Read Alur Thangambere 20 Bible Online

Thangambere 20 - Alur bible

Thangambere 20

¹Man Ibrahim uwotho ku keca yo ba ng’om ma yor ariwa ma piny, man ebedo i kind Kadec ku Cur; man ebedo ni umondo i Gerar.

²Man Ibrahim uwacu pi Sara ma cege kumae, En e nyamira: man Abimelek m’ubimo mi Gerar eoro, man egamu Sara.

³Ento Mungu bino bang’ Abimelek ku wang’ lek ma ku diewor, man ewacu ire kumae, Nen, in i avu, kum dhaku m’igamu; kum en e ci nico.

⁴Nwang’u Abimelek ubino ceng’ni dhakune ngo: man ewacu kumae, Rwoth, ibinego cil thek ma pwe?

⁵Ewacu ira en ungo kumae, En e nyamira? man en, cil en gire ewacu kumae, En e umira: e atimo kumeni kud adundena ma cu man ku cinga ma leng’.

⁶Man Mungu wacu ire ku wang’ lek kumae, Eyo, ang’eyo nia itimo maeni kud adundeni ma cu, man an bende aceri ku dubo ira: kum kumeno ayio ngo imul kume.

⁷Ka kumeno kawono dwok ci ng’atuno; kum en e jabila, man ebirwo piri, e ibibedo kwo: man tek idwoke ngo, e ing’ei nia ibitho andha, in, man ceke ma peri.

⁸Man Abimelek uai pir kugweno, man elwong’o jutic pare ceke, e eyero gin maeni ceke i ithgi: man dhanu ma co lworo negogi dit.

⁹Abimelek ulund ulwong’o Ibrahim, man ewacu ire kumae, Itimo ang’o i bang’wa? man adubo ang’o iri, m’uketho ikelo dubo ma dit i wia man wi ker para? itimo gin ma maku ku jutim bang’a.

¹⁰Man Abimelek uwacu ni Ibrahim kumae, Ineno ang’o, m’uketho itimo gin maeni?

¹¹Man Ibrahim uwacu kumae, Kum ia pido kumae, Andha lworo pa Mungu mbe i ka maeni; man gibinega pi dhaku para.

¹²Man kendo en e nyamira andha, en e nyar vwa, ento en e nyar ma ngo; man edoko dhaku para:

¹³man etimbre, kinde ma Mungu ketho atugo woth kud i ot pa vwa, nia awacu ire kumae, Maeni beroni m’ibinyutho ira: i ka ceke ma wabiwok i ie, wac pira kumae, En e umira.

¹⁴Man Abimelek ugamu rombe ku koni dhiang’, man jumiru ku bong’, man emiogi ni Ibrahim, man edwoko ire Sara, ma cege.

¹⁵E Abimelek uwacu kumae, Nen, ng’om para ni i weng’i: bed i ka m’ifoyo.

¹⁶Man ni Sara ewacu kumae, Nen, amio ng’et mola ma tar rubanga acel ni umeru: nen, en e jambum mi wang’ iri ni dhanu ceke ma ni kudi; man igamu bedopwe peri i wang’ dhanu ceke.

¹⁷E Ibrahim urwo ni Mungu: man Mungu cangu Abimelek, ku dhaku pare, man bong’ pare; man ginyolo nyithindho.

¹⁸Kum nwang’u Yehova twio ic ceke m’i ot pa Abimelek, pi Sara, ma ci Ibrahim.