Read Alur Thangambere 11 Bible Online

Thangambere 11 - Alur bible

Thangambere 11

¹Man ng’om ngung’ en e mi dhok acel man mi wec acel.

²Man etimbre, ka giwotho yo nyangu, nia ginwang’u pambu i ng’om Cinar; e gibedo keca.

³Man giwecri gigi kumae, Wubin, watimu biriki, man waweng’ugi cu. E gibedo ku biriki ka kidi, man gibedo kud uza ni ulobo.

⁴Man giwacu kumae, Wubin, wagomu adhura iwa, man ot ma tek ma wiu, ma wie copo tundo kum polo, man dong’ watimu iwa nying’; wamaru lal mba mba wi wang’ ng’om ngung’.

⁵Man Yehova loro piny kara enen adhurane ku ot ma tekne ma wiu, ma nyithindho mi dhanu gomo.

⁶E Yehova wacu kumae, Nen, gi dhanu acel, man gin ceke gibedo ku dhok acel; man maeni en e gin ma githeko timo: e kawono gin moko mbe ma bicere igi, ma gikeco ya gitim.

⁷Wubin, dong’ waloru piny, man waloku dhoggi, kara ku ging’ei wec ng’atuman pa wadi ng’atuman pa wadi.

⁸Kum kumeno Yehova lalugi tung’ tung’ ku keca wi wang’ ng’om ngung’: e giweko gomo adhurane.

⁹Ka kumeno julwong’o nyinge Babel; kum keca Yehova loko ie dhok m’i ng’om ceke: man ku keca Yehova lalugi nge nge i wang’ ng’om ceke.

¹⁰Maeni dhanum’utuk pa Cem. Cem rundi pare dak acel, man enyolo Arpakcad rundi ario yo ng’ei pi m’ucoro ng’om:

¹¹man Cem ucamu ng’om yo ng’ei nyolo Arpakcad rundi dak abic, man enyolo nyithindho ma co ku nyithindho ma nyir.

¹²Man Arpakcad ucamu ng’om rundi pier adek wi abic, man enyolo Cela:

¹³man Arpakcad ucamu ng’om yo ng’ei nyolo Cela rundi dak ang’wen ku wi adek, man enyolo nyithindho ma co ku nyithindho ma nyir.

¹⁴Man Cela camu ng’om rundi pier adek, man enyolo Eber:

¹⁵man Cela camu ng’om yo ng’ei nyolo Eber rundi dak ang’wen ku wi adek, man enyolo nyithindho ma co ku nyithindho ma nyir.

¹⁶Man Eber ucamu ng’om rundi pier adek wi ang’wen, man enyolo Peleg:

¹⁷man Eber ucamu ng’om yo ng’ei nyolo Peleg rundi dak ang’wen ku pier adek, man enyolo nyithindho ma co ku nyithindho ma nyir.

¹⁸Man Peleg ucamu ng’om rundi pier adek, man enyolo Reu:

¹⁹man Peleg ucamu ng’om yo ng’ei nyolo Reu rundi dak ario kud abung’wen, man enyolo nyithindho ma co ku nyithindho ma nyir.

²⁰Man Reu camu ng’om rundi pier adek wi ario, man enyolo Serug:

²¹man Reu camu ng’om yo ng’ei nyolo Serug rundi dak ario ku wi abiro, man enyolo nyithindho ma co ku nyithindho ma nyir.

²²Man Serug ucamu ng’om rundi pier adek, man enyolo Nahor:

²³man Serug ucamu ng’om yo ng’ei nyolo Nahor rundi dak ario, man enyolo nyithindho ma co ku nyithindho ma nyir.

²⁴Man Nahor ucamu ng’om rundi pier ario wi abung’wen, man enyolo Tera:

²⁵man Nahor ucamu ng’om yo ng’ei nyolo Tera rundi dak acel kud apar wi abung’wen, man enyolo nyithindho ma co ku nyithindho ma nyir.

²⁶Man Tera camu ng’om rundi pier abiro, man enyolo Abram, ku Nahor, man Haran.

²⁷Nie maeni gi dhanum’utuk pa Tera. Tera nyolo Abram, ku Nahor, man Haran; man Haran unyolo Lot.

²⁸Man Haran ular utho ni won ma Tera i ng’om ma junyole i ie, i Ur mi Jukaldayo.

²⁹Man Abram giku Nahor gigamu igi mon: nying’ ci Abram en e Sarai; man nying’ ci Nahor, en e Milka, ma nya Haran, ma won Milka, man won Izka.

³⁰Man Sarai mugumba kwanye; nyathin pare mbe.

³¹Man Tera gamu Abram ma wode, ku Lot ma wod Haran, ma wod wode, man Sarai ma ci wode, ma ci wode ma Abram; man gicidho gikugi kud i Ur mi Jukaldayo, kara gicidh i ng’om Kanan; man gibino ba Haran, e gibedo keca.

³²Man ceng’ pa Tera gi rundi dak ario ku wi abic; man Tera tho i Haran.