Read Alur Thangambere 25 Bible Online

Thangambere 25 - Alur bible

Thangambere 25

¹Man Ibrahim ugamu dhaku mange, man nyinge Ketura.

²Man enyolo ire Zimran, man Yokcan, ku Medan, man Midian, man Icbak, ku Cua.

³Man Yokcan unyolo Ceba, man Dedan. E wot Dedan gi Juascuri, man Juletuci, ku Juleumi.

⁴Man wot Midian gi eni: Efa, man Efer, man Hanok, man Abida, ku Elda. Maeni ceke gi nyithindho pa Ketura.

⁵Man Ibrahim umio ceke m’ebedo ko ni Isak.

⁶Ento ni wot mon m’araga, ma Ibrahim ubedo ko, Ibrahim umio giramia; man eorogi cen ku kum Isak ma wode, kinde ma fodi ebedo kwo, yo nyangu, ba ng’om ma yo nyangu.

⁷Man maeni gi ceng’ mi rundi ma Ibrahim ucamu ie ng’om, rundi dak acel ku pier abiro wi abic.

⁸E Ibrahim umwonyo cwinye, man etho i tio ma ber, e ng’atu m’uti, ma rundine dupa, man jucoke ba dhanu pare.

⁹E Isak giku Icmael ma wote giyike i odng’om mi Makpela, i podho pa Efron ma wod Zohar ma Jahiti, ma ni i wang’ Mamre;

¹⁰podho ma Ibrahim ung’iewo ba nyithindho pa Heth: juyiko Ibrahim keca, ku Sara ma cege.

¹¹Man etimbre yo ng’ei tho pa Ibrahim, nia Mungu mio mugisa ni Isak ma wode: man Isak ubedo ceng’ni Ber-lahai-roi.

¹²Nie maeni gi dhanum’utuk pa Icmael, ma wod Ibrahim, ma Hagar ma Nyamisiri, ma bong’ pa Sara, unyolo ni Ibrahim:

¹³man maeni gi nying’ wot Icmael, ku nying’gi, calku dhanum’utuk migi: ma kayu pa Icmael, Nebaioth; man Kedar, man Adbel, man Mibsam,

¹⁴man Micma, man Duma, man Masa,

¹⁵Hadad, man Tema, ku Yetur, man Nafic, man Kedema:

¹⁶maeni gi wot Icmael, man maeni nying’gi, ku ba pacu migi, man ku ba gonjo migi; judongomawijo apar wi ario calku thek migi.

¹⁷Man maeni gi rundi mi camung’om pa Icmael, rundi dak acel ku pier adek wi abiro: e emwonyo cwinye man etho, e jucoke ba dhanu pare.

¹⁸Man gibedo ugambre Havila cil kum Cur ma ni i wang’ Misiri, ka jucidho yo ba Ascur: man ebedo i wang’ utumin mire ceke.

¹⁹Man maeni gi dhanum’utuk pa Isak, ma wod Ibrahim: Ibrahim unyolo Isak:

²⁰e Isak rundi pare pier ang’wen kinde m’egamu Rebeka, ma nya Bethuel ma Jacami ma Padan-aram, ma nyamin Laban ma Jacami, ubed dhaku pare.

²¹E Isak ukwayu Yehova pi dhaku pare, kum mugumba kwanye: e Yehova winje, man Rebeka ma cege gamu ie.

²²E nyithindho gi-ii yor i ie; man ewacu kumae, Tek ebedo kumeni, nedi abedo kwo? Man ecidho nipenjo ba Yehova.

²³Man Yehova wacu ire kumae, Thek ario gini ii, Man kodhidhanu ario jubikoyo kud ii: Man kodhidhanu acel bibedo tek ma sagu kodhidhanu wadi; E jadit bitimo ni nyathin.

²⁴E ka ceng’ pare m’enyol i ie thum kakare, nen, rut ni i ie.

²⁵Man ma kwong’ane wok ma kwar, kume ceke calu kendi mi lesi; e gilwong’o nyinge Esau.

²⁶Man yo ng’ei maeni umin uwok, man cinge maku ufunytiend Esau; man julwong’o nyinge Yakobo: e Isak rundi pare pier abusiel kinde m’enyologi.

²⁷Man awiane dongo: e Esau en e jadwar ma riek, e jalum; man Yakobo en e dhanu ma mol, ma bedo i hema.

²⁸Nie Isak umaru Esau, kum ecamu kum ring lei pare: man Rebeka maru Yakobo.

²⁹Man Yakobo tedo dek: e Esau ai i thim, man evoc:

³⁰man Esau wacu ni Yakobo kumae, Akwei, keth acam dek maeno ma kwar; kum avoc: ka kumeno julwong’o nyinge Edom:

³¹man Yakobo wacu kumae, Har ing’ieu ira ng’ol ma dit peri mi nyol.

³²Man Esau wacu kumae, Nen, ani ceng’ni tho: man ng’ol ma dit mi nyol biloko ira ang’o?

³³E Yakobo wacu kumae, Ilar ikwong’ ira; e ekwong’o ire: man eng’iewo ng’ol pare mi dit ni Yakobo.

³⁴Man Yakobo mio kwen ku cwe ng’or nyamunguk ni Esau; e ecamu emadhu de, man eai malu, e ecidho i yo pare: kum kumeno Esau cayu ng’ol pare mi dit mi nyol.