Read Alur Thangambere 1 Bible Online

Thangambere 1 - Alur bible

Thangambere 1

¹Ku kwong’a Mungu cwio polo ku ng’om.

²Man ng’om ubedo umbe ayi man mananu; man mudho bedo wi wang’ longro: e Tipo pa Mungu riebre wi wang’ pi.

³Man Mungu wacu kumae, Dong’ der ubed nuti: e der ubedo nuti.

⁴Man Mungu neno derne, nia e ber: e Mungu poko der ku mudho.

⁵Man Mungu lwong’o der Ceng’, e mudho elwong’o Diewor. Man uthieno nuti kugweno de nuti, ceng’ acel.

⁶Man Mungu wacu kumae, Dong’ apokapiny ubed i kind pi, man epok kind pi ku pi.

⁷Man Mungu timo apokapiny, e epoko pi ma yo ther apokapiny ku pi ma yo wi apokapiny: e ebedo kumeca.

⁸Man Mungu lwong’o apokapiny Polo. Man uthieno nuti kugweno de nuti, ceng’ mir arionde.

⁹Man Mungu wacu kumae, Dong’ pi ma ni the polo cok dhoge i kar acel, man dong’ ng’om m’uthwo woki: e ebedo kumeca.

¹⁰E Mungu lwong’o ng’om m’uthwone Ng’om; man cokri mi pi ke elwong’o Nam: e Mungu neno nia e ber.

¹¹Man Mungu wacu kumae, Dong’ ng’om utwi lum, man uboko ma cego nyinge, ku yen ma ju nyinge ma cego nyinge ku kite ku kite, ma nyinge nuti i ie, wi ng’om: e ebedo kumeca.

¹²Man ng’om utwio lumbe, kud ubokone ma cego nyinge ku kite ku kite, ku yedhi ma cego nyinge, ma nyinge ni i ie, ku kite ku kite: e Mungu neno nia e ber.

¹³Man uthieno nuti kugweno de nuti, ceng’ mir adege.

¹⁴Man Mungu wacu kumae, Dong’ der gibed nuti i apokapiny m’i polo kara gipok dieceng’ ku diewor; man dong’ gibed ni giranyutha, man ni oro ku cwir, man ni ceng’ ku rundi:

¹⁵man dong’ gibed ni der i apokapiny m’i polo kara gicar ng’om ku der: man ebedo kumeca.

¹⁶E Mungu timo der ario ma dongo; der ma dit ubim dieceng’, man der ma nok ubim diewor: etimo cero bende.

¹⁷Man Mungu kethogi i apokapiny m’i polo kara gicar ng’om ku der,

¹⁸man kara gibim wi dieceng’ man wi diewor, man kara gipok der ku moudho: e Mungu neno nia e ber.

¹⁹Man uthieno nuti kugweno de nuti, ceng’ mir ang’wende.

²⁰Man Mungu wacu kumae, Dong’ pi pong’ kud udul giracwia ma kwo, man dong’ winyo giring i ng’om wi apokapiny ma thwolo m’i polo.

²¹Man Mungu cwio yedi ma dit m’i nam, man giracwia ma kwo kubang’e kubang’e ma wotho, ma pi pong’ kudo, ku kite ku kite, man winyo kubang’e kubang’e ma jubombe, ku kite ku kite: e Mungu neno nia e ber.

²²E Mungu mio mugisa igi, ewacu kumae, Wunyol, man wumedru, man wupong’ pi i nam, man dong’ winyo medre i ng’om.

²³E uthieno nuti kugweno de nuti, ceng’ mir abije.

²⁴Man Mungu wacu kumae, Dong’ ng’om unyol giracwia ma kwo ku kite ku kite, lim, ku gin ma lak i ng’om, man yedi m’i ng’om ku kite ku kite: man ebedo kumeca.

²⁵E Mungu timo yedi m’i ng’om ku kite ku kite, man lim ku kite ku kite, man ku ba gin ceke ma lak i ng’om ku kite ku kite: e Mungu neno nia e ber.

²⁶Man Mungu wacu kumae, Dong’ watimu dhanu kud ayiwa, ku kitwa: man dong’ gibed ku kero wi rec m’i nam, man wi winyo m’i polo, man wi lim, man wi ng’om ngung’, man wi gin ma lak i ng’om kubang’e kubang’e ma lak wi ng’om.

²⁷Man Mungu cwio dhanu kud ayine gire, i ayi Mungu ecwie; ecwiogi nico ku dhaku.

²⁸Man Mungu mio mugisa igi: man Mungu wacu igi kumae, Wunyol, wumedru de, wupong’ ng’om, man wudwoke wor iwu; man wubed ku kero wi rec m’i nam, man wi winyo m’i polo, man wi gin ma kwo kubang’e kubang’e ma wotho wi ng’om.

²⁹Man Mungu wacu kumae, Nen, amio iwu uboko ceke kubang’e kubang’e ma ju nyinge, ma ni i wang’ ng’om ceke, man yen ceke kubang’e kubang’e ma nying’ yende ni i ie ma cego nyinge; ebibedo iwu ni cemo:

³⁰man ni yedi m’i ng’om ceke kubang’e kubang’e, man ni winyo ma kor polo ceke kubang’e kubang’e, man ni gin ceke ma lak i ng’om kubang’e kubang’e, ma igi ju kwo, amio uboko ceke ma numu kubang’e kubang’e ni cemo igi: e ebedo kumeca.

³¹E Mungu neno gin ceke m’etimo, man, nen, e ber dit. Man uthieno nuti kugweno de nuti, ceng’ mir abusiende.