Read Alur Thangambere 21 Bible Online

Thangambere 21 - Alur bible

Thangambere 21

¹Man Yehova liewo Sara calu ewacu, man Yehova timo ni Sara calu eyero.

²E Sara gamu ie, man enyolo nyathin ma nico ni Ibrahim i tio pare, i nindo ma jung’olo ma Mungu yero pire ire.

³Man Ibrahim ulwong’o nying’ nyathin pare ma nico ma junyolo ire, ma Sara nyolo ire, Isak.

⁴Man Ibrahim utimo yaa i kum wode ma Isak nwang’u ceng’ pare abora, calu Mungu ng’olo ire.

⁵Man Ibrahim rundi pare dak, kinde ma junyolo wode ma Isak ire.

⁶Man Sara wacu kumae, Mungu ketho ang’iero; dhanu ceke kubang’gi kubang’gi m’uwinjo wabing’iero wakugi.

⁷Man ewacu kumae, Ng’a ma copo yero ni Ibrahim, nia Sara biketho nyithindho dhothi? kum anyolo ire nyathin ma nico i tio pare.

⁸E nyathin udongo, man ekwiro cak: man Ibrahim utimo agba ma dit i ceng’ ma Isak ukwiro ie cak.

⁹Man Sara neno wod Hagar ma Nyamisiri, m’enyolo ni Ibrahim, ubesasu lele.

¹⁰Kum kumeno ewacu ni Ibrahim kumae, Riem bong’ maeni woko ku wode: kum wod bong’ maeni gibibedo jucampacu giku woda ngo, en e kud Isak.

¹¹Man lembene nyayu can dit i Ibrahim kum wode.

¹²Man Mungu wacu ni Ibrahim kumae, Lembe pa nyathin, ku pa bong’ peri kud ubed rac i weng’i; gin ceke ma Sara yero pire iri, winj dwande; kum kodhini bilwongre ni kum Isak.

¹³Man abitimo thek bende ni kum wod bong’ maeni, kum en e kodhini.

¹⁴Man Ibrahim uai malu pir kugweno, e egamu kwen ku cupa mi pi, man emie ni Hagar, ekethe wi goke de man emio nyathin ire, e eketho ecidho: man eai, man ewotho i yamba mi Ber-ceba.

¹⁵E pi thum kud i cupa, man epielo nyathinne the yen moko m’udinyo.

¹⁶Man ecidho, ebedo piny de cen i wang’e, ro ku ma jukilo ie athero: kum ewacu kumae, Kud anen wi tho pa nyathin. Man ebedo yo ku m’eni i ie, man eting’o dwande malu, e eywak.

¹⁷E Mungu winjo dwand nyathin; man malaika pa Mungu lwong’o Hagar kud i polo, man ewacu ire kumae, Gin moko timi, Hagar? lworo kud unegi; kum Mungu winjo dwand nyathinne ku ka m’eni i ie.

¹⁸Ai malu, ting’ nyathin, man imake i cingi; kum abidwoke ni thek ma dit.

¹⁹E Mungu yabu wang’e, man eneno kulo mi pi; e ecidho, man epong’o cupa ku pi, man emio ni nyathinne madhi.

²⁰E Mungu ni karacelo ku nyathinne, man edongo; e ebedo i yamba, man kan edongo edoko jakilatum.

²¹Man ebedo i yamba mi Paran: man min ugamu ire dhaku i ng’om Misiri.

²²Man etimbre i nindo maeca, nia Abimelek ku Fikol ma jego mir udul pare yero ni Ibrahim, ewacu kumae, Mungu ni kudi i gin ceke m’itimo:

²³ka kumeno kawono kwong’ ira keni ku Mungu nia ibitimo ira abombi ngo, kadi ku woda, kadi ku wod woda: ento calku bero m’atimo i beng’i, ibitimo ira, man ba ng’om m’ibedo ni umondo i ie.

²⁴Man Ibrahim uwacu kumae, Abikwong’o.

²⁵Man Ibrahim ujuko Abimelek kum kulo mi pi m’atong’a, ma jutic pa Abimelek umayu ku rop.

²⁶Man Abimelek uwacu kumae, Ang’eyo ng’atu m’utimo gin maeni ngo: kadok in de iyero ira ngo, kadok pire de fodawinjo ngo, ndhu tin.

²⁷Man Ibrahim ugamu rombe ku koni dhiang’, man emiogi ni Abimelek; man gin ario gitimo lembariba.

²⁸Man Ibrahim ukoyo vong’ rombe abiro ku i udul rombe ekethogi cen.

²⁹Man Abimelek uwacu ni Ibrahim kumae, Thelembe mi vong’ rombe abiro m’iketho cen maeni ang’o?

³⁰Man ewacu kumae, Vong’ rombe abiro maeni ibigamu kud i cinga, kara ebed ni lembanyutha ira, nia atong’o kulo m’atong’a maeni.

³¹Kum kumeno elwong’o kakeca Ber-ceba; kum gin ario gikwong’o kwong’ keca.

³²Kum kumeno gitimo lembariba i Ber-ceba: man Abimelek uai malu, ku Fikol ma jego mir udul pare, man gidok i ng’om mi Jufilisti.

³³Man Ibrahim upidho yen i Ber-ceba, man elwong’o nying’ Yehova keca, Mungu mi Nja.

³⁴Man Ibrahim ubedo ni umondo i ng’om mi Jufilisti ceng’ dupa.