Read Alur Thangambere 16 Bible Online

Thangambere 16 - Alur bible

Thangambere 16

¹Nwang’u Sarai, ma ci Abram, unyolo ire nyithindho moko ngo: man ebedo ku bong’, en e Nyamisiri, man nyinge Hagar.

²Man Sarai wacu ni Abram kumae, Nen kawono, Mungu cera ku nyol; akwei, mond wi bong’ para; kuno nyo abicopo nwang’u nyithindho ni kume. E Abram uwinjo dwand Sarai.

³Man Sarai, ma ci Abram, ugamu Hagar ma Nyamisiri, ma bong’ pare, yo ng’ei bedo ma Abram ubedo ko rundi apar i ng’om Kanan, man emie ni Abram ma cware kara ebed dhaku pare.

⁴Man emondo wi Hagar, man egamu ie; e kinde m’eneno nia egamu ie, e mege pagi bedo acaya i wang’e.

⁵Man Sarai wacu ni Abram kumae, Kier para bed i wii: amio bong’ para i kori; e kan eneno nia egamu ie, abedo acaya i wang’e: Yehova pok lembe i kindwa wakudi.

⁶Ento Abram uwacu ni Sarai kumae, Nen, jatic peri ma nyaku eni i cingi; tim gin m’ubedo ber i weng’i i kume. Man Sarai timo ma tek i kume, e epiei kud i wang’e.

⁷E Malaika pa Yehova nwang’e ba kulo mi pi i yamba, ba kulo i yo mi Cur.

⁸Man ewacu kumae, Hagar, ma bong’ pa Sarai, iai kani? man icidho kani? Man ewacu kumae, Aberingo kud i wang’ Sarai ma mege fwa.

⁹Man malaika pa Yehova wacu ire kumae, Dok ba mege peu, man ijwigri giri the cinge.

¹⁰Man malaika pa Yehova wacu ire kumae, Abinyayu kodhini dit, kara kud ekwandre ni udulne.

¹¹Man malaika pa Yehova wacu ire kumae, Nen, ii nuti, man ibinyolo nyathin ma nico; man ibilwong’o nyinge Icmael, kum Yehova winjo masendi peri.

¹²Man ebibedo calu kana m’i thim i kind dhanu; cinge bibedo wi dhanu ceke kubang’gi kubang’gi, man cing’ dhanu ceke kubang’gi kubang’gi bibedo i wie; man ebibedo yo nyangu ni utumin mire ceke.

¹³Man elwong’o nying’ Yehova m’uweco i bang’e kumae, In i Mungu ma neno; kum ewacu kumae, Aneno cil keni ng’atu m’unena?

¹⁴Kum kumeno julwong’o kulone Ber-lahai-roi; nen, eni i kind Kadec man Bered.

¹⁵Man Hagar unyolo nyathin ma nico ni Abram: man Abram ulwong’o nying’ wode, ma Hagar unyolo, Icmael.

¹⁶Man Abram rundi pare pier abora wi abusiel, kinde ma Hagar unyolo Icmael ni Abram.