Read Alur Thangambere 14 Bible Online

Thangambere 14 - Alur bible

Thangambere 14

¹Man etimbre, i ceng’ pa Amrafel m’ubimo mi Cinar, man Ariok m’ubimo mi Elasar, man Kedorlaomer m’ubimo mir Elam, man Tidal m’ubimo mi Goim,

²nia giteng’o ali ku Bera m’ubimo mi Sodom, man ku Birca m’ubimo mi Gomora, ku Cinab m’ubimo mi Adma, man Cemeber m’ubimo mi Zeboim, man ubimo mi Bela (ma en e Zoar).

³Maeni ceke giribri karacelo i poga mi Sidim (ma en e Nam Kadu).

⁴Gitimo ni Kedorlaomer rundi apar wi ario, man i rundi apar wi adege gijai.

⁵Man i rundi apar wi ang’wende Kedorlaomer ubino, giku ju m’ubimo ma gini karacelo kude, man gigoyo Jurefai i Acteroth-kamaim, man Juzuzi i Ham, man Juemi i Cave-kiriathaim,

⁶man Juhori i got migi ma Seir, cil kum Elparan, ma ni ceng’ni yamba.

⁷Man gidwogo, gibino de ba En-micpat (ma en e Kadec), man gigoyo ng’om ceke mi Juamaleki, ku Juamori bende, m’ubedo i Hazazon-tamar.

⁸Man ubimo mi Sodom ucidho woko, kud ubimo mi Gomora, man ubimo mir Adma, man ubimo mi Zeboim, man ubimo mi Bela (ma en e Zoar); e githero lwiny i kumgi i poga mi Sidim;

⁹kum Kedorlaomer m’ubimo mir Elam, man Tidal m’ubimo mi Goim, man Amrafel m’ubimo mi Cinar, man Ariok m’ubimo mi Elasar; ubimo ang’wen gicokri wi ubimone abic.

¹⁰Nwang’u poga mi Sidim upong’ ku vuj ulobo; man ju m’ubimo mi Sodom ku Gomora giringo, man gipodho keca, man ju m’udong’ giringo ba got.

¹¹Man giyaku piny ceke mi Sodom ku Gomora, ku cemo migi ceke, e gicidho i yo migi.

¹²Man gimaku Lot, ma wod umin Abram, m’ubedo i Sodom, ku piny pare, e gicidho.

¹³E ng’atu acel m’uboth ubino, man eyero ni Abram ma Jaebrania: nwang’u ebedo ceng’ni bongu mi Mamre, ma Jaamori, m’umin Eckol, man umin Aner; man maeni giribri kud Abramgi.

¹⁴Man kan Abram uwinjo nia juyaku umin, etelo wi dhanu pare ma juponjogi kud ali, ma junyolo i ot pare, dhanu dak adek kud apar wi abora, man elubo tokgi cil kum Dan.

¹⁵Man epoko dhanu pare i kumgi ku diewor, en ku jutic pare, man egoyogi, eriemogi de cil kum Hoba, ma en e yor acam ni Dameski.

¹⁶Man edwogo ku piny ceke, edwogo kud umin ma Lot bende, ku piny pare, ku mon bende, man dhanu.

¹⁷Man ubimo mi Sodom ucidho woko nirombo kude, yo ng’ei dwogo pare ku ba nek pa Kedorlaomer man ju m’ubimo ma gini kude, i poga mi Cave (ma en e Poga mir Ubimo).

¹⁸Man Melkizedek ubimo mi Salem ukelo kwen ku pigulok: man en e jalam pa Mungu ma Malu Ngbir.

¹⁹Man emio mugisa ire, man ewacu kumae, Mugisa pa Mungu ma Malu Ngbir, ma jacwi polo ku ng’om, ukwany Abram:

²⁰man mugisa ni Mungu ma Malu Ngbir, m’emio jukwoji i cingi. Man emio ire apaje mi gin ceke.

²¹Man ubimo mi Sodom uwacu ni Abram kumae, Mi ira dhanune, man igam piny iri giri.

²²E Abram uwacu ni ubimo mi Sodom kumae, Ating’o cinga malu ni Yehova, Mungu ma Malu Ngbir, ma jacwi polo ku ng’om,

²³nia abigamu thol kadi thondh wara de ngo kadi gin moko ma peri, imaru wacu kumae, Alonyo Abram:

²⁴ndhu maeni kende ma awobi gicamu, man makapiny mi dhanu ma wacidho wakugi, ma gin Aner, ku Eckol, man Mamre; wek gigam makapiny migi.