Read Јаҥы Кереес Ачылта 9 Bible Online

Ачылта 9 - Јаҥы Кереес bible

Ачылта 9

¹Бежинчи ангел амыргылаган: теҥеридеҥ јерге тӱшкен јылдысты кӧрӱп ийгем. Ого алыс јердиҥ оозыныҥ тӱлкӱӱри берилген.

²Ол алыс јердиҥ оозын ачып ийерде, улу-јаан печкедеҥ чилеп, алыс јердеҥ ыш чыккан. Алыс јердиҥ бу ыжынаҥ кӱн ле кей карачкыланган.

³Ыштаҥ јерге аспан чыгып келген, ого јердиҥ скорпиондорында ошкош јаҥ берилген.

⁴Јердиҥ ӧлӧҥине, кандый да кӧккӧ, кандый да агашка каршу јетирбезин деп, аспанга айдылган. Ого јаҥыс Кудайдыҥ таҥмазы маҥдайларына базылбаган улусты чагары јарадылган.

⁵Олорго бу улусты ӧлтӱрбезин, јаҥыс беш ай кыйназын деп айдылган. Бу кыйын скорпион кижини чагып кыйнагандый.

⁶Ол кӱндерде улус ӧлӱмди бедиреер, је оны таап болбос. Ӧлӧргӧ кӱӱнзеер, је ӧлӱм олордоҥ кача берер.

⁷Аспан бӱдӱмиле јуу-согушка кадырылган аттарга тӱҥей болгон. Баштарында алтын ӧрӱмелдер ошкош немелер, чырайлары — кижиниҥ чырайындый.

⁸Чачы ӱй кижиниҥ чачындый, тиштери арсландыйы ошкош.

⁹Аспан темир куйактый куйакту болгон, канаттарыныҥ шуулты јуу јерине маҥтап бараткан кӧп аттарга јеккен јуучыл абралардыҥ табыжындый.

¹⁰Ондо скорпиондордо ошкош куйруктар бар, куйруктарында чактырмалар. Куйруктарында улуска беш ай каршу јетирер јаҥ болгон.

¹¹Олордыҥ кааны алыс јердиҥ ангели болгон. Оныҥ ады еврейлеп Аваддон, гректеп Аполлион[2].

¹²Баштапкы ачу-корон ӧдӧ берген. Бат, оныҥ кийнинеҥ база эки ачу-корон келип јат.

¹³Алтынчы ангел амыргылаган: Кудайдыҥ алдында турган алтын тагылдыҥ тӧрт мӱӱзинеҥ чыккан ӱнди угуп ийгем.

¹⁴Ӱн амыргылу алтынчы ангелге айткан: — Улу Евфрат сууныҥ јанында кӱлилген тӧрт ангелдиҥ кӱлӱзин чеч.

¹⁵Улустыҥ ӱчинчи ӱлӱзин ӧлтӱрерге бу кӱнге, ӧйгӧ, айга, јылга белетелген тӧрт ангелдиҥ кӱлӱзи чечилген.

¹⁶Атту черӱниҥ тоозы тӱменниҥ эки тӱмени болгон. Оныҥ тоозын угуп ийгем.

¹⁷Анайып, меге кӧрӱлте болуп, аттарды ла олорго минген улусты кӧрӱп ийгем. Олордыҥ куйагыныҥ ӧҥи кызыл-от, кара-кӧк лӧ кӱкӱрдий. Аттардыҥ баштары — арсландардыҥ баштарындый, оосторынаҥ от, ыш ла кӱкӱр чыгып турган.

¹⁸Бу ӱчӱдеҥ, — оосторынаҥ чыгып турган оттоҥ, ыштаҥ ла кӱкӱрдеҥ — улустыҥ ӱчинчи ӱлӱзи кырылган.

¹⁹Аттардыҥ кӱчи оосторында ла куйруктарында болгон. Куйруктары — јыландарга тӱҥей, олор баштарлу болгон, оныла каршу эдип тургандар.

²⁰Бу кату-јоболло ӧлтӱртпеген арткан улус санаазын кубултпай, колдорыла эткенинеҥ јана тӱшпеген. Олор шилемирлерге бажырарын, кӧрӱп те, угуп та, базып та болбос алтын, мӧҥӱн, јес, таш, агаш чалуларга бажырарын токтотпогон.

²¹Олор ӧлтӱрип, тармалап, балыр кылынып, уурданып эткен кинчектерин алынбаган.