Read Alur Thangambere 27 Bible Online

Thangambere 27 - Alur bible

Thangambere 27

¹Man etimbre, nia kinde ma Isak e uti, man wang’e neno piny via via, ketho nia ecopo neno piny ungo, elwong’o Esau ma wode ma jadit, man ewacu ire kumae, Woda: man ewacu ire kumae, Anuti.

²Man ewacu kumae, Nen kawono, ati, ang’eyo ceng’ mi tho para ngo.

³Ka kumeno kawono, akwei, gam jambdwar peri, athero peri kud atum peri, man icidh i thim, man igam ira ring’o;

⁴e itim ira cemo ma mit, wadi m’amaru, man ikele i bang’a, kara acam; kara ng’eyong’ec para mi mugisa iri ma fokatho ngo.

⁵Man Rebeka winjo kinde ma Isak uweco kud Esau ma wode. E Esau cidho i thim kara eneg ring’o, man ekele.

⁶Man Rebeka yero ni Yakobo ma wode, ewacu kumae, Nen, awinjo wuru yero ni Esau m’umeru, ewacu kumae,

⁷Kel ira ring’o, man itim ira cemo ma mit, kara acam, man ami mugisa iri i wang’ Yehova ma fodi tho para kutundo ngo.

⁸Ka kumeno kawono, woda, wor dwanda calku lembe m’ang’olo iri.

⁹Kawono ci bang’ udul diegi, man igam ira nyithi diegi ario ma ber keca: man abitimogi ni cemo ma mit ni wuru, wadi m’emaru:

¹⁰man ibitere ba wuru, kara ecam, kara emi mugisa iri ma fodi tho pare kuwok ungo.

¹¹E Yakobo wacu ni Rebeka ma min mire kumae, Nen, Esau m’umira en e jarayir, man an a jarayir ungo.

¹²Kuno nyo vwa bimulo kuma, man abibedo ire calu won abombi; man abigamu kwong’ i wia, mugisa re ngo.

¹³E min uwacu ire kumae, Kwong’ peri bed i wia, woda; iwor dwanda kende, man icidh ikelgi ira.

¹⁴E ecidho, man egamugi, man ekelogi ba min: e min mire timo cemo ma mit, wadi ma won umaru.

¹⁵Man Rebeka gamu kendi ma ber pa Esau ma wode ma jadit, ma bedo i bang’e i ot, man eroyogi i kum Yakobo ma wode ma nok;

¹⁶Man eketho lau nyithi diegi wi cinge, man wi ng’ute ma yir urabe i ie:

¹⁷man emio cemo ma mit ku kwen de, m’eyiko, i cing’ wode ma Yakobo.

¹⁸Man ebino ba won, ewacu de kumae, Vwa: man ewacu kumae, Anuti; in i ng’a, woda?

¹⁹E Yakobo wacu ni won kumae, An a Esau ma kayu peri; atimo calu iwacu ira: ai malu, akwei, ibed icam ring’o para, kara ng’eyong’ec peri mi mugisa ira.

²⁰Man Isak uwacu ni wode kumae, Inwang’e pio pio kumeni nenedi, woda? Man ewacu kumae, Kum Yehova Mungu peri ketho woth para bedo miero.

²¹Man Isak uwacu ni Yakobo kumae, Akwei, bin ceng’ni kara amul kumi, woda, tek in i Esau ma woda mandha kadi ungo.

²²E Yakobo eoro ceng’ni bang’ Isak ma won; man emulo kume, man ewacu kumae, Dwal en e dwand Yakobo, ento cingi re gi cing Esau.

²³Man eng’ie ngo, kum cinge ju yir, calu cing Esau m’umin mire: kum kumeno emio ire mugisa.

²⁴Man ewacu kumae, In i woda ma Esau andha? Man ewacu kumae, An a en.

²⁵E ewacu kumae, Kele ceng’ni i bang’a, man abicamu ring’o moko pa woda, kara ng’eyong’ec para mi mugisa iri. Man ekele ceng’ni i bang’e, e ecamu: man ekelo ire pigulok, e emadhu.

²⁶Man won ma Isak uwacu ire kumae, Cor ceng’ni kawono, man icwi limba, woda.

