Read Alur Thangambere 17 Bible Online

Thangambere 17 - Alur bible

Thangambere 17

¹Man kinde ma rundi pa Abram a pier abung’wen wi abung’wen, Yehova nyuthre ni Abram, man ewacu ire kumae, An a Mungu ma Jategokpo; woth i wang’a, man ibed ndhu cu.

²Man abitimo lembariba para i kindwa wakudi, man abimedi apila.

³Man Abram[1] upodho arieba wang’e: e Mungu weco kude, ewacu kumae,

⁴Ento an, nen, lembariba para ni kudi, man ibibedo weg udul mi thek.

⁵Kadok nyingi de jubilwong’o Abram kendo ngo, ento nyingi bibedo Ibrahim[2]; kum akethi ni weg udul mi thek.

⁶Man abiketho inyai apila, man abiketho idoko ni thek dupa, man ju m’ubimo biai i beng’i.

⁷Man abiketho lembariba para m’i kindwa wakudi ucungi man ku kodhini yo ng’eii cil kum dhanum’utuk migi ni lembariba mi nja, kara abed ni Mungu iri man ni kodhini yo ng’eii.

⁸Man abimio iri ng’om mir umondo peri, ma en e ng’om Kanan ceke, ni piny mi nja, man ni kodhini yo ng’eii; man abibedo Mungu migi.

⁹E Mungu wacu ni Ibrahim kumae, Man in, ibiworo lembariba para, in, ku kodhini yo ng’eii cil ku dhanum’utuk migi.

¹⁰Maeni en e lembariba para, ma wubiworo, i kindwa wakudi man kodhini yo ng’eii: jubitimo yaa i kum co ceke m’i kindwu kubang’gi kubang’gi.

¹¹Man wubitimo yaa i ring’kum mi dendkumwu: man ebibedo giranyutha mi lembariba ma ni i kindwa wakudu.

¹²Man ng’atu ma ceng’ pare doko abora jubitimo yaa i kume i kindwu, ku ba dhanu ceke ma co cil kum dhanum’utuk mu, ng’atu ma junyolo i ot, kadi ma jung’iewe ku sente ba jawirok moko ma en e kodhiwu ngo.

¹³Ng’atu ma junyolo i ot peri, man ng’atu ma jung’iewe ku sente peri, jubikotimo yaa i kume be: man lembariba para bibedo i ring’kumwu ni lembariba mi nja.

¹⁴Man ng’atu ma nico ma jukutimo yaa ngo i ring’kum mi dendkume, ng’eyong’ec maeno jubikabu woko ku kind juthugi; eturo lembariba para.

¹⁵Man Mungu wacu ni Ibrahim kumae, Sarai, ma dhaku peri, ibilwong’o nyinge Sarai ngo, ento nyinge bibedo Sara[3].

¹⁶Man abimio mugisa ire, man kendo abimio iri nyathin ma nico i kore: eyo, abimio mugisa ire, man ebibedo meg thek dupa; ju m’ubimo mi kodhidhanu biai i bang’e.

¹⁷E Ibrahim ulund upodho arieba wang’e, man eng’iero, man ewacu i adundene kumae, Nyathin binyole ni ng’atu ma rundi pare daki? man Sara, ma rundi pare pier abung’wen, binyoli?

¹⁸E Ibrahim uwacu ni Mungu kumae, A tek Icmael copo bedo kwo i weng’i!

¹⁹Man Mungu wacu kumae, Ungo, ento Sara ma dhaku peri binyolo iri nyathin ma nico: man ibilwong’o nyinge Isak: man abiketho lembariba para ma kude ucung ni lembariba mi nja ni kodhine yo ng’eye.

²⁰Man pi Icmael, awinji: nen, amio mugisa ire, man abiketho enyai, man abimede apila: ebinyolo judongomawijo apar wi ario, man abikethe ni thek ma dwong’.

²¹Ento lembariba para abiketho cungo ni kum Isak, ma Sara binyolo iri karunyoni rundi ma cen.

²²Man eweko weco kude, man Mungu idho malu ku bang’ Ibrahim.

²³Man Ibrahim ugamu Icmael ma wode, ku dhanu ceke ma junyolo i ot pare, man dhanu ceke ma jung’iewo ku sente pare, dhanu ma co ceke kubang’gi kubang’gi i kind dhanu m’i ot pa Ibrahim, man etimo yaa i ring’kum mi dendkumgi i ceng’ maeca nica, calu Mungu wacu ire.

²⁴Man rundi pa Ibrahim udoko pier abung’wen wi abung’wen, kinde ma jutimo yaa i ring’kum mi dendkume.

²⁵Man rundi pa Icmael ma wode doko apar wi adek, kinde ma jutimo yaa i ring’kum mi dendkume.

²⁶I ceng’ maeca nica jutimo yaa i kum Ibrahim, man i kum Icmael ma wode.

²⁷Man dhanu ma co ceke m’i ot pare, ju ma junyolo i ot, man ju ma jung’iewo ku sente ba jawirok, jutimo yaa i kumgi gikugi.