Read Alur Thangambere 19 Bible Online

Thangambere 19 - Alur bible

Thangambere 19

¹Man malaika ario nica gibino Sodom uthieno; man Lot ubedo dhugang’ mi Sodom: e Lot unenogi, man eai malu nijologi; man erum arieba wang’e i ng’om;

²man ewacu kumae, Kawono nen, rwodhina, akwayuwu, wukier i ot pa jatic mu, man wubed ku diewor soro, e wulwok tiendwu, man wubiai malu pir, e wubicidho i yo mu. Man giwacu kumae, Ungo; ento wabibedo i gengi ku diewor soro.

³Man edhulogi hai; e gilokri gimondo i bang’e, man gimondo i ot pare; e etimo igi agba, man etedo kwen ma thobi mbe i ie, e gicamu.

⁴Ento ka fodi givuto piny ungo, dhanu mir adhurane, en e dhanu mi Sodom, gitieko ot gbur, awobi ku ju ma dongo, dhanu ceke m’uai kun ku kun;

⁵man gilwong’o Lot, man giwacu ire kumae, Dhanu ma gimondo i beng’i ku diewor maeni gini kani? wodhgi woko i bang’wa, kara wadubgi.

⁶Man Lot uwok woko i bang’gi i dhugola, man eciko dhugola yor i ng’eye.

⁷Man ewacu kumae, Akwayuwu, juwada, kud utim rac kumeno.

⁸Kawono nen, nyiga ario nuti ma fodung’eyo co ngo; akwayuwu, wuyi ira awodhgi woko iwu, man wutim i bang’gi calu ebedo ber i weng’wu: ento jumaeni re kud wutim gin moko i kumgi, kum gimondo the tipo mi ruvindu para.

⁹Man giwacu kumae, Cung cen. E giwacu kumae, Ng’atu maeni bino ni umondo, man ebidoko ni japoklembe: kawono wabitimo rac i beng’i, ma sagu ma kum jono. Man gitimo ng’atuca ma tek, en e Lot, man gicoro ceng’ni kara gitur dhugola.

¹⁰Ento dhanune giroyo cing’gi, man gidwoko Lot i bang’gi i ot, e giciko dhugola.

¹¹Man gigoyo dhanu ma ni dhugola mi ot ku corwang’, ma thindho ku ma dongo, ketho giol gigi ku yenyo dhugola.

¹²Man dhanune giwacu ni Lot kumae, Ibedo ku dhanu moko keni m’umedo maeni? cog nyigi, man woti, ku nyigi, man ng’atu ma tek ibedo ko i adhura nini wodhgi woko kud i ka maeni:

¹³kum wabinyotho ka maeni, kum dwand woi migi doko dit i wang’ Yehova; man Yehova orowa kara wanyothe.

¹⁴E Lot uwok woko, man eweco ku cog nyige, m’ugamu nyige, man ewacu kumae, Wuai, wuwodhru woko ku ka maeni; kum Yehova binyotho adhura maeni. Ento ebedo calu ng’atu m’utimo lele i wang’ cog nyige.

¹⁵Man ka nyangu dongo, malaika lund udhulo Lot, giwacu kumae, Ai, gam dhaku peri, man nyigi ario ma ni keni, imaru nyothri i dubo mir adhura maeni.

¹⁶Ento egalu; man dhanune gimaku cinge, ku cing’ dhaku pare, ku cing’ nyige ario, kum kisa nego Yehova i kume: man giwodhe woko, gikethe yo woko ni adhura.

¹⁷Man etimbre, kinde ma giterogi cen, nia ewacu kumae, Dong’ ibodh kwo peri; kud inen ng’eii, kadi kud ibed i pambu ceke; ring ba got, imaru nyothri.

¹⁸Man Lot uwacu igi kumae, A, kumeno ngo, rwoth para:

¹⁹kawono nen, jatic peri nwang’u bero i weng’i, man idwoko mer mi bero peri dwong’, i bodh m’ibodho ko kwo para: man acopo ringo ba got ungo, gin ma rac umaru nwang’a, man amaru tho:

²⁰kawono nen, adhura maeni ceng’ni m’aring i ie, man e nyathigi. A wek aring kuca (en e nyathigi ngo?), e ng’eyong’ec para bibedo kwo.

²¹Man ewacu ire kumae, Nen, ayio iri pi gin maeni bende, nia abinyotho adhura maeni ngo m’iweco pire.

²²Tim pio, ring kuca; kum acopo timo gin moko ngo ma fok’itundo kuca ngo. Ka kumeno nying adhura maeca julwong’o Zoar.

²³Ceng’ uwok wi ng’om kinde ma Lot umondo i Zoar.

²⁴Yehova lund ukonjo mac ku muganga wi Sodom man wi Gomora kud i polo ku ba Yehova;

²⁵man eng’ielo adhura maeca, ku pambu ceke, ku dhanu ceke m’ubedo i adhurane, ku gin m’utwi wi ng’om.

²⁶Ento dhaku pare ma ni yor i ng’eye, ulokre uneno ng’eye, man edoko ni mbegi mi kadu.

²⁷E Ibrahim uidho malu pii’ kugweno ba ka m’ecungo i ie i wang’ Yehova:

²⁸man eneno yo ba Sodom ku Gomora, man yo ba ng’om ceke mi pambu, man eneno, man, nen, yiro mi ng’om uidho malu calu yiro mir uka.

²⁹Man etimbre, kinde ma Mungu nyotho adhura mi pambu, nia Mungu poi pir Ibrahim, man eoro Lot woko kud i kind ng’ielne, kinde m’eng’ielo adhura ma Lot ubedo i ie.

³⁰E Lot uidho malu kud i Zoar, man ebedo i got, ku nyige ario gikugi; kum elworo bedo i Zoar: e ebedo i odng’om, en ku nyige ario.

³¹Man ma kayu wacu ni ma nok kumae, Wegwa ti, man ng’atu moko mbe i ng’om ma nico ma bimondo i wiwa calu kura ng’om ceke:

³²bin, dong’ waketh wegwa madh pigulok, man wabivuto kude, kara wagwok kodhi m’uai ba wegwa.

³³E giketho weggi madhu pigulok i diewor maeca: man kayu mondo, evuto ku weggi de; man eng’eyo ngo kinde m’evuto, kadi kinde m’eai de.

³⁴Man etimbre urwone, nia kayu wacu ni ma nok kumae, Nen, nyaworo avuto ku vwa: dong’ waketh emadh pigulok i diewor maeni bende; man imond, ivut kude de, kara wagwok kodhi m’uai ba wegwa.

³⁵Man giketho weggi madhu pigulok i diewor maeca bende: man ma nok uai, man evuto kude; man eng’eyo ngo kinde m’evuto, kadi kinde m’eai.

³⁶Kum kumeno nyig Lot ario gigamu igi ku weggi.

³⁷Man ma kayu unyolo nyathin ma nico, man elwong’o nyinge Moab: en e weg Jumoabi cil tin.

³⁸Man ma nok, enyolo nyathin ma nico bende, man elwong’o nyinge Ben-ami: en e weg nyithindho mir Amon cil tin.