Read Alur Thangambere 15 Bible Online

Thangambere 15 - Alur bible

Thangambere 15

¹Yo ng’ei gin maeni lembe pa Yehova bino bang’ Abram i ginmawokiwang’, m’uwacu kumae, Kud ilwor, Abram: an a ban peri, ku sukulia peri ma dit apila.

²Man Abram uwacu kumae, E Rwoth Yehova, ibimio ira ang’o, ma nwang’u nyathin umbe kuda, man ng’atu ma bicamu pacu para en e Eliezer ma Dameski?

³Man Abram uwacu kumae, Nen, imio ira kodhi moko ngo: man, nen, ng’atu acel ma junyolo i ot para en e jacampacu para.

⁴Man, nen, lembe pa Yehova bino i bang’e, m’uwacu kumae, Ng’atu maeni bibedo jacampacu peri ngo; ento ng’atu ma biai ii e ma bibedo jacampacu peri.

⁵Man ewodhe woko, ewacu de kumae, Kawono nen yor i polo, man ikwan cero, tek icopo kwanugi: man ewacu ire kumae, Kodhini bibedo kumeni.

⁶Man eyio Yehova; e ekwane ire ni bedopwe.

⁷Man ewacu ire kumae, An a Yehova m’ukeli woko kud i Ur mi Jukaldayo, kara ami iri ng’om maeni kara ebed ni aba iri.

⁸Man ewacu kumae, E Rwoth Yehova, abing’eyo nenedi nia ebibedo ira ni aba?

⁹Man ewacu ire kumae, Gam ira rwaya ma rundi pare adek, man min diel ma rundi pare adek, man nyog rombo ma rundi pare adek, man akuru, ku nyathin akuru.

¹⁰Man egamu ire maeni ceke, epokogi de i diere, man eketho ng’etgi kubang’gi kubang’gi ba wadi: ento epoko winyo ngo.

¹¹Man acur giloro piny wi ring’one, man Abram uriemogi woko.

¹²E kinde ma ceng’ ubepodho, nindo ma pek upodho wi Abram; man, nen, ndiri mi mudho ma dit upodho i wie.

¹³Man ewacu ni Abram kumae, Dong’ ing’ei andhandha nia kodhi peri bibedo umondo i ng’om ma migi ngo, man gibitimo ni joca; man gibisendogi rundi dak ang’wen;

¹⁴man thek maeno bende, ma gibitimo igi, abipoko lembe i wigi: man yo ku ng’eye gibiwok woko ku piny ma dit.

¹⁵Ento ibicidho ba kwaru i kwiocwiny; jubiyiki i tio ma ber.

¹⁶Man i dhanum’utuk mir ang’wende gibidwogo keni kendo: kum dubo mi Juamori fodi upong’ ungo.

¹⁷Man etimbre, nia, kinde ma ceng’ upodho, man mudho nuti, nen, uka mi yiro, man ridhro mi leb mac m’ubekadhu i kind ng’et maeni.

¹⁸I ceng’ maeca Yehova timo lembariba kud Abram, ewacu kumae, Amio ng’om maeni ni kodhini, ugambre kulo mi Misiri cik kum kulo ma dit, ma en e kulo Frati:

¹⁹Jakeni, man Jakenizi, ku Jakadmoni,

²⁰man Jahiti, ku Japerizi, man Jarefai,

²¹man Jaamori, man Jakanani, ku Jagirgaci, man Jayebusi.