Read Alur Thangambere 13 Bible Online

Thangambere 13 - Alur bible

Thangambere 13

¹Man Abram uidho malu ku i Misiri, en, ku dhaku pare, ku gin ceke m’ebedo ko, man Lot de gikugi i ng’om ma yor ariwa ma piny.

²Man Abram ulony dit ku lim, ku mola ma tar, man mola ma kwar.

³Man ecidho i woth pare ugambre yor ariwa ma piny cil kum Beth-el, ba ka ma hema pare lar ubedo i ie, i kind Beth-el ku Ai,

⁴ba ka mi pemblam, m’elar etimo keca: e Abram ulwong’o nying’ Yehova keca.

⁵Man Lot bende, ma gicidho karacelo kud Abram, ubedo kud udul rombe, man udul lim, ku hema.

⁶E ng’om uromogi ngo, kara gibed karacelo: kum piny migi dit, ketho gicopo bedo karacelo ngo.

⁷Man piem ni i kind jukwac mi lim pa Abram ku jukwac mi lim pa Lot: man Jakanani ku Japerizi gibedo i ng’ombe i nindo maeca.

⁸Man Abram uwacu ni Lot kumae, Akwei, piem kud ubed i kindwa wakudi, man i kind jukwac para ku jukwac peri; kum wan umego.

⁹Ng’om dho ni i weng’i ngo? akwei, koiri giri kuda: tek ifoyo yor acam, abilund cidho yor acwic; kadi tek ifoyo yor acwic, abilund cidho yor acam.

¹⁰Man Lot uting’o wang’e malu, man eneno pambu mi Yor dan ceke, nia pi rome kun ku kun ceke, ma fodi Yehova kunyotho Sodom ku Gomora ngo, e calu podho pa Yehova, calu ng’om mi Misiri, kan icidho kum Zoar.

¹¹Kum kumeno Lot ufoyo ire pambu ceke mi Yordan; man Lot ucidho yo nyangu: e gikoiri gigi mai: ku wadi man ku wadi.

¹²Abram ubedo i ng’om Kanan, man Lot ubedo i adhura mi pambu, man edaku hema pare cik i Sodom.

¹³Nwang’u dhanu mi Sodomne gi weg gondri man judubo ni Yehova dit apila.

¹⁴Man Yehova wacu ni Abram kumae, yo ng’ei ma Lot ukoc kude, Ting’ weng’i malu kawono, man inen kud i ka m’ini ie, yor ariwa ma malu ku yor ariwa ma piny man yo nyangu ku yo reto:

¹⁵kum ng’om ceke m’ineno, abimie iri, man ni nyikwei mi nja.

¹⁶Man abiketho nyikwei bedo calu utur m’i ng’om: kum kumeno tek ng’atu moko copo kwanu utur m’i ng’om, e nyikwei bende bikwandre.

¹⁷Ai malu, woth kud i ng’om i kaborne man i kalacne; kum abimie iri.

¹⁸Man Abram udaku hema pare, man ebino ebedo de ceng’ni bongu mi Mamre, ma ni i Hebron, man eguro pemblam keca ni Yehova.