Read Alur Thangambere 28 Bible Online

Thangambere 28 - Alur bible

Thangambere 28

¹Man Isak ulwong’o Yakobo, e emio mugisa ire, man eng’olo ire, ewacu ire kumae, Ibigamu dhaku i kind nyig Kanan ungo.

²Ai malu, cidh i Padan-aram, ba ot pa Bethuel ma won meru; man igam iri dhaku ku kuca i kind nyig Laban ma neru.

³E Mungu ma Jategokpo mi mugisa iri, man eketh inyai, emedi de, kara idok ni udul kodhidhanu;

⁴man emi iri mugisa pa Ibrahim, iri, man ni kodhini karacelo kudi: kara igam ng’om m’ibedo ni umondo i ie ni aba, ma Mungu mio ni Ibrahim.

⁵Man Isak uoro Yakobo cidho: man ecidho ba Padanaram ba Laban, ma wod Bethuel ma Jacami, m’umin Rebeka, ma meg Yakobo kud Esau.

⁶Nie Esau neno nia Isak umio mugisa ni Yakobo man eore Padan-aram, kara egam ire dhaku ku kuca; man nia kan emio mugisa ire emio ire ng’ol, ewacu kumae, Ibigamu dhaku i kind nyig Kanan ungo;

⁷man nia Yakobo woro won ku min, man ecidho Padan-aram:

⁸man Esau neno nia nyig Kanan unyayu mutoro i Isak ma won ungo;

⁹e Esau cidho ba Icmael man egamu Mahalath ma nyar Icmael ma wod Ibrahim, ma nyamin Nebaioth, udoko ni dhaku pare umedo mon m’ebedo ko.

¹⁰E Yakobo ai Ber-ceba, man ecidho yo ba Haran.

¹¹Man ewok ka moko, ebedo keca de diewor soro, kum ceng’ upodho; man eting’o kidi acel ma kakeca, man ekethe the wie, e evuto i kakeca, kara enindi.

¹²Man eleko; man, nen, raidh juting’o ecungo wi ng’om, man wie tundo i polo; man, nen, malaika pa Mungu beidho man ubeloro kud i kume.

¹³Man, nen, Yehova cungo i wie, man ewacu kumae, An a Yehova, Mungu pa Ibrahim ma kwaru, man Mungu pa Isak: ng’om m’ivuto i wie, abimie iri, man ni kodhini;

¹⁴man kodhini bibedo calu utur m’i ng’om, e ibimoiri foo yo reto, man yo nyangu, yor ariwa ma malu de, man yor ariwa ma piny: man wat ceke m’i ng’om binwang’u mugisa ni kumi ni kum kodhini de.

¹⁵Man, nen, wanuti wakudi, man abigwoki ka ma tek icidho i ie, e abikeli kendo i ng’om maeni: kum abiweki ngo, ma fok’atimo lembe m’ayero pire iri ngo.

¹⁶E Yakobo ceu ku wang’ nindo pare, man ewacu kumae, Andha Yehova ni i ka maeni: man ang’eye ngo.

¹⁷E lworo nege, man ewacu kumae, Ka maeni en e mi lworo ma dit: maeni gin mange ngo ndhu ot pa Mungu, man maeni en e dhugang’ mi polo.

¹⁸E Yakobo ai pir kugweno, e eting’o kidi m’eketho the wie, man eketho ecungo ni mbegi, man ekonjo mo i wie.

¹⁹Man elwong’o nying’ ka maeno Beth-el, ento nying adhurane ma kwong’a Luz.

²⁰E Yakobo ng’olo lembang’ola, ewacu kumae, Tek Mungu bibedo karacelo kuda, man ebigwoka i yo m’acidho i ie, man ebimio ira kwen mi cemo, man kendi m’arony,

²¹ketho nia adwogo kendo ba ot pa vwa ku kwiocwiny, e Yehova bilund bedo Mungu para,

²²e kidi maeni m’aketho malu ni mbegi, bilund bedo ot pa Mungu: man kind gin ceke m’ibimio ira abimio apaje iri andha.