкӱрт кӱркӱреп, јалкын јалтылдап, јер силкинген.

⁶Јети амыргылу јети ангел амыргылаарга белетенип алган.

⁷Баштапкы ангел амыргылаган. Оныҥ кийнинде мӧндӱр ле от канла колыныжала, јерге тӱшкен. Јердиҥ ӱчинчи ӱлӱзи, агаштардыҥ ӱчинчи ӱлӱзи, кандый ла кӧк ӧлӧҥ кӱйе берген.

⁸Экинчи ангел амыргылаган. Отло јалбырап кӱйген улу-јаан кырдый неме талайга ташталган. Талайдыҥ ӱчинчи ӱлӱзи кан боло берген,

⁹талайда јӱрген тынар-тындуныҥ ӱчинчи ӱлӱзи ӧлгӧн, керептердиҥ ӱчинчи ӱлӱзи сайалып-оодылган.

¹⁰Ӱчинчи ангел амыргылаган. Теҥеридеҥ јарыткыш чылап кӱйген улу-јаан јылдыс тӱшкен. Ол суулардыҥ ӱчинчи ӱлӱзине ле суулардыҥ агындарына тӱшкен.

¹¹Јылдыстыҥ ады Јыпшан болгон. Суулардыҥ ӱчинчи ӱлӱзи јыпшан боло берген. Бу суудаҥ улустыҥ кӧбизи ӧлгӧн, нениҥ учун дезе суулар ачу боло берген.

¹²Тӧртинчи ангел амыргылаган. Кӱнниҥ ӱчинчи ӱлӱзи, айдыҥ ӱчинчи ӱлӱзи, јылдыстардыҥ ӱчинчи ӱлӱзи ӱрелген. Оныҥ учун олордыҥ ӱчинчи ӱлӱзи караҥуй боло берген. Тӱштиҥ ӱчинчи ӱлӱзи туркунына јарык јок болгон, анайда ок тӱнниҥ ӱчинчи ӱлӱзи база.

¹³Теҥериде бийик учуп бараткан, тыҥ ӱнденип, мынайда айдып турган бир ангелди кӧрӱп, угуп ийгем: — Јерде јуртаган улуска ачу-корон, ачу-корон, ачу-корон, нениҥ учун дезе арткан ӱч ангел амыргы тартарга белен.