Read Alur Thangambere 26 Bible Online

Thangambere 26 - Alur bible

Thangambere 26

¹Man ndru nuti i ng’ombe, umedo ndru ma kwong’a ma nuti i ceng’ pa Ibrahim. Man Isak ucidho bang’ Abimelek m’ubimo mi Jufilisti, ba Gerar.

²E Yehova nyuthre ire, man ewacu kumae, Kud ilor piny i Misiri; bed i ng’om m’abiyero pire iri:

³bed ni umondo i ng’om maeni, man wabibedo wakudi, man abimio mugisa iri; kum abimio iri ng’om maeni ceke, man ni nyikwei, man abiketho kwong’ m’akwong’o ni Ibrahim ma wuru ucungi;

⁴man abimedo kodhini calu cero m’i polo, man abimio ng’om maeni ceke ni kodhini; man thek ceke m’i ng’om binwang’u mugisa ni kum kodhini;

⁵kum Ibrahim uworo dwanda, man egwoko kur para, ku lembang’ola para, man lembapoka para, ku cik para.

⁶E Isak ubedo i Gerar:

⁷man dhanu mi ka maeno gipenje pi dhaku pare; man ewacu kumae, En e nyamira: kum lworo nege niwacu kumae, En e dhaku para; dhanu mi ka maeno, ewacu, umaru nega pi Rebeka; kum wang’e leng’ mir anena.

⁸Man etimbre, nwang’u ebedo keca hai, nia Abimelek m’ubimo mi Jufilisti uneno yo woko kud i wang’ot, man eneno, man, nen, Isak ubetuko ku Rebeka ma cege.

⁹Man Abimelek ulwong’o Isak, ewacu de kumae, Nen, andha en e dhaku peri: iwacu nedi kumae, En e nyamira? E Isak uwacu ire kumae, Kum awacu kumae, Amaru tho pire.

¹⁰Man Abimelek uwacu kumae, Maeni ang’o m’itimo i bang’wa? nwang’u ng’atu moko ma kind dhanu kuno uvuto ku dhaku peri ya lembe moko mbe pire, man kuno di ikelo dubo i wiwa.

¹¹E Abimelek ung’olo ni dhanu ceke, ewacu kumae, Ng’atu m’umulo kum ng’atu maeni kadi dhaku pare jubinege andha.

¹²E Isak ucoyo kodhi i ng’om maeno, man enwang’u i rundi nica cam acel bang’ dak: e Yehova mio mugisa ire.

¹³E ng’atuca doko dit, man ecikusagre maram edoko ko dwong’ hai:

¹⁴man ebedo ku piny mir udul rombe, ku piny mir udul lim, man juode dupa: e kumira nego Jufilisti i kume.

¹⁵Nie pi m’atong’a ceke ma jutic pa won utong’o i kum Ibrahim ma won, Jufilisti giculo, man gidhuro ng’om i wang’e.

¹⁶Man Abimelek uwacu ni Isak kumae, Ai kud i bang’wa woko; kum in i tek dit ma sagu wan.

¹⁷Man Isak uai ku keca, man egonjo i poga mi Gerar, e ebedo keca.

¹⁸Man Isak ugolo wang’ pi m’atong’a kendo, ma gitong’o i kum Ibrahim ma won; kum Jufilisti giculogi yo ng’ei tho pa Ibrahim: man elwong’o nyinge calku nying’ ma won ulwong’o kogi.

¹⁹E jutic pa Isak gitong’o i poga, man ginwang’u pi m’atong’a mi pi ma dhenyni keca.

²⁰Man jukwac mi Gerar gipiemo ku jukwac pa Isak, giwacu kumae. Pige en e mwa: man elwong’o nying’ pi m’atong’ane Esek kum gipiemo gikugi.

²¹E gitong’o kulo m’atong’a mange, man gipiemo pi maeca bende: man elwong’o nyinge Sitna.

²²Man eai ku keca, e etong’o kulo m’atong’a mange; e gipiemo ngo pi maeca: man elwong’o nyinge Rehoboth; man ewacu kumae, Kum kawono Yehova timo kabedo iwa, e wabicego nyingwa i ng’om.

²³Man eidho malu ku keca i Ber-ceba.

²⁴Man Yehova nyuthre ire i diewor nica, man ewacu kumae, An a Mungu pa Ibrahim ma wuru: lworo kud unegi, kum wanuti wakudi, man abimio mugisa iri, man abimedo kodhini ni kum Ibrahim ma jatic para.

²⁵Man eguro pemblam keca, e elwong’o nying’ Yehova, man eguro hema pare keca: e jutic pa Isak gitong’o kulo m’atong’a keca.

²⁶Abimelek ulund ucidho i bang’e m’eai i Gerar, gikud Ahuzath ma jarimbe, man Fikol ma jego mir udul pare.

²⁷E Isak uwacu igi kumae, Wubino i bang’a nedi, kum wudaga, man wuriema kud i beng’wu?

²⁸Man giwacu kumae, Waneno andha nia Yehova ni kudi: e wawacu kumae, Kawono wek kwong’ ubed i kindwa, cil i kindwa wakudi, man wek watim lembariba wakudi,

²⁹nia ibitimowa rac ungo, calu wamulo kumi ngo, man calu watimo gin moko i beng’i ngo ento ma ber, man waori cen ku kwiocwiny: kawono in i jamugisa pa Yehova.

³⁰E etimo igi agba, man gicamu gimadhu de.

³¹Man giai malu pir kugweno, man gikwong’o man ni wadi man ni wadi: Isak ucikogi de, man giai i bang’e ku kwiocwiny.

³²Man etimbre cing’ nica, nia jutic pa Isak gibino, man giyero ire pi pi m’atong’a ma gitong’o, man giwacu ire kumae, Wanwang’u pi.

³³Man elwong’e Ceba: ka kumeno nying adhurane en e Ber-ceba cil i ceng’ ma tin.

³⁴Man kinde ma Esau rundi pare pier ang’wen egamu dhaku ma nyinge Yudith ma nya Beri ma Jahiti, man Basemath ma nyar Elon ma Jahiti:

³⁵e gibedo ni can mi pidoic ni Isak man ni Rebeka.