Read Alur Thangambere 2 Bible Online

Thangambere 2 - Alur bible

Thangambere 2

¹Man polo ku ng’om gidaru timbri, kud udul pinje ceke.

²Man i ceng’ mir abirone Mungu daru tic pare m’etimo; man eyom i ceng’ mir abirone ni tic pare ceke m’etimo.

³Man Mungu mio mugisa wi ceng’ mir abirone, man edwoke leng’; kum eyom i ie ni tic pare ceke ma Mungu cwio man etimo.

⁴Maeni thek piny m’i polo man m’i ng’om kinde ma jucwiogi, i ceng’ ma Yehova Mungu cwio ie ng’om ku polo.

⁵Man yen moko mbe m’i thim ma fodubedo nuti wi ng’om, man uboko moko mbe m’i thim ma fodutwi; kum Yehova Mungu fodukonjo koth ungo wi ng’om: man ng’atu moko mbe ma timo tic i ng’om;

⁶ento thoi idho malu kud i ng’om, man ekonjo pi wi wang’ ng’om ceke.

⁷Man Yehova Mungu cwio ng’atu ma nico kud utur m’i ng’om, man eyuyo lietho mi kwo i ume; e ng’atu ma nicone doko ni ng’eyong’ec ma kwo.

⁸Man Yehova Mungu thego podho yo nyangu, i Aden; man eketho ng’atu ma nicone m’ecwio keca.

⁹Man Yehova Mungu ketho yen ceke kubang’e kubang’e utwi kud i ng’om ma nyayu mutoro i wang’, ma ber de ni cemo; ku yen mi kwo bende i die podho, man yen mi ng’eyong’ec mi gin ma ber ku gin ma rac.

¹⁰Man kulo ai i Aden kara umi pi ni podhone; man ku keca epokre, man edoko ni wipi ang’wen.

¹¹Nying’ ma kwong’ane Picon: en e maeni m’utieko ng’om dho mi Havila gbur, ka ma mola ma kwar ni i ie;

¹²man mola ma kwar m’i ng’om maeca e ber: man kidi ma kwar ni keca ku kidi ma ju kite.

¹³Man nying’ kulo mir arionde en e Gihon: en e maeno m’utieko ng’om dho mi Kuc gbur.

¹⁴Man nying’ kulo mir adege en e Hidekel: en e maeno m’ukadhu yor i wang’ Ascur. Man kulo mir ang’wende en e Frati.

¹⁵Man Yehova Mungu gamu ng’atuca, man ekethe i podho mir Aden kara etim tic i ie ekure de.

¹⁶Man Yehova Mungu ng’olo ni ng’atuca, ewacu kumae, Ku ba yen ceke m’i podho icopo camu kume moko calu iyenyo:

¹⁷ento yen mi ng’eyong’ec mi gin ma ber ku gin ma rac, kud icam nyinge moko: kum i ceng’ m’ibicamu nyinge moko ci e ibitho andha.

¹⁸Man Yehova Mungu wacu kumae, E ber ungo nia dhanu bed kende; abitimo ire jakony.

¹⁹Man Yehova Mungu cwio yedi ceke m’i thim kubang’e kubang’e ku ng’om, man winyo ma kor polo kubang’e kubang’e; man ekelogi ba ng’atuca kara enen maram ebilwong’o kogi: e nying’ ma tek ng’atuca lwong’o ko gin ceke ma kwo kubang’e kubang’e, e ebedo nyinge.

²⁰Man ng’atuca mio nying’ ni lim ceke, man ni winyo ma kor polo, man ni yedi m’i thim ceke kubang’e kubang’e; ento ni Adamu junwang’u jakony ungo ire.

²¹E Yehova Mungu ketho nindo ma pek unuro ng’atuca, e enindo; man ewodho wel ng’ete acel, man eculo ring’o kakare:

²²man wel ng’ete, ma Yehova Mungu wodho kud i ng’atuca, etime ni dhaku, man ekele ba ng’atuca.

²³E ng’atuca wacu kumae, Maeni cogo mi cogona, man ring’o mi ring’kuma: jubilwong’e Dhaku, kum juwodhe ku ba Nico.

²⁴Ka kumeno nico biweko won ku min, man ebimoko kum cege: man gibidoko kum acel.

²⁵E gin ario gibedo muneru, ng’atu ma nico ku dhaku pare, man lewic unegogi ngo.