²⁷E ecoro ceng’ni, man ecwio limbe: man eng’wio ng’wic kendi pare, e emio mugisa ire, man ewacu kumae, Nen, ng’wic woda En e calu ng’wic thim ma Yehova mio mugisa i wie:

²⁸Man Mungu mi iri kum thoi m’i polo, Man kum mio m’i ng’om, Man cam dupa ku pigulok ma nyasa:

²⁹Dong’ kodhidhanu gitim iri, Man thek girum piny i beng’i: Bed rwoth wi utumeru, Man wek wot meru girum piny iri: Kwong’ ubed wi dhanu m’ukwong’i kubang’gi kubang’gi, Man mugisa bed wi dhanu ceke m’umio mugisa iri kubang’gi kubang’gi.

³⁰Man etimbre, kinde ma Isak udaru mio mugisa ni Yakobo, man kinde ma Yakobo ai ku vut Isak ma won, nia Esau m’umin mire mondo m’eai yo dwar pare.

³¹Man en bende etimo cemo ma mit, man ekele ba won; man ewacu ni won kumae, Dong’ vwa ai, man ecam ring’o moko pa wode, kara ng’eyong’ec peri mi mugisa ira.

³²Man Isak ma won uwacu ire kumae, In i ng’a? Man ewacu kumae, An a wodi, ma kayu peri, Esau.

³³E kum Isak umiel dit apila, man ewacu kumae, E ka ng’a m’ugamu ring’o, man ekele ira, man adaru camu ceke ma fokiwok ungo, man amio mugisa ire? eyo, man ebibedo jamugisa.

³⁴Kinde ma Esau uwinjo lembe pa won, eywak ku ywak ma dit apila man ku can de, man ewacu ni won kumae, Mi mugisa ira, an bende, E vwa.

³⁵Man ewacu kumae, Umeru bino kud abombi, man edaru gamu mugisa peri.

³⁶Man ewacu kumae, Jucaku nyinge Yakobo dre ngo? kum evuga wang’ ario maeni: ekabu ng’ol mi dit mi nyol para woko; man, nen, kawono ekabu mugisa para woko. Man ewacu kumae, Iweko mugisa moko ngo ira?

³⁷Man Isak uloko lembe ewacu ni Esau kumae, Nen, aketho ebed rwoth peri, man utumin mire ceke amio ire ni jutic; man awacu ebed ku cemo man pigulok ma nyasa de: e kan ang’o m’abilund timo iri, woda?

³⁸Man Esau wacu ni won kumae, Vwa, ibedo ku mugisa acel kende? mi ira mugisa, an bende, E vwa. E Esau ting’o dwande malu, man eywak.

³⁹Man Isak ma won uloko lembe man ewacu ire kumae, Nen, ka ma mio mi ng’om bibedo ni kabedo peri, Man thoi m’uai malu i polo;

⁴⁰Man ibibedo ni kum palamularu peri, man ibitimo ni umeru; Man ebitimbre, kinde m’ibigonjri, Nia ibikiro mberembere pare woko kud i ng’uti.

⁴¹Man Esau dagu Yakobo kum mugisa ma won umio ire: man Esau wacu i adundene kumae, Ceng’ mi ywagu vwa dhingo; e abilund nego Yakobo m’umira.

⁴²E juyero lembe pa Esau ma wode ma jadit ni Rebeka; e eoro elwong’o Yakobo ma wode ma nok, man ewacu ire kumae, Nen, Esau m’umeru, ejukre gire piri, m’ekeco ko ya ebinegi.

⁴³Ka kumeno kawono, woda, wor dwanda; man iai iring ba Laban m’umira i Haran;

⁴⁴man wubed wukude nindo moko, maram kwinyo p’umeru kwi ko;

⁴⁵maram ng’ecwiny p’umeru ai ko woko i kumi, man wie wil kum lembe m’itimo i kume: e abilund oro lembe, man abigemi ku kuca: nedi wun ario de wurwiny ira ceng’ aceli?

⁴⁶Man Rebeka wacu ni Isak kumae, Kwo para ola kum nyig Heth: tek Yakobo gamu dhaku ma kind nyig Heth, wadi maeni, mi nyir m’i ng’ombe, kwo para biloko ang’o ira?