Read Alur Thangambere 12 Bible Online

Thangambere 12 - Alur bible

Thangambere 12

¹Nie Yehova wacu ni Abram kumae, Wodhri woko kud i ng’om ma thu, man ku ba wat peri, man kud i ot pa wuru, icidh i ng’om m’abinyutho iri:

²man abiketho ibedo thek ma dit, man abimio mugisa iri, man abiketho nyingi ubed dwong’; man ibed ni jamimugisa:

³man abimio mugisa ni ju m’umio mugisa iri, man ng’atu m’ulemi abilame: man wat ceke m’i ng’om binwang’u mugisa ni kumi.

⁴Kum kumeno Abram ucidho calu Yehova yero ire; man Lot gicidho gikugi: man Abram rundi pare pier abiro wi abic kan eai kud i Haran.

⁵Man Abram ugamu Sarai ma dhaku pare, ku Lot ma wod umin, ku jukupiny migi ceke ma gicoko, ku dhanu ceke ma ginwang’u i Haran; e gitugo woth kara gicidh i ng’om Kanan; man giwok i ng’om Kanan.

⁶Man Abram ukadhu kud i ng’om cil kum ka mi Cekem, utundo kum bongu mi More. Man Jakanani ni i ng’om i nindo maeca.

⁷Man Yehova nyuthre ni Abram, ewacu de kumae, Abimio ng’om maeni ni nyikwei: e eguro pemblam keca ni Yehova, m’unyuthre ire.

⁸Man eai ku kuca ecidho kum got ma ni yo nyangu ni Beth-el, man eguro hema pare, m’ebedo ku Beth-el yo reto, man Ai yo nyangu: man eguro pemblam keca ni Yehova, man elwong’o nying’ Yehova.

⁹Man Abram utugo woth, m’ebecikucidho yor ariwa ma yo piny.

¹⁰Man ndru ni i ng’ombe: man Abram uloro piny i Misiri nibedo kuca tundu; kum ndru bedo dit i ng’ombe.

¹¹Man etimbre, kan ewok ceng’ni m’emondo ko i Misiri, nia ewacu ni Sarai ma cege kumae, Nen kawono, ang’eyo nia in i dhaku ma weng’i leng’ mir anena:

¹²man ebitimbre, kinde ma Jumisiri gibineni, nia gibiwacu kumae, Maeni dhaku pare: man gibinega, ento gibibodhi ma kwo.

¹³Akwei, dong’ iwac nia in i nyamira; kara ebed ber ira ni kumi, man kara ng’eyong’ec para bed kwo ni kumi.

¹⁴Man etimbre, nia, kinde ma Abram uwok i Misiri, Jumisiri gineno dhakune nia wang’e leng’ dit.

¹⁵Man judongomawijo pa Farao ginene, man gipake ni Farao: e jugamu dhakune i ot pa Farao.

¹⁶Man etimo ber ni Abram ni kume: man ebedo ku rombe, ku koni dhiang’, ku kana ma thwoni, man jutic ma co, man bong’, man mege kana, ku ngamia.

¹⁷E Yehova goyo Farao man ot pare ku masendi ma dit kum Sarai, ma ci Abram.

¹⁸Man Farao lwong’o Abram, man ewacu kumae, Maeni ang’o m’itimo i bang’a? nedi ikwero wacu ira nia en e dhaku peri?

¹⁹nedi iwacu kumae, En e nyamira, ketho agame ni dhaku ira? ka kumeno kawono nen dhaku peri, game, man icidh i yo peri.

²⁰Man Farao mio ng’ol ni dhanu pire: e gikele i yo, ku dhaku pare, ku gin ceke m’ebedo ko.